Lamatualain pake Kristus fo hengge-nee hehelu-fufuli feu' malole' lena' hehelu-fufuli mbaraa' a
8
Dad'i au 'o'ola ngga nenendin ta'o ia: ia naa hita hambu agama malangga monaen fo manaseli' lena' dalahulu' ra. Eni, naeni Yesus. Ana 'endo' to'u parenda' sia sorga, sia Lamatualain mana sia ata-ata' a bob'oa 'ona na.a 2 Ana nalalao ue-tataon sia mamana hule-o'e matetu' a. Mamana' naa, Lamatualain mana tao, nda atahori tao sa.3 Agama Yahud'i malangga monaen biasa nendi papala-b'ab'anggi' noo tutunu-hohotu' fee Lamatualain. Naa de Yesus o musi nendi tutunu-hohotu' boe. 4 Te Yesus nda nalalao ue-tataon sia raefafo' ia sa. Huu sia raefafo' ia hambu malangga agama mana nendi hahambu' ma tutunu-hohotu' neu Lamatualain, tungga ba'i Musa hohoro-lalanen ena. 5 Ara ralalao ue-tatao na ra sia Lalaat Hule-o'e', fo 'ona' mamana hule-o'e matetu' a sia sorga. Huu lele' ba'i Musa nae tao Lalaat naa, Lamatualain fee nesenened'a' neu e nae, “Musuned'a malolole! Ho musi tao tungga teb'e-teb'e' 'ona' lalaat fo Au 'utud'u basa neu nggo mia lete' naa ata!”b 6 Te Yesus ue-tataon manaseli' lena' malangga agama mbaraa' ra. Huu ia naa, Lamatualain hengge-nee hehelu-fufuli' fo malole' lena' a, huu Ana o pake Yesus dad'i lelete fo atahori bisa hambu dame bali' roo Lamatualain.
7 Dalahulun, Ana hengge-nee hehelu-fufulin noo ba'i Musa lele' Ana na'onda' hohoro-lalane' ra. 'Ona' mae ta'o naa o, atahori nda bisa rasod'a meumare' ma matetu' tungga hohoro-lalane' naa ra sa. Huu naa, ara nda bisa malolole roo Lamatualain sa. Naa de ia naa, parluu hambu hehelu-fufuli malole' lena' fai. 8 Te dalahulun, Lamatualain 'ai atahori na ra, huu ara ralena-langga rasafafali hohoro-lalane mbaraa na. Lele' Ana nda na'atataa' sa ena, Ana namanasa, ma nafad'e nae,
“Rena malolole, te Au ia, Lamatua', mana na'ena hak parenda basa' e!
Dei fo Au hengge-nee hehelu-fufuli feu'
'oo atahori Isra'el,
ma leo Yahud'a ra.
9 Hehelu-fufuli' fo Au 'ae hengge-nee 'oo se,
nda 'ona' hehelu-fufuli dalahulu' a fo Au hengge-nee
'oo bei-ba'i na ra sa.
Huu dalahulun Au to'u lima na ra,
de 'oo se lao hela rae Masir.
Te ara nda tao tungga
saa fo ara hengge-nee basa roo Au' a sa.
Naa de Au nda 'afi' 'ae taoafi' neu se sa ena.
10 Hehelu-fufuli' fo Au 'ae hengge-nee 'oo atahori Isra'el ra,
liin ta'o ia:
Dei fo Au tao hohoro-lalane ngga neu dud'u'a na ra rala.
Dei fo Au sura' parenda ngga sia rala na ra.
Basa fo, Au dad'i sira Lamatuan,
ma ara dad'i Au atahori ngga ra.
11 Dei fo ara nda parluu ranori nonoo na ra sa ena,
ma toronoo na ra rae,
‘Hei musi mihine Lamatualain!’
Huu basa se rahine Au noo malole',
mia anad'iki' losa monae' ra.
12 Huu Au 'ae 'utud'u susue-lalai ngga neu se,
naa de Au lilii' hendi basa sala-kilu na ra.”c
13 Lele' Lamatualain 'ola' nae, Eni nau hengge-nee hehelu-fufuli feu' noo se, naa sosoan nae, hehelu-fufuli mbaraa' a nda papake' sa ena. Nda doo' sa te, sambu-lalo hendi ena.