Melkisedek naa, malangga agama monae' lena' malangga agama Lewi noo tititi-nonosi na ra
7
1-3 Lele ulu' a, Melkisedek dad'i kota Salem mane na. Eni o malangga agama soa' neu atahori mana be'utee neu Lamatualain mana sia ata-ata' a. Naran sosoan nae, “Mane Rala Ndoos”. Ma mane Salem a sosoan, “Mane Dame”. Esa o nda nahine Melkisedek ia lao' mia bee nema sa boe. Esa o nda nahine aman, inan, noo bei-ba'i na ra sa boe. Esa o nda nahine ara bonggi e ma ana mate eni bees sa boe. Atahori rahine 'a eni, mane kota Salem ma malangga agama sia Lamatualain. Te ana 'ona' Lamatualain Anan boe, huu eni o malangga agama mana nalalao nakandoo ue-tatao na.Lao esa, hambu mane' hira rema roo sold'ad'u ra, fo rae rambas rala ba'i Abraham nonoo na ra sud'i 'a saa na ra. Basa naa ma, ba'i Abraham neu natati na'ab'ue noo nonoo na ra losa rasenggi' mane' naa ra. Boe ma ba'i Abraham se ha'i rala bali' basa sud'i 'a saa ra. Lele ba'i Abraham lao bali', boe ma Melkisedek kalua mia kota Salem de neu soru e. Boe ma ana 'ola' fee papala-b'ab'anggi' neu ba'i Abraham nae, “Hela fo Lamatualain mana sia ata-ata' a fee nggo papala-b'ab'anggi'.” Basa naa ma, ba'i Abraham banggi fee Melkisedek bab'anggi' esa mia bab'anggi' sanahulu, mia basa sud'i 'a saa fo ana rambas nala bali' naa ra. Ana fee ta'o naa, huu Melkisedek naa, malangga agama mia Lamatualain mana sia ata-ata' a.a
4 De du'a malolole so'al Melkisedek ia! Ba'i Abraham banggi fee ne bab'anggi' esa mia bab'anggi' sanahulu mia basa sud'i 'a saa meulau', fo ana ha'i nala bali' ra. Dad'i matetun, Melkisedek naa atahori moko-monaen boe. 5 Tao-tao te lele' naa, Lamatualain nda fe'e so'u atahori fo dad'i malangga agama sa. Losa nala ba'i Abraham tititi-nonosin Lewi, dei de Lamatualain so'u nala Harun noo tititi-nonosi na ra, dad'i malangga agama neu basa ba'i Abraham tititi-nonosi na ra. Basa ma, losa Musa lelen, Lamatualain na'onda' hohoro-lalane' nae, atahori mia leo Lewi na'ena hak simbo bab'anggi' esa mia buna-b'oa' bab'anggi' sanahulu mia toronoo leo Isra'el laen ra.b 6 Te Melkisedek naa nda Lewi tititi-nonosin sa. 'Ona' naa o, ba'i Abraham banggi fee ne bab'anggi' esa mia bab'anggi' sanahulu, huu ana nae Melkisedek naa, atahori manaseli'. Ba'i Abraham pantiin huu ana simbo nala hehelu-fufuli' mia Lamatualain mana nae fee papala-b'ab'anggi' neu e. Te 'ona' naa o, Melkisedek mana 'ola' papala-b'ab'anggi' fee Abraham nae, “Hela fo Lamatualain mana sia ata-ata' a, fee papala-b'ab'anggi' neu nggo.” 7 Ia dad'i bukti 'oi, Melkisedek naa, atahori pantiin lena'. Huu atahori mana 'ola' fee papala-b'ab'anggi', mema' pantiin lena' atahori mana simbo papala-b'ab'anggi' a.
8 Basa malangga agama ra ra'ena hak fo simbo rala bab'anggi' esa mia bab'anggi' sanahulu. Te huu sira atahori raefafo', de doo-d'oo ma ara mate. Malangga agama Melkisedek o simbo bab'anggi' esa mia bab'anggi' sanahulu boe. Te ana nasod'a nakandoo, huu Lamatualain Susura Meumaren nda dui nae, ana mate sa. 9-10 Huu ba'i Abraham banggi fee Melkisedek sud'i 'a saa ra bab'anggi' esa mia bab'anggi' sanahulu, naa de atahori bisa du'a' rae, eni tanggon nala tititi-nonosin nda fe'e mana bonggi' a sa. Noo ta'o naa, hita bisa tae, ana bae mema' tititi-nonosin Lewi bab'anggin esa mia bab'anggi' sanahulu.c
Hita parluu agama malangga monaen mata feu' huu malangga agama mbaraa' ra nda bisa 'ose hendi atahori sala na ra sa
11 Lele' Lewi tititi-nonosi na ra dad'i malangga agama, Lamatualain pili ba'i Musa 'a'an Harun, dad'i atahori kaesan mana dad'i agama Yahud'i malangga monaen. Malangga agama ra ue-tatao na ra, naeni ratud'u dala' fo atahori rasod'a noo ndoo-tetu', ma malole roo Lamatualain. Mae sira tao tungga basa hohoro-lalane' fo Musa simbo' ra o, agama Yahud'i malangga monaen 'ona' Harun nda bisa tao nameu se noo matetu' sa. Naa de ara parluu agama malangga monaen laen, mana 'ona' Melkisedek. 12 Te mete ma malangga agama mata feu' nggati malangga agama mbaraa', na, musi nggati hohoro-lalane mbaraa' ra boe.
13 De tahine ena tae, malangga agama mata feu' naa, naeni Yesus. Te huu bonggi e mia leo laen, nda mia leo Lewi sa. Tungga ba'i Musa hohoro-lalanen, agama malangga monaen 'ona' Harun, nema mia 'aka' leo Lewi, nda bole mia leo laen sa. 14 Te basa atahori bub'ulu' rae, hita Malanggan Yesus Kristus, bonggi E mia leo Yahud'a. Tungga ba'i Musa hohoro-lalanen, nda hambu agama malangga monaen mia leo naa sa.
15 Te Lamatualain nda taoafi' neu hohoro-lalane mbaraa' sa ena, huu ia naa Yesus, dad'i malangga agama mata feu' 'ona' Melkisedek. 16 Huu tungga ba'i Musa hohoro-lalanen, malangga agama mata mbaraa' ra musi rema mia leo Lewi. Te Yesus nda nema mia leo naa sa. 'Ona' naa o, Lamatualain so'u E dad'i malangga agama mata feu', huu Ana na'ena koasa fo nasod'a nakandoo 'a, ma nda hambu esa bisa tao nalutu E sa boe. 17 Huu Lamatualain susura meumare sura' nae,
“Ho dad'i malangga agama 'ona esa' moo Melkisedek dalahulu' a,
te Ho dad'i malangga agama losa doo ndu'u-d'oon neu.”d
18 Sosoan nae, hohoro-lalane mbaraa' nda na'ena koasa fo tulu-fali atahori ra sa. Naeni de Lamatualain fee nggati hohoro-lalane mbaraa' naa ra, fo dalahulun Ana fee neu ba'i Musa. 19 Huu 'ona' mae atahori tao tungga hohoro-lalane mbaraa' ra o, ara fe'e masala-kilu' boe. Naa de ia naa, Lamatualain soi dala malole' lena', fo ata tasod'a too E noo mole-d'ame.
Yesus naa, malangga agama manaseli' lena' basa malangga agama mbaraa' ra
20-21 Dalahulun, lele' Lamatualain so'u Lewi tititi-nonosin fo dad'i malangga agama, Ana nda helu-fuli ma sumba saa-saa noo se sa boe. Te Lele' Lamatualain so'u Yesus dad'i malangga agama, Ana helu-fuli nae,
“Au ia, Lamatua', mana na'ena hak parenda basa-b'asa' e!
Au sumba, Au nda 'ub'a saa fo Au helu-fuli' a sa.
Au so'u nggo dad'i malangga agama,
fo mulalao ue-tataom mukundondoo 'a.”e
22 Noo hehelu-fufulin ta'o naa, Lamatualain pake Yesus dad'i toto'u-nonoet nae, Eni nau hengge-nee hehelu-fufuli' malole' lena' noo nggita.
23 Dalahulun, malangga agama mbaraa' musi nggati se nekendoo 'a, huu ara mate. Naeni de musi hambu malangga agama hetar. 24 Te Yesus naa, malangga agama mata feu' esa, mana nasod'a nakandoo 'a ma nalalao ue-tataon nakandoo 'a. Naeni de nda parluu atahori nggati E sa. 25 Huu naa, Yesus bisa fee masoi-masod'a' neu basa atahori mana nau rema risi' Lamatualain tungga Lamatua' Yesus. Ana tao ta'o naa losa doo ndu'u-d'oo na. Boe ma Ana dad'i sira atahori mana soi dalan, mana soa 'a neu no'e mbali Lamatualain fo tulu-fali se.
26 Yesus naa, agama malangga monaen mana nandaa seli noo nggita. Huu Eni, Atahori Meumare' nda masala' saa sa boe. Eni, nda 'ona' atahori fo nahine 'a tao sala-kilu' sa. Huu Lamatualain so'u nananaru E ena, lena' basa mana sia raefafo' ma sia sorga. 27 Naa de Yesus malole' lena' basa malangga agama mbaraa' ra. Dalahulun, ara musi tunu-hotu banda tungga fai, naa fo Lamatualain 'ose hendi sala-kilu na ra. Basa fo ara tao tutunu-hohotu' fee atahori ra. Te Yesus nda parluu tao nasafafali ta'o naa sa, huu Ana fee aon lao esa 'a fo dad'i tutunu-hohotu'. Naa dai ena fo Lamatualain 'ose hendi basa atahori sala-kilu na ra.f
28 Tungga ba'i Musa hohoro-lalanen, ara so'u atahori raefafo' biasa fo dad'i agama Yahud'i malangga monaen. Te ara fe'e ra'ena sala-kilu', naa de Lamatualain tao hehelu-fufuli feu' nae, Eni nae so'u Anan fo dad'i neu agama malangga monaen. Huu Anan ia tungga nakandoo Eni hihii-nanau na.