4-6 Tao-tao te, hambu atahori ruma rahine Kristus nenorin ena, ma ramed'a rita Lamatualain rala malolen ena, losa Ana haitua Dula-d'ale Meumaren fee neu se. Ara rahine basa Lamatualain Ded'ea-'o'olan, ma ramed'a rita Lamatualain Koasan fo nae pake mete ma raefafo' a sambu-lalo. Te mae ta'o naa o, ara nggari hendi nemehere na ra ma rasad'ea hela Kristus. Huu naa, nda hambu dala' fo bali' ro'e ambon sa, fo rasod'a malolole bali' roo Lamatualain. Huu mete ma atahori nda nau doa' ma fale rala na ra sa, na, naa 'ona' sira mbaku risa Lamatualain Anan sia hau nggangge', basa ma ra'a'e'ei' E sia atahori hetar mata na ra.

7 Atahori mata' naa ra 'ona' rae mana fee buna-b'oa nda malole' sa. Tao-tao te, mete ma 'ud'an nema, rae malole' a bisa fee buna-b'oa' mana na'ena ngguna neu atahori mana tao osi-tine. Boe ma Lamatualain na'onda' papala-b'ab'anggi', fo tao rae a boe fee buna-b'oa' hetar. 8 Te atahori mana nasad'ea Kristus, 'ona' rae mana fee 'a duri-nggaut. Duri-nggaut a nda na'ena ngguna saa-saa sa boe. Nda doo' sa ma, Lamatualain nema de fee huku-d'oki' neu rae a. Boe ma Ana lalangge hendi buna-b'oa' mana nda na'ena ngguna' sa.^a

9 Toronoo susue ngga ra, e! Mae au 'ola' deres mbei 'ona' naa o, au bub'ulu' 'ae, hei nda misid'ea hela Kristus sa. Huu hei mimihere E, ma masod'a ma ra na'ena buna-b'oa malole' ena. 10 De misined'a te Lamatualain ralan ndoos, ma Ana nda lilii' mbusa-titi ma ra sa. Huu hei ue-tao noo manggate' tulu-fali atahori na ra ma sue se. Eni' a dalahulun, hei milalao ue-tataon ena. Hei o fe'e tao ta'o naa boe. 11 Te ia naa, au nau fo basa nggi ue-tao mangganggate lena' fai, fo tao tungga mikindoo ta'o naa losa bab'asa na. Noo ta'o naa, dei fo hei simbo basa dala malole' fo mimihena mia Lamatualain. 12 Sad'i ama 'afi' mbera-mbera'! Ama musi ha'i conto mia atahori mana ramahere Lamatualain eni' a doo' ena. Ara ramahena rakandondoo 'a neu E, losa ara simbo rala saa fo Ana helu-fuli hela' a.

13-16 Ha'i conto mia hita ba'in Abraham. Dalahulun Lamatualain hengge-nee hehelu-fufulin noo e nendi' susumba'. Mete ma atahori so'u susumba', ara sumba rendi' Lamatualain naran, fo Lamatualain dad'i sakasii, huu Lamatualain naa lena' eni. Ma mete ma hambu ded'eat, basa atahori bub'ulu' rae, atahori naa 'o'olan teb'e, huu ana sumba nendi' Lamatualain nara na. Mema' naa atahori hihii na. Te lele' Lamatualain sumba noo ba'i Abraham, Ana sumba nendi' naran, huu nda hambu esa lena' Eni sa boe. Ana helu-fuli nae,

Lamatualain helu-fuli basa ta'o naa, boe ma ba'i Abraham namahere ma namahena nakandoo neu E, mae doo' dei de ana simbo nala saa fo Lamatualain helu-fuli' naa.^b 17 Noo ta'o naa, hita bub'ulu' tae mete ma Lamatualain tao hehelu-fufuli' noo atahori na ra, Ana hengge-nee hehelu-fufulin nendi' susumba', fo dad'i neu toto'u-nonoet 'oi, saa fo Eni helu-fuli' naa, Mema' teb'e ma nda 'ub'a sa. 18 Hambu dala' rua nda mana 'ub'a' sa. Kaesan, naeni Lamatualain hehelu-fufuli na. Karuan, naeni Lamatualain susumban mana dad'i hengge-nee' neu hehelu-fufuli na. De mete ma Lamatualain helu-fuli dala' esa ena, dei fo Ana tao tungga, huu Ana nda mana peko-leleko' sa. Naa de rala ta ra 'afi' banggi-b'anggi' neu hehelu-fufulin naa.

Hita tela teu sangga masoi-masod'a' sia E ena, de ia naa ata tahani takandoo ma tamahena neu E. 19 Noo ta'o naa, rala ta ra teer, 'ona' 'ofa' esa seli hendi rii-ree, de nafu sia mamana nanafu'. Huu tamahena neu Yesus Kristus mana dad'i hita agaman malangga monaen. Dalahulun nandaa noo atahori Yahud'i ra fai malole na ra, agama Yahud'i malangga monaen rala neu tungga teme mana pele kama Meumare manaseli' a, fo neu nandaa noo Lamatualain sia naa.^c 20 Te ia naa Yesus rala neu na'ahulu' de soi dala' fee nggita ena. Huu Eni agama malangga monaen, mata' esa 'ona' Melkisedek dalahulu' a. Te Yesus manaseli' lena' mia basa malangga agama mbaraa' ra, huu Ana nda parnaa naloe' tao ue-tataon sa.^d