5
Atahori fo ara so'u rala dad'i agama Yahud'i malangga monaen, eni ue-tataon musi tulu-fali atahori fo ra'ab'ue roo Lamatualain. Eni musi simbo fefee na ra noo banda tutunu-hohotu na ra, fo fee neu Lamatualain. Eni musi fee banda tutunu-hohotu' fo Lamatualain 'ose hendi atahori sala-kilu na ra. 2 Mete ma hambu atahori nda rahine dala masod'a ndoo-tetu' a sa, do atahori lao hela dala' naa ena, na, malangga agama naa nda tao na'asususa' se sa. Ralan malole noo se, huu eni o atahori mana tud'a noo mud'a' 'ona' se boe. 3 Huu eni o atahori mana tud'a' 'ona' se boe, naeni de malangga agama naa o musi fee banda tutunu-hohotu' fo Lamatualain 'ose hendi salan boe.a 4 Atahori nda bole so'u-so'u' aon dad'i agama Yahud'i malangga monaen sa. Huu 'aka' Lamatualain na'ena hak fo pili atahori 'ona' naa, 'ona' lele ulu' a Ana so'u Musa 'a'an Harun.b5 Kristus o, 'ona' naa boe. Ana nda so'u aon fo dad'i agama malangga monaen sa. Huu lele ulu' a, Lamatualain mana so'u E nae,
“Ho ia, Au Ana ngga,
fai' ia, Au so'u nggo fo to'u parenda'.”c
6 Sia tatad'a' laen sia Lamatualain Susura Meumaren, Ana o 'ola' nae,
“Ho dad'i malangga agama mata' esa moo Melkisedek lele ulu' naa,
te Ho dad'i malangga agama losa doo ndu'u-d'oon neu.”d
7 Lele' Yesus masod'an nae 'a nate'e sia raefafo' ia, Ana hule-o'e nda naloe' sa ma nggae nahere', no'e tulun Lamatualain fo fee beb'e'i-b'ara'ai' neu E. Huu Ana bub'ulu' nae, Lamatualain koasan bisa fee masoi-masod'a' neu E. Boe ma Lamatualain rena neu Yesus, huu Ana tungga teb'e-teb'e' Eni hihii-nanau na.e 8 Huu Yesus naa, Lamatualain Ana na. Mae 'ona' naa o, Ana musi hambu doid'oso' boe, fo Ana nanori tungga Lamatualain hihii-nanau na. 9 Boe ma mema' Ana tao tungga Lamatualain hihii-nanau na ra teb'e-teb'e'. Naa de ia naa Ana dad'i Hau Huu Masod'a' fee basa atahori mana ramahere neu E, fo ara rasod'a rakandondoo 'a roo Lamatualain. 10 Huu Lamatualain so'u Yesus dad'i malangga agama, mata' esa noo malangga agama Melkisedek ma'ahulu na.
'Afi' nggari hendi nemeherem neu Kristus
11 Au fe'e 'ae 'ola' dala' hetar so'al Kristus noo Melkisedek, te au nda bisa 'ola' losa lutu'-lelo' sa, huu hei fe'e 'ona' anad'iki nggoa' nda fe'e mihine noo matetu' sa. 12 Tao-tao te, hei mimihere doo' ena. Tungga matetun, hei musi dad'i meser fo bisa minori atahori boe. Te hei fe'e 'ona' anad'iki ana' ra de nda fe'e raa rahine sa, huu fe'e bisa rinu 'a susu. Hei fe'e parluu atahori ranori nggi dala-d'ala netehuu' mia Lamatualain Susura Meumare na. 13 Au bisa 'u'usasama' nggi 'ona' anad'iki ana' naa ra, huu hei nda fe'e mihine teb'e-teb'e' nenori netehuu' mana sia Kristus, fo bisa misod'a noo ndoos.f 14 Te mete ma anad'iki ana' a na'amoko ena, na, ana nda ninu 'a susu sa ena, te ana naa nanaa manggatee' boe. Naa 'ona' atahori esa nanori losa nahine Lamatualain nenorin noo matetu', naa fo ana nahine bee malole' ma bee de'ulaka'.