Mete ma tamahere neu Yesus Kristus, na, hita bisa tasod'a noo dame too Lamatualain, 'ona' ata hahae ao ta ra too E boe
4
De ia naa ata musi dud'u'a naru', huu Lamatua fe'e helu nae, Eni atahori na ra bisa hahae ao na ra roo E. Dad'i 'afi' losa hambu ruma mia hei nda simbo saa fo Lamatualain helu-fuli' naa sa. 2 Huu ata rena hara-lii malole' a ena, 'ona' bei-ba'i ta ra rena' a boe. Te huu ara nda ramahere hara-lii' naa sa, de nda hambu saa-saa sa boe. 3 Huu mete ma tamahere, na, hita bisa hahae ao ta ra ta'ab'ue too Lamatualain. Huu fe'esa'an, Ana helu ta'o naa neu bei-ba'i ta ra, te basa ma Ana namanasa se nae,“Au nda 'u'utataa' mete hei de'ulaka' ma ra 'ona' naa sa ena.
Naa de Au sumba-ndoon nggi 'ae,
‘Hei nda bole rala mii sa,
fo hahae ao ma ra moo Au.’”
Dad'i hita bub'ulu' tae, lele' Lamatualain tao lalai noo raefafo', Ana tao mema' fo atahori na ra bisa hahae ao na ra, fo rasod'a ra'ab'ue roo E.a 4 Sia dud'uit so'al Lamatualain tao lalai noo raefafo', nenesura' so'al Lamatualain hahae aon nae,
“Lamatualain ue-tao nala basa' e,
boe ma mbila' neu ma, nandaa noo fai kahitun,
ma Ana hahae ao na.”b
5 Sia tatad'a' laen fai, Lamatualain 'ola' noo bei-ba'i ta ra nae,
“Hei nda bole rala mii sa,
fo hahae ao ma ra moo Au.”c
6 Dad'i Lamatualain nau fo atahori na ra hahae ao na ra fo rasod'a ra'ab'ue roo E. Te bei-ba'i ta ra mana rena ra'ahulu' hara-lii malole' naa, ara nda bisa maso' rala reu sa, huu ara nda tao tungga Lamatualain hihii-nanaun sa. 7 Te doo-d'oo ma, Lamatualain pili fai laen, fo atahorin bisa maso' rala reu hahae ao na ra roo E. Ana pake ba'i Daud fo 'ola' nae,
“Fai' ia, mete ma hei rena Lamatualain 'o'olan,
'afi' tao rala ma ra manggatee 'ona' fatu,
te rena malolole leo.”d
8 Lele' ba'i Daud 'ola' nae, “fai' ia”, ana nda dud'u fai' fo lele' Yosua noo bei-ba'i' ra roo umbu-ana na ra reu risi' Kana'an. Huu lele' ba'i Daud 'ola' na'o naa, te basa se mate doo' ena.e 9 Huu naa, hita bub'ulu' tae, Lamatualain pili fai laen, fo atahori na ra bisa hahae ao na ra, fo rasod'a ra'ab'ue roo E. 10 Ma atahori mana rala neu hahae aon noo Lamatualain, ana hahae mia ue-tataon ena, 'ona' Lamatualain hahae aon mia ue-tataon nandaa noo fai kahitun, lele' Ana tao basa raefafo' ia.f 11 Dad'i mihehere fo ama bisa maso' hahae ao ma ra fo misod'a mi'ib'ue moo Lamatualain. 'Afi' losa ruma nda hambu rala reu sa, huu nda nau rena Lamatualain Ded'ea-'o'olan sa, 'ona' bei-ba'i ta ra.
12 Huu Lamatualain Ded'ea-'o'ola na ra ratud'u dala masod'a ndoo-tetu' a. Ara ra'ena koasa fo maso' risi' rala ta ra, fo timba-tai dud'u'a ta ra ma basa hihii-nanau ta ra. Huu Ded'ea-'o'ola' naa ra mema' tande' lena' felas, fo mana hina ao-sisi' fo 'uta ua-kakalu', ma seseri rui' ra fo tao natanggaa basa se. 13 Sia lalai noo raefafo' nda hambu saa ne'efuni' sia Lamatualain matan sa, Huu Ana nita basa' e meu-meu. Boe ma dei fo hita teu tandaa too E, fo tataa basa tatao-nono'i ta ra neu E.
Yesus dad'i Agama Malangga Monaen, fo manaseli' lena' malangga agama mbaraa' ra
14 Ata musi to'u tahere' nemehere ta ra, huu Lamatualain Anan, Yesus, dad'i hita agaman malangga monaen mana sia ata' lena'. Huu Ana sia Lamatualain matan sia sorga ena, fo nasala'e nggita. 15 Ana bisa nasala'e nggita noo malole', huu Ana nahine nae, hita ia, atahori. Mete ma hambu ruma kokoe-nanasi' nggita fo tao sala', na, hita tud'a noo mud'a'. Yesus o hambu sosob'a' 'ona' nggita boe, te Ana nda tud'a nita sa. 16 Huu naa, 'ima fo tambarani deka-d'eka too Lamatualain sia kad'era parenda na. Huu Eni ralan malole'. Dad'i mete ma ata hule-o'e neu E, na, dei fo Ana bisa natud'u susue-lalain fo losa fai na naa tulu-fali nggita.