Lamatualain Anan manaseli' lena' ba'i Musa
3
Dad'i ta'o ia, toronoo ngga ra, e! Lamatualain pili nala hei ena, ma cap nggi atahori rala meumare', fo dei fo misod'a mi'ib'ue moo E sia sorga. Huu naa, hei musi du'a lutu'-lelo' so'al Yesus naa. Huu hita tataa ena tae, Eni Lamatualain Ded'enun, ma Eni o hita Agaman Malangga Monaen mana sia ata' boe. 2 Lele' Lamatualain denu Yesus, Ana tao tungga basa Lamatualain hihii-nanau na. Noo ta'o naa, Ana dad'i 'ona' ba'i Musa. Huu ba'i Musa o tao tungga Lamatualain hihii-nanaun boe, lele' ana mete-se'u hita bei-ba'i na ra mia fai dalahulu' a.a3 Mae 'ona' naa o, Yesus manaseli' lena' ba'i Musa. Huu Yesus naa, 'ona' malangga ume-loo. Ma matetun, malangga ume-loo a manaseli' lena' atahori ded'enu' mana sia ume naa rala. 4 Atahori esa-esa' nafefela ume-loo na. Te Lamatualain nafefela basa-b'asa' e. 5 Dad'i ba'i Musa tao tungga Lamatualain hihii-nanaun, lele' ana dad'i ded'enu' mia Lamatualain ume isi na. Huu lele' naa, Ana nafad'e mema' saa fo Lamatualain nae tao' a. 6 Yesus o tao tungga Lamatualain hihii-nanaun boe, te Eni nda atahori ded'enu' 'ona' ba'i Musa sa. Huu Eni ia, Kristus, Lamatualain Anan fo Ana pili nala mema' mia dalahulun, fo nae haitua raefafo' nema. Ma Kristus mete-se'u nahine teb'e-teb'e' Aman ume isi na ra. Dad'i mete ma hita to'u tahere' nemehere ta ra, ma tamahena takandoo neu Kristus, na, hita o bisa dad'i Eni ume isin boe.
'Afi' misid'ea hela nemehere ma ra 'ona' bei-ba'i ma ra, huu ara nda bisa maso' hahae ao na ra sia rae fo Lamatualain helu-fuli' naa sa
7 Huu naa, hei musi pasa ndiki ma ra fo rena malolole saa fo Lamatualain Dula-d'ale Meumaren 'ola' ena nae,
“Fai' ia, mete ma hei rena Lamatualain 'o'olan,
8 ama 'afi' langga fatu,
'ona' atahori naa ra,
mana lao' reu-rema losa too haa nulu sia lenu loa'.
Huu ara nda nau taoafi' neu ba'i Musa sa,
losa Lamatualain nae 'a
nda na'atataa' noo se sa ena.
9-10 Du'a neu' ena!
Too haa nulu Au tao manad'ad'i manaseli' mata'-mata'
sia mata na ra!
Te ara 'aka' sob'a Au rakandoo 'a.
Naa de Au o 'umunasa se 'ae,
‘Hei ia ra, talalu!
Huu hei misid'ea hela Au dala ngga,
de tungga 'a dala mana sala ma ra!’
11 Au nda 'u'utataa' mete hei de'ulaka ma ra 'ona' naa sa ena.
Naeni de Au sumba-ndoon nggi 'ae,
‘Hei nda bole misi' rala mii sa, fo hahae ao ma ra mi'ib'ue moo Au.’”b
12 Dad'i toronoo ngga ra, e! Besa-b'esa fo 'afi' losa hambu mia hei mana tao de'ulaka', losa nda namahere sa ena, boe ma misid'ea hela Lamatualain mana nasod'a nakandoo' a. 13 Malole lena', tungga fai hei esa tao manggatee esa rala na ra. Esa 'afi' nahati esa fai! Huu hei nenepeko-leleko' noo 'a mud'a' fo tao sala', losa hei dad'i langga fatu, ma nda taoafi' neu Lamatualain sa. 14 Hita o bisa ei' esa too Yesus Kristus boe, sad'i hita tamahena takandoo neu E, 'ona' lele' hita fe'e na tamahere neu E ena.
15 Te Lamatualain Dula-d'ale Meumaren o 'ola' ta'o naa nae,
“Fai' ia, mete ma ama rena Lamatualain 'o'olan,
na, ama 'afi' langga fatu, 'ona' atahori naa ra,
mana lao' reu-rema losa too haa nulu sia lenu loa',
huu ara lab'an Musa.”c
16 De ia naa au 'ae 'utane ta'o ia: atahori mana rena ba'i Musa, boe ma rasad'ea hela e, naa ra seka? Seka fai, sira hita bei-ba'i na ra fo Musa mesa' ne noo se lao hela rae Masir. Ara rita manad'ad'i manaseli' mata'-mata' te fe'e langga fatu fai. 17 Boe ma, atahori mana tao Lamatualain namanasa losa too haa nulu na, seka? See fai, mete ma nda hita bei-ba'i ta ra sa na. Huu masod'a na ra raseli-sala' sia lenu-loa', losa ara mate, de ne'oi se sia naa. 18 Boe ma, atahori mana hambu sumba-ndoon mia Lamatualain losa nda bole maso' risi' rae naa sa, fo hahae ao na ra roo E, naa ra seka? See fai, mete ma nda hita bei-ba'i ta ra sa na. Huu ara nda nau rena Lamatualain sa.d 19 Dad'i tahine ena, to! Hita bei-ba'i na ra nda losa rae naa sa, fo hahae ao na ra roo Lamatualain, huu ara nda ramahere neu E sa.