'Afi' nggari hendi Lamatualain dud'ui masoi-masod'a manaselin
2
Huu naa, hita musi to'u tahere' saa fo hita rena so'al Lamatualain Anan ena, fo ata 'afi' lilii' ma lao hela E. 2 Fe'esa'an Lamatualain pake ate na ra mia sorga, fo rafad'e Eni hehelu-fufulin neu bei-ba'i Isra'el ta ra mia lenu loa'. Matetu na, hita bisa tamahere basa hehelu-fufuli' naa ra, huu na teb'e nakandoo 'a. Mete ma ara ralena-langga parendan, na, tantu ara simbo huhuku-d'od'oki' nandaa noo sira tatao na ra. 3 Mema' ma'ahulun ta'o naa. Te ia naa, Lamatualain anan soi dala feu' fo fee masoi-masod'a' neu atahori. Ana nafad'e dala masoi-masod'a manaseli' ia neu atahori na ra, mana mete-se'u eni sia raefao' ia. Basa de ara rafad'e nggita, naa fo ata tamahere. Te mete ma hita nda taomata' neu sa, na, hita soe teb'e ena. 4 Te Lamatualain o fee koasa fo ara tao manad'ad'i manaseli' mata'-mata'. Ana o na'onda' Dula-d'alen neu se, fo ara tao manad'ad'i' laen ra tungga hihii-nanau na boe. Huu basa naa ra, naa de tahine tae, mema' dala masoi-masod'a' naa teb'e.Ta'o bee de Lamatualain Anan naloe aon dad'i atahori?
5 Au 'ola' so'al raefafo mata feu' mana nae nema' a. Te Lamatualain nda nafad'e nita ate mana sia sorga na ra sa nae, dei fo sira mana mete-se'u raefafo' ia. Huu dei fo atahori mana mete-se'u. 6 Sia Lamatualain Susura Meumaren, Ba'i Daud natane nita so'al atahori felin nae,
“Lamatualain!
Ta'o bee de Lamatualain tao mata' neu atahori?
Ta'o bee de Lamatualain sue se?
Te sira 'aka' atahori 'a!
7 Ma Lamatualain fee se koasa,
fo ara dad'i 'ona' ate mana sia sorga.
Lamatualain o fee had'a-hormat neu se,
ma so'u se boe,
8 fo ara parenda basa saa fo Lamatualain tao' ra ena.”a
Dad'i tungga ba'i Daud susuran, Lamatualain tao atahori dad'i malangga, fo ara mete-se'u basa saa fo tao Ana nala' ra. Tao-tao te nda fe'e tahine tita atahori esa fo mana parenda basa-b'asa' e ta'o naa sa.
9 Te hambu Esa bisa parenda nala' basa-b'asa' e. Eni, naeni Yesus. Ana nema leo losa 'a sia raefafo', fo dad'i atahori mana lemba doid'oso' losa mate. Ana mate 'ona' naa, fo natud'u Lamatualain rala malolen neu atahori. Basa naa ma, Lamatualain koa E ma so'u nanaru E, fo parenda basa saa fo Lamatualain tao nala' ra. 10 Dad'i nandaa Lamatualain fee Yesus lemba doid'oso', naa fo Yesus soi dala masod'a' fee atahori. Huu Lamatualain nau fo atahori hetar rasod'a ra'ab'ue roo E sia sorga boe. Te Lamatualain mana tao basa-b'asa' e. Ma basa mana masod'a' ra sia, huu Eni.
11 Dei fo Lamatualain simbo noo malole' atahori fo Yesus tao nameu' ra, fo ara dad'i Lamatualain ana na ra. Lamatualain naa, Yesus Ama na. Noo ta'o naa, Yesus noo se Ama' esa. Naa de Yesus nda mae no'e se nae,
“Hei ia, Au toronoo heheli ngga ra.”
12 Huu Yesus nafad'e Aman ena nae,
“Au 'ae 'ufad'e toronoo ngga ra,
so'al Ama' malolen!
Au 'ae sod'a koa-kio sia talad'a na ra,
so'al Ama' manaselin!”b
13 Yesus o 'ola' nakandoo nae,
“Au 'umuhere 'ukundoo neu Lamatualain.”
Basa de Yesus 'ola' fai nae,
“Mete dei! Au sia ia sie,
'u'ub'ue 'oo Lamatualain ana na ra,
fo Ana fee neu Au ena, fo Au mete se'u se.”c
14 Huu Lamatualain ana na ra naa, atahori biasa, naeni de Yesus o musi dad'i atahori 'ona' se boe. Huu Ana musi dad'i atahori dei, dei fo Ana fe'e bisa mate ena na. Tungga Eni mamaten naa, dei fo Ana bisa neu rambas koasa mia nitu ra malangga na. Te malangga de'ulaka' naa, mana to'u koasa fo mete-se'u neu dala-d'ala mana nenefutu-pa'a' noo mamates a. 15 Ana o tao atahori ramatau mamates rakandoo 'a, losa ara tungga hihii-nanaun, 'ona' ate boe. Te ia naa, Yesus bisa mbo'i atahori mia nemetau na ra ena. 16 Huu matetu na, Yesus nda nema fo tulu-fali Lamatualain ate na ra mana sia sorga sa. Te nema fo tulu-fali nggita, naeni ba'i Abraham tititi-nonosi na ra ia. 17 Huu naa, Yesus dad'i 'ona' hita, mana dad'i Eni toronoo na ra ena. Noo ta'o naa, Ana bisa dad'i hita agaman malangga monaen, fo tulu-fali hita tungga Lamatualain hihii-nanau na. Ana natud'u rala susuen neu nggita. Ma Ana 'ola' saa, na, Ana tao tungga.
Fai dalahulun, hita bei-ba'i na ra ro'e agama Yahud'i malangga monaen tao tutunu-hohotu', fo Lamatualain 'ose hendi sala-singgo na ra. Te 'ale' ia, Yesus mesa' ne dad'i tutunu-hohotu' fo Lamatualain 'ose hendi sala-kilu ta ra. 18 Lele' Yesus nasod'a mia raefafo' ia, Ana doid'oso naen seli. Hambu ruma kokoe E, fo Ana tao sala'. 'Ona' naa o, Ana nda tungga sa. Huu naa, mete ma hambu ruma kokoe-nanasi' nggita fo tao sala', na, Yesus bisa tulun nggita fo ata nda tud'a sa.