3 Ina-ina lasi' ra 'ona' naa boe. Mufad'e se fo ranea ralolole tetende-nemberii na ra, ma rasod'a tungga 'a Lamatualain hihii-nanau na. 'Afi' 'ola' ra'amuti atahori nara na ra. 'Afi' hengge ao na ra neu sopi-ralu. Te musi ranori atahori ra fo rasod'a noo malole'. 4 Noo ta'o naa, ranori ma ratud'u dala malole' fee ina-ina soru' ra, fo ara sue sao-ana na ra boe. 5 Ara musi ranori se fo rasod'a noo matu-matu, 'afi' tao leli, ralalau rahine ume na ra noo malole', fee had'at neu sao na ra, ma fee sao na ra dad'i malangga ume-loo na ra. Mete ma rasod'a 'ona' naa, na, nda hambu atahori 'ola' ra'atutud'a' Lamatualain Ded'ea-'o'olan sa.

6 'Ona' naa boe, munori mone-tena' ra, fo rasod'a noo matu-matu boe.

7 Titus! Musi musod'a malolole, fo dad'i dala malole' soa' neu atahori fea' ra boe. Tao saa, na, musi tao noo ndoo-tetu', tungga nenorim neu atahori ra. 'Afi' mu'umimina' moo ue-tatao ma ra. 8 Munori atahori, na, musi munori mendi' netehuu manggatee', fo atahori nda hambu dala' fo 'ola' ra'atutud'a' nggo sa. Noo ta'o naa, atahori mana lab'an hita' ra mae reu' ena, huu nda ra'ena netehuu' fo lab'an hita sa.

9 Munori ate ra, fo rena neu malangga na ra sia sud'i 'a dala' bee, ma tao nemeho'o malangga ra. 'Afi' rareresi roo malangga na ra boe. 10 'Afi ramana'o malangga na ra sud'i 'a saa na ra. Musi ratud'u fo malangga na ra bisa ramahere se noo teb'e-teb'e'. Sira musi dad'i atahori malole' ma ra'atataa'. Mete ma atahori dea' ra ra'asasama' ate ra masod'a na ra 'ona' naa roo basa hita tanori' ra, na, ara du'a rae, nenori' so'al Lamatualain, mana fee masoi-masod'a' neu nggita, naa manaseli'.

11 Lamatualain natud'u rala malolen neu basa atahori, ma soi dala masod'a' soa' neu atahori sala-kilu na ra. 12 Huu naa de, hita musi nggari hendi masod'a nda matetu' sa, ma basa hihii-nanau de'ulaka' ra. Tasod'a sia raefafo' ia, musi ta'atataa' tala ao ta ra, tasod'a meumare', ma tungga Lamatualain losa bab'asa na. 13 'Ale' ia tamahena neu Yesus Kristus neneman noo mandela-masa'an! Naa dad'i papala-b'ab'anggi' neu basa nggita. Eni, hita Lamatua manaselin, fo mana fee nggita masoi-masod'a'. 14 Ana fee aon dad'i tutunu-hohotu' fo mbo'i hendi hita mia basa sala-kilu ta ra, fo tao nggita dad'i atahorin mana nasod'a noo rala meumare', ma mana hii tao 'a malole' ra boe.^a

15 De Titus, munori basa ia ra neu jama'at ra. Huhuar se fo ara tungga basa nenori' ia ra. Seka tao sala', na, mutud'u dala malole' neu se. Atahori nda bole raloe-rad'ae nggo, huu mu'ena hak tao basa naa ra.