2 Timotius
Paulus susura karuan
fee neu nonoon Timotius
Sod'a-mole'
1
1-2 Timotius nenesue'!Susura ia mia au, Paulus, fo Lamatualain pili nala dad'i Yesus Kristus ded'enu na. Ara denu au 'ufad'e masod'a ndoo-tetu' a, fo Lamatualain helu-fuli fee neu basa atahori mana ramahere neu Yesus Kristus.
Timotius! Ho 'ona' ana ngga ena. Dad'i au hule-o'e fo hita Aman Lamatualain noo hita Malanggan Yesus Kristus, sue nggo, ratud'u rala malole na ra neu nggo, ma fee nggo musod'a noo mole-d'ame.a
Paulus no'e makasi neu Lamatualain
3 Hatu'-rerelon, au hule-o'e fee nggo. Au 'o'e makasi neu Lamatualain 'ukundondoo' a, huu ho tungga mukondoo' a neu E. Au mete-se'u E noo rala meumare', 'ona' hita bei-ba'i na ra mete-se'u E boe. 4 Au 'usuned'a lele' hita saranggaa, ho luu ma ra tud'a. Naa de au 'ae' a doo bee fo 'undaa 'oo nggo, fo rala ngga namaho'o.
5 Au o 'usuned'a lele' ho mulai mumuhere teb'e-teb'e' neu Lamatua' Yesus. Nemehere' mata' naa, na'oka mema' sia beim Luisa, ma inam Yunike rala na ra ena. Ma au o 'umehere 'ae, nemehere' mata' naa mori sia ralam boe.b
Paulus no'e Timotius pake papala-b'ab'anggi' fo Lamatualain fee' ra
6 Fe'esa'an, lele' au ndae lima ngga neu langgam, ma hule-o'e fee nggo, lele' naa Lamatualain tao nggo fo bisa ue-tao fee Ne. Dad'i ia naa, au 'o'e fo mumbila' bali' papala-b'ab'anggi' naa ra. 7 Te Lamatualain Dula-d'alen nda tao hita dad'i atahori mamataus sa. Te Ana tao hita dad'i atahori ma'ad'ere' ma tamahena ao', mana sue-lai', noo tahine tauli ao ta ra noo malole'. 8 Dad'i 'afi' mae 'ola' so'al hita Malanggan mana na'ena hak fo parenda nggita. Ma 'afi' mae huu au ia atahori bui. Au sia bui rala ia, huu au mete-se'u E. Naa! Mete ma muu mufad'e Hara-lii Malolen, ho musi muhehere fo lemba sususa' 'ona' hai boe. Mete ma hambu sususa' 'ona' naa, dei fo Lamatualain tao ma'ad'ere nggo.
9-10 Huu Lamatualain mana soi-tefa hita mia sala ta ra.
Ma Ana here nala nggita dad'i atahori meumare na.
Ana natud'u rala malolen neu nggita, huu Ana sue nggita.
Matetun, hita nda tao saa sa boe fo tao nggita tandaa simbo rala malole na.
Lamatualain nda fe'e tao raefafo' ia sa, te Ana na'etu' haitua Yesus Kristus nema,
fo natud'u rala malolen, ma fee masoi-masod'a' neu nggita.
Ia naa Yesus Kristus nema ena, ma tao natetu Lamatualain ne'etu na.
Boe ma Ana tao nalutu mamates koasan!
Ia dad'i Hara-lii Malole'!
De seka namahere Yesus Kristus, na, nda mate sa ena, te nasod'a nakandoo noo Lamatualain.
11 Naa de Lamatualain so'u au dad'i Yesus Kristus ded'enun, fo 'ufad'e Hara-lii Malolen, ma 'unori atahori sia bee-b'ee.c 12 Basa naa ra tao au doid'oso sia bui ia. Te au nda mae sa! Huu au bub'ulu' see fo au 'umuhere' a, naeni Lamatua' Yesus. Au o bub'ulu' teb'e 'ae, Eni mana tao ue-tataos ia neu lima ngga, de nanea ue-tataos ia, ma tao au bisa 'ulalao ue-tataos ia losa Ana bali' nema. 13 Dad'i tungga dala masod'a' mia nenori matetu', fo au 'utud'u basa neu nggo' a. Mete ma mumuhere mukundoo, ma sue basa atahori ta'o naa, na, naa natud'u 'oi, ho dad'i esa moo Yesus Kristus ena. 14 Lamatualain tao su'i mafelit esa sia limam, naeni nenori matetu'. De mu'ub'oi malolole su'it naa, o! Mo'e Dula-d'ale Meumare' mana sia hita rala ta ra, fo Ana tulun na'ab'oi su'it naa noo malolole.
Onesiforus tulu-fali Paulus sia bui
15 Ne'o ho rena ena 'oi, Figelus noo Hermogenes, ma atahori laen mia profinsi Asiad ra rasad'ea lao hela au ena. 16-18 Te Onesiforus manafea'. Ana nda dinggo' hela au sa. Ho bub'ulu', to, fe'esa'an lele' au fe'e sia kota Efesus, ana tulu-fali au nakandoo 'a. Ia naa ana leo sia kota Roma ia ena. Lele' ana losa, ana sangga au sud'i 'a sia bee-b'ee. Basa dei de ana hambu au mia bui a. Te ana nda mae sa. Ana 'aka' nema se'u au nakandoo 'a sia bui ia, fo tao manggatee rala ngga.
Dad'i au hule-o'e fo Lamatualain natud'u rala malolen neu Onesiforus noo ume-isi na ra. Neu fai mate'en, mete ma Lamatualain na'etu' atahori ra ded'ean, na, au 'umuhena fo Lamatualain na'etu' noo malole' fee neu Onesiforus se.