Atahori sarani' ra masod'a ndoo-tetu na ra
3
Fee nesenened'a' neu jama'at ra, fo rena mana parenda ma mana to'u koasa ra. Ma ara musi tao tungga atoran ma sad'ia tao malole' rakandoo 'a. 2 'Afi' rendi-rendi' ded'eat fo ra'amuti-ra'amuu atahori nara malole na ra. Ara o 'afi' hii rareresi. Malole lena' rasod'a malolole roo basa atahori ra.3 Ma'ahulun, lele' hita nda fe'e tahine Lamatua' Yesus sa, nda tahine saa-saa sa boe, ma ata nenetipu' noo mud'a'. Hita nda nau rena atahori laen sa. Tasod'a tungga 'a rala de'ulaka ta ra, de ta'asususa' ao ta ra noo nasab'orii' mata'-mata'. Hita nda malole' too atahori sa ma masod'a ta ra sofe' noo 'a dale-leli' ra. Hii 'a tambed'a' rala', ma atahori o rambed'a' rala' roo nggita boe.
4 'Ona' mae masod'a ta ra rambalutu ena o, Lamatualain mana fee nggita masoi-masod'a' a, natud'u susuen, ma rala malolen neu nggita ena. 5 Ana fee masoi-masod'a' neu nggita, nda huu hita tatao malolen sa, te huu susuen neu nggita. Ana nameu sala-kilu ta ra, nendi' Dula-d'ale Meumaren, tao nafeu masod'a ta ra, 'ona' hita neneb'onggi bali'. 6 Huu Yesus Kristus mate, fo sala-kilu ta ra nenefee ambon, ma hambu masoi-masod'a' boe, naa de Lamatualain na'onda' Dula-d'ale Meumaren nema hita nda neme'etu' sa. 7 Huu Yesus rala malolen, de Ana tao nalole bali' hita leleo-lalaon too Lamatualain, 'ona' ama' noo ana'. De ata bub'ulu' tae, dei fo masod'a ta ra nda nama'etu noo E sa. Naa, dad'i hata-heto ta ra! 8 Au 'ola' ia, mema' teb'e ta'o naa.
Saa fo au 'unori' ia, na'ena ngguna fee basa atahori ra. De musi muu huhuar atahori fo ara tungga nenori' naa ra noo teb'e-teb'e'. Basa atahori mana ramahere neu Lamatualain musi sangga' dala' fo tao 'a malole' ra. 9 'Afi' soro-d'od'od'o moo ded'ea 'ombo-koson ra, 'ona' nereresi ded'ea nda ma huu-pata' ra sa, 'afi' muu mutofa moo atahori, mireresi seka tititi-nonosin manaseli' lena', ma mitofa so'al hohoro-lalane 'ad'at Yahud'i ra. Soa' neu saa? Basa naa ra nda ra'ena ngguna saa sa boe. Ngganggari' a fai! 10 Muu munori atahori mana hii 'a tao jama'at ra sea-saranggaa. Mete ma ana fe'e tao ta'o naa, 'ai e noo deres. Mete ma ana fe'e tao selu' ta'o naa, naa sud'i boe rena e fai. 11 Atahori mata' naa, dud'u'an nda ndoo-tetu' sa ena. Tatao-nono'in mana natud'u sala na ra neu basa atahori.
Paulus nate'e susuran
12 Au 'ae denu Artemas do Tikikus, neti nandaa noo nggo sia pulu Kreta. Mete ma ana losa, na, 'uma lai-lai mundaa moo au sia kota Nikopolis. Te fula-fai ma'asufu' ia, au hii 'ae leo sia naa.a 13 Muhine mana nahine so'al hohoro-lalane' naran Senas, ma nonoon Apolos, to! Ara rae reu sia mamana doo-d'oo'. De tulu-fali mala se fo ara 'afi' to'a-taa saa-saa sia dala' boe.b 14 Atahori mana tungga Lamatua' Yesus 'afi' 'endo' lipa lima'. Ara musi ranori tao malole' ma tulu-fali atahori mana to'a-taa' ra. Noo ta'o naa, masod'a na ra ra'ena ngguna.
15 Basa hai mana sia ia ra haitua sod'a-mole' fee nggo, Titus, ma fee neu hita toronoo mana ramahere neu Lamatua' Yesus boe.
Au hule-o'e fo Lamatualain natud'u rala malolen neu basa nggi.
Ba'u 'a naa ena,
Paulus