Susura ia mia au, Paulus, Lamatualain aten, noo Yesus Kristus ded'enu na. Ana denu au tao manggatetee atahori fo pili nala' ra nemehere na ra. Ana o denu au 'utud'u dala ndoos, fo rasod'a tungga Lamatualain hihii-nanau na. Noo ta'o naa, Lamatualain atahori na ra ramahena rae dei fo rasod'a ra'ab'ue rakandoo roo E. Lamatualain nda fe'e na'ad'ad'ad'i' raefafo' ia sa, te Ana helu mema' nae, dei fo atahori na ra rasod'a rakandoo roo E. Mema' Ana nda mana peko-leleko' sa. Nandaa noo fain ma, Lamatualain natud'u relo-relo nae, Eni fee atahori rasod'a mia sala-kilu na ra, fo rasod'a rakandoo roo Eni. Basa ma Ana parenda au 'uu dui-b'engga Hara-lii Malolen neu basa atahori sia bee-b'ee.

Titus! Ho 'ona' ana ngga ena, huu ru'a nggita tamahere bela' neu Kristus. Dad'i au hule-o'e neu Ama' Lamatualain, noo Yesus Kristus mana fee masoi-masod'a' neu nggita, fo ratud'u rala malole na ra neu nggo, fo musod'a noo mole-d'ame.^a

5 Fai ma'ahulun, au 'u'etu' lao hela nggo sia pulu Kreta, fo tao mulolole dala' hira fe'e parluu sia naa. Ma so'u atahori mana nandaa nuni jama'at sia tungga-tungga kota ra. 'Afi' lilii' hohoro-lalane' fo au 'ufad'e neu nggo so'al atahori mana nandaa nuni jama'at ra, 'ae: 6 mete ma mae so'u atahori dad'i mananuni jama'at, na, masod'an 'afi' hambu sala-kilu' saa-saa boe. Musi nasod'a noo 'a saon esa 'a. Ana na ra o ramahere neu Yesus Kristus. 'Afi' losa atahori rae, ana na ra hii 'a tao hal, ma balab'an. 7 Huu mananuni jama'at ra, ralalao Lamatualain ue-tataon, dad'i ara musi rasod'a ndoo-tetu' ma manara malole'. 'Afi' so'u atahori mana koao'; ma nasa na ra seli, fo hii 'a nasa-nasa'; mana ninu mafu'; mana matofa-mau'; mana hii 'a doi'. 8 Atahori mananuni jama'at ra musi hii simbo atahori sia ume na ra noo lima rua'. Ara musi hii 'a malole'; musi mana matu-matu', tungga 'a ndoon, rala meumare', ma mana ma'atataa' rala ao na ra. 9 Ara musi to'u rahere' Lamatualain Ded'ea-'o'olan, fo fe'esa'an hita tanori neu se ena. Noo naa, ara ratud'u Lamatualain dala ndoo-tetun neu atahori, ma tao ratetu nenori' fo nda matetu' ra sa.^b

10 Huu atahori hetar hii 'a lab'an nenori ndoo-tetu' a, dad'i ded'ea-'o'ola na ra nda ra'ena huu-pata' sa, ma hii 'a pepeko-leleko'. Lelenan te atahori Yahud'i mana rae basa atahori mana nau hambu masoi-masod'a' musi sunat. 11 Noo sira nenori nda matetun sa, lea rala bob'onggi' ruma ra'ad'oo' mia Lamatualain nenori ndoo-tetu na. Ara sangga doi' noo 'a pepeko-leleko na ra! 'Ai atahori mata' naa ra, fo ara sud'i ranori rakandoo nda matetu' ra sa. 12 Lao esa, mana mahine dui fini na ra esa mia pulu Kreta dui so'al eni atahori na ra nae,

13 Mema' atahori naa ra 'ona' naa! De musi muu moo bali' atahori mana nenelaka-hese' ra, fo tao manggatee bali' nemehere na ra neu Lamatualain. 14 Fo ara sud'i boe rena atahori Yahud'i ra dud'ui lasi leleko na ra, ma musi raloe' tungga parenda' mia atahori nda mana simbo nenori ndoo-tetu' a sa.

15 Musuned'a malolole! Soa' neu atahori rala meumare', basa' e meumare'. Te soa' neu atahori rala de'ulaka', ma nda ramahere neu Lamatualain sa, nda hambu dala meumare' esa sa boe. Huu rala-d'ud'u'a na ra mema' de'ulaka ena. 16 Ara rataa rae sira rahine Lamatualain. Te masod'a na ra, 'ona' nda rahine E sa. Ara 'ola' laen, te tao laen. Mema' atahori de'ulaka'! Ara nda nau tungga Lamatualain hihii-nanaun sa. 'Afi' mimihena mae atahori mata' naa ra tao malole'.