Muu dui-b'engga Lamatualain Ded'ea-'o'ola na
4
1-2 Dei fo Yesus Kristus bali' raefafo' nema fo to'u parenda' 'ona' mane'. Mae atahori fe'e masod'a', do atahori mates ra, ara reu randaa roo E, fo Ana na'etu' ded'ea na ra. Huu naa, sia Lamatualain noo Yesus Kristus mata na ra, au 'o'e teb'e-teb'e' neu nggo fo muu dui-b'engga Lamatualain Ded'ea-'o'ola na. Muhehere mukundoo' a! 'Afi' du'a fain malole', do hoko'. Mufad'e atahori ra sala na ra. Te 'ai se noo malolole ma mu'utataa' moo se. Tao ma'ad'ere rala na ra mendi' nenori ndoo-tetu' a.3 Neu fai' sa te, atahori nda nau rena nenori ndoo-tetu' a sa ena. Ara ra'ab'ue rala meser-meser mana 'ola' tungga hihii na ra, fo tao nemeho'o 'a rala na ra. 4 Ara sena ndiki na ra nda hii rena nenori ndoo-tetu' sa. Te ara pasa ndiki na ra neu dud'ui raefafo' mana 'ombo-koson ra!
5 Mae ta'o bee o, ho musi sub'a-sub'a' a. Mu'utataa' sia doid'oso'. Muu dui-b'engga Hara-lii Malole' fo atahori simbo Yesus Kristus. Tao mata' neu atahori noo rala nemeho'o' losa basa ue-tataos ra. 'Afi' noo rala seseri'.
6 'Afi' dud'u'a au, te fai mamate ngga nda doo' sa ena. 'Ona' nggalaas, isin nae 'a basa ena.a 7 Te au tungga nesesenggi' noo malole'. Au 'ela' losa nggaris mate'en ena. Au tungga 'ukundoo Yesus Kristus, nda dinggo 'isi' bee-b'ee sa boe. 8 Ia naa, au 'uhani dala' esa 'a. Naeni, beker sesenggi' fo hita Malanggan mbed'a' hela fee neu basa atahori mana masod'a ndoos ra. Hita malanggan, naeni mana na'etu' noo matetu'. Ana nda mbee seseri' sa. Dei fo nandaa noo fain, Ana fee au beker sesenggi' a. Nda 'aka' au sa. Basa atahori mana sue E, ma mana rahani neneman, ara o hambu beker 'ona' naa boe!
Paulus helu-fuli dala' mata'-mata'
9 Tius, e! 'Uma lai-lai se'u au dei! 10 Te 'ale' ia au mesa' nggo. Krekes lao profinsi Galatia neu ena. Ma Titus lao neu sia nusa Dalmatia. Demas sue lena' dala-d'ala nda matetu' sia raefafo' ia, de ana lao hela au ena, neu sia kota Tesalonika.b 11 'aka' Lukas leo noo au sia ia. Sangga mala Markus fo ama 'ima mimilolo'. Huu, ana bisa tulu-fali au mata'-mata' sia ia.c 12 Au denu Tikikus nisi' kota Efesus ena.d 13 Mete ma 'uma, na, 'afi' lilii' mendi au bad'u fau ngga fo au lao hela' a sia Karpus umen sia kota Troas. Boe ma 'afi' lilii' mendi au susura ngga ra, lelenan fo manasura' sia banda rou' a.e
14 Aleksander, mana tutu riti a, tao de'ulaka' nda mbembei' a sa neu au ena. Hela neu leo, te dei fo Lamatualain mana bala-b'ae e, 'ona' tataon naa.f 15 Ho musi besa-b'esa moo atahori naa, huu ana hii 'a lab'an hita 'o'ola na.
16 Lele' au 'umburii' fefeun mia mana nggero-furi' a matan fo 'usula'e ded'ea ngga, nda hambu atahori esa na'ab'ue noo au sa boe. Basa se lao hela au mesa' nggo. Hela neu leo! Hela fo Lamatualain lilii' hendi sala na ra. 17 Mae 'ona' naa o, Lamatualain nda lao hela au sa. Ana tao ma'ad'ere au, fo au dui-b'engga Hara-lii Malolen nda 'ukura' saa sa boe. Au dui-b'engga ta'o naa neu basa atahori nda Yahud'i ra sa, fo ara rena Hara-lii Malole' naa. Ma au o nenembo'it mia de'ulaka monae'. 18 Ma dei fo Lamatualain mbo'i hendi au mia de'ulaka' ra. Ma Ana nendi au noo masoi-masod'a', 'isi' sorga 'uu. Ana to'u parenda' sia naa.
Lamatualain naa, koasan manaseli' teb'e! Au koa-kio so'u 'unanaru E nda neme'etu' sa! Amin.
Paulus sura' nate'e susuran
19 'Afi' lilii' fee sod'a-mole' neu 'a'a Priskila,g noo saon, 'a'a Akila. 'Ona' naa boe Onesiforus noo basa ume-isi na ra.h 20 Erastus leo sia kota Korintus. Fe'esa'an, au lao hela Trofimus sia kota Miletus, te lele' naa ana namahed'i nae'.i 21 Sangga dala' fo fai ma'asufu' nda fe'e losa sa, te ho losa ia ena. Nonoo ta ra sia ia naeni: Eb'ulus, Pud'es, Linus noo susi Klaud'ia haitua sod'a-mole' fee nggi. 'Ona' naa boe toronoo sarani' laen ra.
22 Au 'umuhena Lamatualain noo nggo nakandoo 'a, ma natud'u rala malolen neu basa nggi.
Ba'u a naa ena.
Paulus