Atahori tatao-nono'i de'ulaka na ra sia fai matete'en
3
Timotius! Deka-d'eka raefafo' fai matete'en, sususa' naen seli. Au 'ufad'e mema' nggo ta'o naa. 2 Neu fai' naa, atahori ra sue' a ao na ra ma dale 'a doi'. Ara koa ao na ra, ma raloe-rad'ae atahori laen ra. Ara ra'amuti', nda nau rena atahori lasi' sa, nda hii ro'e makasi sa, nda nenenenori' sa, nda hii dala-d'ala rohani sa, 3 nda sue atahori sa, nda nau bad'ame sa, hii 'a ra'amuti atahori nara malole na ra, nda ra'atataa' rala ao na ra sa, de'ulaka manaseli' ma nda hii dala malole' sa, 4 Ara hii 'a seo nonoo na ra, nda dud'u'a naru' sa, tao ao na ra 'ona' mahine' ra, hii 'a tungga hihii-nanau na ra lena' tungga Lamatualain hihii-nanau na. 5 Ara tao ao na ra 'ona' atahori mana tungga Lamatualain, tao-tao te hoko'. Lamatualain koasan nese rala na ra. 'Afi' deka-d'eka' moo atahori mata' naa ra!6 Atahori mata' naa ra maso' noo mata meulau na ra sia atahori umen, fo fufud'i ina' rala rofot mana tud'a mud'a' noo sosob'a-dod'ou' a. Ina' naa ra rasod'a noo lemba sala-kilu' ma'aunu', ma tungga hihii-nanau ao-sisi' mata'-mata'. 7 Ara rena meser feu' sa nema nanori nenori feu', na, ara tungga-tungga 'a. Te huu ara nda fe'e rahine bee matetu' ma bee sala sa. 8 Musuned'a Yanes noo Yamres dud'ui na ra, to?a Lele' naa, ru'a se lab'an roo ba'i Musa. Meser 'ale' ia ra, tao ta'o naa boe. Ara lab'an nenori ndoo-tetu' a. Dud'u'a na ra rambalutu ena, huu nemehere na ra nda matetu' sa. 9 Meser mana pepeko-leleko' mata' naa ra nda ra'atataa' doo' sa. Doo-d'oo te basa atahori rahine nggoa na ra. 'Ona' fe'esa'an atahori rahine Yanes noo Yamres pepeko-leleko na ra.
To'u muhere' nenori' fo ho simbo' a
10 Tius! Ho bub'ulu' basa au masod'a ngga ena. Muhine basa saa fo au 'unori' ra. Ma muhine dala masod'a ngga. Muhine au dud'u'a ngga. Muhine saa fo au 'umuhere' a. Mita au ne'etataa ngga neu atahori, ma susue ngga neu se. Ma mita au 'u'utataa' ta'o bee sia doid'oso ngga. 11 Ho o bub'ulu' ara filo ra'amimina' au, losa au lemba doid'oso' mata'-mata'. Au hambu doid'oso' 'ona' naa mia kota Antiokia, Ikonium, ma Listra. Te Lamatualain mbo'i hendi au mia basa naa ra.b 12 Mema', basa atahori mana ramahere neu Yesus Kristus, ma nau rasod'a meumare' tungga Lamatualain hihii-nanaun, dei fo atahori tao doid'oso se. 13 Lelenan fai, atahori de'ulaka' noo mana peko-leleko' ra boe de'ulaka rakandoo. Ara peko-leleko ra'atutud'a' atahori laen, tao-tao te sira o nenepeko-leleko' boe.
14 Te ho musi to'u muhere' nenori' fo ho simbo' a. Ma tungga mukundoo saa fo mumuhere' naa, huu naa matetu'! Ho bub'ulu' teb'e seka nanori basa naa ra neu nggo, to? Ho bisa mumuhere neu se boe!c 15 Eni' a mia 'a'anam, munori Susura Meumare' isin ena. Susura naa ra ratud'u dala masod'a'. De mete ma mumuhere Yesus Kristus, naa soi dala' fo musod'a mu'ub'ue moo Lamatualain sia sorga. 16 Basa mana sura' sia Susura Meumare' a rala, mema' Lamatualain mesa' ne mana fee neu atahori mana sura' ra. Susura naa nggunan, naeni: nenori atahori dala ndoo-tetu', natud'u atahori sala na ra, nore bali' atahori risi' dala matetu' a, ma netud'u atahori rasod'a fais-fais a tungga Lamatualain hihii-nanau na. 17 Noo ta'o naa, Susura Meumare' naa, tao ma'ad'ere Lamatua' atahori na ra fo ara bisa tao basa ue-tatao malole' ra.