Sod'a-mole' mia au, Paulus. Lamatualain so'u au dad'i Yesus Kristus ded'enu na. Hita tamahena neu Lamatua' Yesus, mana fee nggita tasod'a takandoo too E, huu Lamatualain fee hita tasod'a mia basa sala ta ra.

Tius! Ho 'ona' au ana ngga ena, huu au mana 'utud'u dala' de mumuhere neu Kristus. Au hule-o'e fo Lamatualain, hita Aman, noo Yesus Kristus, hita Malanggan, ratud'u rala malole na ra noo susue-lalai na ra, ma fee nggo musod'a noo mole-d'ame.^a

3 Fe'esa'an, ru'a nggita ta'ab'ue mia kota Efesus. Lele' au 'ae 'uu sia profinsi Maked'onia, au huhuar nggo fo muhani sia Efesus. Te lele' naa, hambu atahori ra tao atahori sarani' ra bingun noo nenori' nda matetu' sa. Dad'i au 'o'e muu 'ai se, fo ara 'afi' ranori rakandoo ta'o naa. 4 Atahori ra o ngganggari fai parsuma 'a reu dui-b'engga dud'ui pepeko-leleko' fai ma'ahulun, boe ma rareresi so'al dui-b'aes rakandoo 'a. Ded'e'at naa ra tao 'a atahori ra ratofa ma rasod'a nda ramahere Lamatualain sa.

5 Au 'unori nggo ia, naa fo munori atahori mamahere' ra fo rasod'a noo susue' mia rala meumare', dud'u'a ndoo-tetu', ma nemehere' teb'e-teb'e'.

6 Te meser ruma ra'ad'od'oo' ma nggari hendi nenori' naa. Boe ma ara reu ngganggari fai a noo 'a nereresit ma 'ola' baro-leli. 7 Ara ratud'u ao na ra rae, sira, meser mana ranori ba'i Musa hohoro-lalane na ra. Ara koa ao na ra rae sira meser monae' ra, te nda rahine saa fo ranori' naa ra sa boe.

8 Basa hita bub'ulu' tae, basa ba'i Musa hohoro-lalane na ra, malole'! Sad'i hita pake se tungga Lamatualain masud na noo matetu'. 9 Hohoro-lalane' naa ra, nda nenesura' fee atahori mana rasod'a noo ndoo-tetu' sa. Te nenesura' fee neu atahori mana mamue', nda mana rena parenda' sa, rasod'a ra'ad'od'oo' roo Lamatualain, hii 'a tao de'ulaka', nda taoafi' neu Lamatualain sa, mana raloe-rad'ae dala meumare' a, mana risa atahori, ma mana risa ama-ina na ra boe. 10 Hohoro-lalane' naa ra o nenesura' fee neu atahori mana hohongge', tou' sao tou', mana lea rendi atahori fo ro'e doi sosoi', mana pepeko-leleko', sakasii 'ombo-koson, ma fee basa atahori ralena-langga neu nenori ndoo-tetu' a. 11 Nenori ndoo-tetu' naa ra, lao' mia Lamatualain Hara-lii Malolen, fo Ana fee neu au 'a. Lamatualain naa, mandete-masa'a', de atahori so'u rananaru E o, nandaa.

12 Au 'o'e makasi nae-nae neu hita Malanggan Yesus Kristus huu Ana namahere au, ma tao au bisa 'ulalao ue-tatao na. 13-14 Fe'esa'an, au hii 'a 'ola' 'u'umuti fo 'u'ututud'a' Yesus naran, ma tao doid'oso atahori mana tungga dala masod'a na. Au hii 'a tuni-ndeni 'ulutu se. Au de'ulaka ngga ta'o naa, huu lele' naa, au nda 'uhine saa fo au tao' naa sa, ma nda fe'e 'umuhere hita Malanggan Yesus Kristus sa. Huu au nda 'uhine saa fo au tao' naa sa, dad'i Ana nda lilii' au sa. Ma Ana o natud'u susuen neu au.^b Lena' fai, natud'u rala malolen neu au nakandoo 'a! Ana mbori-mbo'a papala-b'ab'anggi' fee au, fo 'umuhere 'uhere' neu E, ma sue atahori ra 'ona' Ana sue au boe.

15 Hita o rena-rena' 'oi, “Yesus Kristus nema sia raefafo' ia, fo fee masoi-masod'a' neu atahori mana tao sala' ra.” Mema' teb'e ta'o naa! Mia basa atahori mana tao sala' ra, au ia de'ulaka ngga naseli'. 16 Mae de'ulaka ngga 'ona' naa o, Lamatualain na'etu' nala nae nda huku-d'oki au sa. Ana nau pake au dad'i conto fo 'utud'u Yesus Kristus rala loan neu atahori de'ulaka manaseli' 'ona' au ia. Noo ta'o naa, atahori fea' mana tao sala' ra ramahere neu E, fo ara o rasod'a rakandoo roo E.

18 Ana ngga Timotius, nenesue'! Au 'ae 'ufad'e nggo, saa fo ho musi tao sia ue-tatao ma ra. Basa ia ra, tungga saa fo Lamatualain mana 'ola-'ola na ra 'ola' mema' so'al ue-tataom. Mete ma ho tungga ded'ea-'o'ola' naa ra noo matetu', na, ho 'ona' sold'ad'u esa, natati nahine, lab'an de'ulaka' ra. 19 To'u muhere' nemeherem neu Kristus. Ma munea fo ralam meu' nakandoo 'a. Huu hambu atahori nda nau rena sira rala dud'u'a na ra sa. Naa tao sira nemehere na ra rambalutu, 'ona' 'ofa' sae nala fatu mbia'. 20 Himeneus noo Aleksander, 'ona' naa boe! Naa de, au hela fee se reu nitur malanggan nauli se. Au tao ta'o naa, fo dad'i nenori' sa, fo ara 'afi' tao ralutu Lamatualain naran fai.