Hita mana tungga Kristus, musi tasod'a 'ona' sold'ad'u mana tungga nakandoo malanggan
2
Timotius ana susue ngga, e! Yesus Kristus naa, rala malole'. Ia naa dad'i esa moo E ena, ma Ana o nae tao ma'ad'ere nggo boe. Dad'i ho musi simbo 'a! 2 Fe'esa'an, au 'unori nggo sia atahori hetar mata na ra Lamatualain dala masod'a ndoo-tetu na. Dad'i ia naa, au 'o'e nggo, fo rena mala saa mia au e, na, muu munori neu atahori fo ho bisa mumuhere' ra. Atahori naa ra musi ranori rahine selu' ta'o naa neu atahori laen ra fai.3 Basa hita ia ra, 'ona' Yesus Kristus sold'ad'u na ra. Dad'i basa hita lemba doid'oso' 'ona' E boe. Huu ho, sold'ad'u malole', musi lemba bab'anggim boe. 4 Sold'ad'u mana tao ue-tataos, na, nda neu mbute-mue noo ue-tataos laen sa. Noo ta'o naa, ana tao namaho'o malangga na.
5 Mete nekendandaa' fea' sia olaraga. Mete ma tungga nesesenggi', na, tungga olaraga atoran na. Te hoko', na, mu'ud'ea'! Nda musenggi' sa. 'Ona' naa boe, mete ma mae mulalao Lamatualain ue-tataon, na, tungga atoran na.
6 Mete mana ue-rae ra boe. Ana tao-ues nda hahae aon sa sia osin rala. Dad'i eni 'etu-'oru na'ahulu' osi a mbule-b'oa na. 7 Du'a malolole dala' ia ra. Dei fo Lamatualain fee nggo muhine basa naa ra.
8 Du'a malolole neu Yesus Kristus. Eni, mane Daud tititi-nonosi na. Ana mate, te Lamatualain fee ne nasod'a bali'. Naa dad'i Hara-lii Malole' fo au 'ufad'e sia bee-b'ee. 9 Huu au 'ufad'e Hara-lii Malole' naa, naa de au hambu doid'oso' ta'o ia. Lena' fai ara futu au noo rante, 'ona' au ia atahori de'ulaka'. Te ara nda 'ai rala Lamatualain Hara-lii Malolen sa. 10 De au 'uhehere lemba doid'oso' mata'-mata'. Sad'i Lamatualain atahori na ra fo Ana pili nala' ra, hambu masoi-masod'a'. Te dei fo Lamatualain so'u nananaru se rakandoo 'a, huu ara dad'i Yesus Kristus atahori na ra. 11 Ded'ea-'o'ola' ia ra mema' teb'e:
“Mete ma ata simbo tae, Kristus mate nggati hita, na,
naa 'ona' hita o mate hela masod'a mbaraa ta ra,
fo tasod'a too E boe.
12 Mete ma ta'atataa' too doid'oso' a,
dei fo ata 'endo' to'u parenda' ta'ab'ue too E.
Te mete ma tafanii E, na,
Ana o nafanii nggita boe.a
13 'Ona' mae rala ta ra nda ta'atataa' tungga E sa,
te Ralan na'atataa' noo nggita nakandoo 'a,
huu Ana nda bisa leleko' sa. Saa fo Ana 'ola', na, Ana tao tungga.”
Atahori mana tao-ues fo Lamatualain koa' a
14 Fee nesenened'a' neu atahori mamahere' ra, fo ara 'afi' lilii' basa ia ra. 'Ai se noo Lamatualain naran, fo ara raloe' rareresi ded'ea-'o'ola' ra sosoa na. Huu basa naa ra nda mangguna' saa sa boe. 'Aka' a tao nalutu atahori mana rena' ra dud'u'a na ra. 15 Tao mu'ub'eb'esa aom fo 'ona' atahori mana tao-ues nandaa hambu kokoa' mia Lamatualain. Atahori 'ona' naa 'afi' mae, huu ana tao ue-tataon noo malole'. Ho musi dad'i atahori mana nanori Lamatualain Ded'ea-'o'olan noo matetu'. Huu Ded'ea-'o'olan naa, teb'e! 16 Mu'ud'od'oo' mia ded'ea-'o'ola' mana nda na'ena huu-tonggo' sa, ma ded'ea-'o'ola' mana nda fee had'a-hormat neu Lamatualain sa. Te naa tao 'a atahori boe tao de'ulaka'. 17 Ded'ea-'o'ola de'ulaka na ra, nano'i 'ona' hed'i dio-mane'. Himeneus noo Filetus 'o'ola na ra, 'ona' naa! 18 Ru'a se ranori sala rae, basa atahori mates ra, rasod'a bali' ena. Te nda teb'e sa! Noo ta'o naa, ara dinggo' ra'ad'oo' mia dala ndoo-tetu' a. Saa fo sira ranori' naa ra, tao ralutu atahori ruma nemehere na ra.
19 Te netehuu' fo Lamatualain nafefela' a, nda nanggongga sa. Sia netehuu' naa, nenesura' 'oi, “Lamatualain nahine atahori na ra”, ma, “Atahori mana sende' neu Lamatualain musi ra'ad'od'oo' mia de'ulaka'.” Netehuu' naa, naeni, Lamatualain atahori na ra.b
20-21 Sia atahori mamasu'i' ra umen rala, hambu sud'i 'a saa mata'-mata'. Hambu ruma nenetao' mia lilo ma doi fula'. Te ruma nenetao' mia hau noo rae hura'. Tenu ume' a ma'ahee pake sud'i 'a saa meulau' ra, sia fefeta monae'. Te ana mae pake sud'i 'a saa nda meulau' ra sa, sia atahori ra mata na ra. Atahori o 'ona' naa boe. Atahori mana na'ad'od'oo' noo de'ulaka' a, ana 'ona' sud'i 'a saa meulau' ra. Tenu ume' a namaho'o pake e, huu ana mangguna' fo tao-ues mata'-mata' noo malole'.
22 Atahori soru' ra tud'a reu' ena, huu ara tungga hihii-nanau ao-sisi na ra. Te Timotius, musi munea aom malolole, fo 'afi' tungga hihii' 'ona' naa. Tao 'a malole'. Mumuhere mukundoo neu Lamatualain. Musod'a noo susue' ma mole-d'ame moo basa atahori. Basa atahori mana ramahere neu Lamatualain, ma rasod'a noo rala meumare', hii 'a tao malole' rakandoo 'a. Dad'i Timotius, ho musi musod'a 'ona' se boe! 23 Au 'ufad'e selu' fai! 'Afi' muu soro-d'od'od'o fo munggad'oo' so'al ded'eat mana nda ma huu-tonggo' sa. Te basa naa ra soa tao atahori ra ratofa-rarau'. 24 Atahori mana tao-ues fee Lamatualain, nda randaa dad'i mana tao nemuet sa. Ara musi malole roo basa atahori, ranori rahine atahori, ra'atataa' mbali atahori mana sangga-sangga' a nemuet. 25 Ara o musi ranori noo malolole atahori mana lab'an se. Noo ta'o naa, see bub'ulu', Lamatualain natetu rala na ra, fo raloe', naa fo ara simbo dala ndoo-tetu' a. 26 Noo ta'o naa, dud'u'a na ra manggarelo bali', ma nenembo'i' mia nitu ra malanggan, fo mana futu-pa'a se fo tungga hihii na.