So'al ate noo tuan
6
Hambu tuan aten ruma mana ramahere neu Lamatua' Yesus. Ara musi fee had'a-hormat neu tuan na, naa fo atahori dea' ra nda hambu dala' fo 'ola' ra'atutud'a' Lamatualain naran, ma nda raloe-rad'ae hita nenorin sa.2a Hambu ate ruma tuan na namahere neu Lamatua' Yesus. Ate ra nda bole raloe-rad'ae tuan naa, huu namahere neu Lamatua' Yesus. Ara musi mete-se'u malolole lena' sira tuan na ra, huu basa sira atahori mamahere', de musi rasod'a esa sue esa.
Nenori manasala' noo seb'a-b'ae malole'
2b Tius! Munori basa ia ra, ma huhuar jama'at ra fo tao tungga basa naa ra. 3 Hita nenori matetun, dad'i netehuu' mia dala masod'a' fo tao nemeho'o Lamatualain rala na. Te atahori mana nanori fea' noo ia, ara piru hendi Lamatua' Yesus Kristus nenori matetun ena. 4 Atahori mata' naa, koao, te 'uta na ra rou'! Sira hed'in, naeni hii 'a sangga netofa' ma nereresi' ded'ea-'o'ola' ra. Basa ia ra tao fee atahori ralan mera, ratofa, tao ralutu atahori laen nara malolen, ma rundu sala' neu atahori laen. 5 Atahori mata' naa ra 'aka' tao 'a nemuet rakandoo 'a. Rala na ra de'ulaka'. Nda rahine bee malole' sa ena. Ara du'a rae mete ma sira nggate-nggate roo agama, na, sira bisa ramasu'i.
6 Mema', agama bisa tao atahori du'a rae sira 'onton monae'. Huu, mete ma tasod'a tungga Lamatualain hihii-nanaun ma med'a saa fo hita ta'ena' naa dai ena, naa fo agama matetu'!
7 Misined'a malolole! Lele' bonggi hita, nda tendi saa nisi' raefafo' ia sa boe. Ma mete ma hita mate o, nda tendi saa mia raefafo' ia sa boe. 8 Dad'i, sad'i nanaat noo bua-b'a'us dai, na, naa dai ena!
9 Te atahori mana nae namasu'i, ana hambu sosob'a' mata'-mata' noo mud'a', losa ana tud'a nenenore' mia dii-'ona, huu du'a 'a hata-heto' a. Basa naa ra rendi sosoe' ma ralutu masod'a na ra. 10 Te sue doi' naa, dad'i 'oka' mia basa tatao de'ulaka' mata'-mata' ra. Hambu atahori ruma sangga doi' 'ona' naa, de ara dinggo' ra'ad'od'o' mia nemehere matetu na ra. Noo ta'o naa, ralutu bali' sira masod'a na.
To'u muhere' nenori' fo ho simbo' a
11 Timotius! Ho ia, Lamatualain 'ena na. Dad'i dinggo' mu'ud'od'oo' mia basa de'ulaka' ra. Musod'a meumare'. Musod'a tao nemeho'o Lamatualain ralan sia basa dala' ra. Mumuhere mukundoo neu Yesus Kristus. Sue basa atahori. Mu'utataa' sia sususa'. Musod'a malole' moo basa atahori. 12 Mu'utataa' teb'e-teb'e', fo munori basa nenori' fo hita tamahere' a. Lamatualain no'e nggo misi' masod'a' nda mana basa' sa. Ma mufad'e nemeherem neu Lamatua' Yesus ta'o naa sia atahori hetar mata na. De holu mihere' masod'a' naa, 'afi' mbo'i e. 13-14 Ia naa, au 'o'e nggo helu-fuli ta'o ia: tao tungga basa Lamatua' Yesus parenda na. 'Afi' mulena-langga parenda' esa boe, naa fo atahori 'afi' hambu sala ma. Tao tungga basa naa ra noo teteb'es, losa hita Malanggan Yesus Kristus, fai nenema na. Au 'o'e nggo helu-fuli ta'o naa sia Lamatualain mata na. Huu ana mana fee ao samana' soa' neu basa mana masod'a' ra. Au o 'o'e nggo helu-fuli ta'o naa sia Yesus Kristus mata na. Huu Eni mana nafad'e relo-relo so'al aon sia hofernor Pontius Pilatus mata na.a
15 Lamatua' Yesus manaseli' naa, to'u koasa!
Eni, Mane Monae' mia basa mane' ra.
Eni o, Malangga Monae' mia basa malangga ra.
Nandaa noo fain, na,
Lamatualain nae tao natud'u dala' ia ra.
16 'Aka' a mesa' ne nda mate sa.
Nasod'a sia manggarelo' fo atahori nda ra'atataa' mete' a sa.
Nda hambu atahori esa mete nita E sa boe.
Basa e fee had'a-hormat neu E!
Basa koasa sia liman losa doo ndu'u-doon neu!
Ba'u a naa! Amin!
So'al atahori mamasu'i' ra
17 Mufad'e atahori mamasu'i' ra sia raefafo' ia, fo ara 'afi' koao, ma 'afi' ramahena su'i na ra. Te basa su'i naa ra dei fo mana sambu-lalo'. Malole lena' ramahena neu Lamatualain masod'a' a. Te Eni mana mbori fee nggita basa saa fo hita parluu' a, naa fo hita tamed'a masod'a' ia nemeho'o na. 18 Nefad'e se fo tao malole' rendi' sira su'i na ra. Ara musi nggate-nggate tao malole'. Ara musi hii tulu-fali atahori noo rala teme-ao', ma hii 'a banggi papala-b'ab'anggi' fo Lamatualain fee se 'a. 19 Noo ta'o naa, ara rad'uru su'i na ra fo dad'i netehuu' manggatee' soa' neu masod'a na ra sia fai mana nema' ia. Noo ta'o naa, ara rafefela masod'a' mana na'ena sosoa-ndandaa'.
Paulus sura' nate'e susuran
20 Tius! Munea mulolole basa saa fo Lamatualain fee sia limam. 'Afi' soro-d'od'od'o moo mana pepeko-leleko' ra. 'Afi' 'ola' tungga-tungga' moo ded'ea nda mana nendi had'a-hormat neu Lamatualain sa. Musuned'a, e! Hambu atahori rae sira mahine'. Tao-tao te mahine na ra nda na'ena netehuu' saa sa boe. 'Afi' mireresi moo se. 21 Te ara ramahere nenori pepeko-leleko' ra, de ara dinggo' hela nemehere na ra neu Lamatualain ena.
Au 'o'e fo Lamatualain natud'u rala malolen neu basa nggi.
Sod'a-mole',
Paulus