Timotius ndolu-had'an mbali atahori sarani' ra
5
'Afi' 'ai atahori lasi' lena' nggo noo hara ma'ad'ere'. Te mendi ded'ea malole', 'ona' 'ola' moo ama bonggim. Boe ma huhuar atahori soru' ra, 'ona' toronoo bonggi ma ra. 2 'Ona' naa boe ina lasi' ra. 'Ola' moo se 'ona' 'ola' moo ina bonggim. Mete ma 'ola' moo ina soru' ra, na, tao se 'ona' feto bonggi ma ra. Ralam musi meumare' moo se.So'al ina falu ra
3-5 Atahori sarani' musi tulu-fali ina falu nda mana ra'ena bob'onggi' fo ra'ab'oi se sa. Te mete ma ina falu mana fe'e na'ena umbu-ana', na, umbu-ana na ra musi ra'ab'oi se. Nenori se, fo ara bala-b'ae rahine mbusa-titi na ra. Noo ta'o naa, ara tulufali Lamatualain, ma tao ramaho'o rala na. Te ina falu fo teb'e-teb'e' nasod'a mesa' ne, nda hambu see-see fo na'ab'oi e sa boe. Ana namahena neu 'a Lamatualain. Hatu'-rerelon ana hule-o'e no'e tutulu-fafali' mia Lamatualain. Dad'i Jama'at musi ra'ab'oi ina falu mata' naa ra.
6 Te ina falu fo mana nasod'a tungga 'a ao-sisi' hihiin, 'ona' mae fe'e masod'a' o, nda mafeli' sa ena, 'ona' atahori mates ena.
7 Fee nesenened'a' basa dala' naa ra neu atahori sarani', naa fo atahori dea' 'afi' ra'amuti nara malole na ra.
8 Te mete ma hambu atahori nda nau ra'ab'oi bob'onggi na ra sa, lelenan te ume isi na ra, na, 'ona' ana nggari hendi nemeheren neu Lamatualain. De'ulakan nalena' atahori nda mana nahine Lamatualain sa.
9 Mete ma mae so'u ina falu fo tulu-fali malangga mananuni jama'at, na, dalan ta'o ia: toon nda bole sia rae' nee nulu sa; ma'ahulun saon esa 'a; 10 atahori rahine e huu ana hii 'a tao malole' neu atahori fea' ra; ana na'ab'oi ana na ra noo malole; ana mete-se'u atahori fea' ra noo lima rua'; mana tulu-fali atahori mamahere ra noo ue-tatao anak ra; ma tulu-fali atahori mana sia sususa'; ma sad'ia mema' fo tulu-fali sia dala malole.
11 'Afi' so'u ina falu fe'e soru' fo tulu-fali jama'at. Te 'afi' sambe hihii-nanau ao-sisi na ra losa ma, rae sao selu'. Noo ta'o naa, ara nda ka'e rala fo mete-se'u jama'at noo malolole sa. 12 Mete ma fai loa' nese soa' neu jama'at, naa 'ona' sira tao ralutu helu-fuli na ra sia Lamatualain mata na. Dei fo atahori fee sala' neu se. 13 'Afi' losa ara mbera-mbike, ma tasib'u reu-rema sia atahori ume na ra, fo 'ola-'ola' 'ombo-koson tao ralutu atahori nara na ra. Lelenan fai, ara hii 'a soro-d'od'od'o ao na ra sia atahori ded'ea na ra, ma 'ola' saa fo nda nandandaa sa. 14 Malole lena', ina falu fe'e soru' ra sao selu', fo ara bonggi, ma mete-se'u ume-loo na ra. Noo ta'o naa, atahori mana musu hita ra nda hambu dala' fo tao ma'afoo nara ta ra sa. 15 Ina falu soru' ruma lao sala dalan ena. Ara tungga nitu ra malanggan dala na.
16 Mete ma hambu ina mamahere' sa na'ena bob'onggi' esa dad'i ina falu ena, na, ana musi tulu-fali ina falu naa. 'Afi' fee jama'at ra tanggon rala e. Noo ta'o naa, ara bisa tanggon ina falu laen ra, fo mana nda ra'ena bob'onggi' sa.
So'al malangga mananuni jama'at ra
17 Hei musi fee had'at lena' neu atahori mananuni jama'at noo malole', ma bae nggad'i na ra noo matetu'. Lelenan atahori mana ue-tao nita' mamaten fo tao manggarelo Lamatualain Ded'ea-'o'olan, ma ranori nggi dala masod'a ndoo-tetu' a. 18 Susura meumare' 'oi, “Mete ma pake sapi fo roroo are-gandum mbule', na, 'afi' pa'a bafan, naa fo ana o naa boe.” Ma nenesura' fai 'oi, “Seka tao-ues, na, ana nandaa hambu nggad'i'.”a
19 Mete ma hambu atahori fua sala' neu mananuni jama'at, na, 'afi' simbo neu' ena! Musi hambu sakasii rua-telu mana 'ola' 'ona' naa, dei fo simbo fo urus e.b 20 Mete ma 'ai basa e ena, te ana fe'e nasod'a tungga nakandoo sala naa ra, na, 'ai e sia jama'at ra mata na ra. Noo ta'o naa, atahori laen ra nda rambarani tungga-tungga tao sala' 'ona' naa sa.
21 Tao basa dala' ia ra sia jama'at. 'Afi' mete mata', ma 'afi' nemeb'era seseri'. Au fee ue-tataos ia neu nggo sia Lamatualain noo Yesus Kristus mata na. Ana ded'enu' sia sorga fo Lamatualain pili nala' ra o, dad'i sakasii boe.
22 'Afi' haelai so'u atahori fo dad'i malangga. Paresa' malolole e dei. Te mete ma so'u leli atahori, basa ma atahori naa tao sala', na, hei o tanggon boe, huu eni tatao na. Munea aom malolole fo meumare mukundoo' a.
23 Au rena 'oi teim 'aka' a nambeta. Malole lena', ia naa ho sambor oe noo anggor mbei, fo dad'i mod'o. 'Afi' minu 'a oe muti'.
24 Mete mu'ub'eb'esa! Hambu atahori sala na ra nenenatud'u mema'. Ara nda fe'e losa mana nggero-furi' a matan sa, te basa atahori bub'ulu' sala na ra ena. Te hambu atahori laen o, doo-d'oo dei fo sala na ra fe'e sou ena. 25 'Ona' naa boe atahori mana tao malole' ra. Hambu ruma sou mema'. Te hambu ruma tao ra'afuni'. Mae 'ona' naa o, saa fo ara tao' naa, nda doo' sa te ana sou. Nda bisa funi tatao malole' sa.