Besa-b'esa moo atahori mana ranori leli neu atahori sarani' ra
4
Lamatualain Dula-d'alen nafad'e relo-relo ena nae, dei fo atahori sarani' ruma nggari hendi saa fo hita tamahere' a. De reu tungga nitur nenori tipu-lakan mana natud'a' atahori. 2 Atahori mana nema nanori ta'o naa, 'ola' laen, te tao laen. Mema' sira atahori mana peko-leleko'! Atahori naa ra rala dud'u'a na ra mema' ma'ateme' ena. 3 Ara ranori atahori fo 'afi' sao. Ara o raluli nanaat mata'-mata' boe! Te matetun, nanaa-nininu' naa ra Lamatualain mana tao. Ana tao nanaat naa ra, fo mete ma atahori mamahere' ra raa, na, ro'e makasi neu E. Huu rahine dala ndoo-matetun! 4 Basa saa fo Lamatualain tao' naa, mema' malole'. Dad'i 'afi' neluli mata'-mata'! Atahori musi simbo basa naa, noo ro'e makasi neu Lamatualain. 5 Te hita bub'ulu' tae, Lamatualain Ded'ea 'o'olan, ma hita hule-o'en, tao basa naa ra dad'i meumare'.Lamatua' Yesus atahori mana tao-ues malolen
6 Tius! Fee nesened'a' basa dala' ia ra reu toronoo mamahere' ra. Mete ma tao ta'o naa, ho dad'i Yesus Kristus atahori mana tao-ues malole na. Lamatualain Ded'ea-'o'ola na ra tao nggo mumuhere neu E, ma fee nggo muhine nenori' bee ndaa. Ho to'u muhere' Lamatualain Ded'ea-'o'olan ena! Naa, 'ona' a nanaat mana tao ma'ad'ere ao ma. 7 'Afi' nggari fai noo dud'ui 'ombo-koson nda mato'u' noo Lamatualain sa. 'Afi' taoafi' neu ina lasi' ra dud'ui neluli mata'-mata' na ra. Malole lena' munea aom fo musod'a tungga Lamatualain hihii na.
8 Munea aom fo ma'ad'ere', naa malole'.
Te nggunan mbei 'a.
Munea aom fo musod'a tungga Lamatualain hihiin sia basa dala' ra,
naa nggunan nae'.
Naa nggunan
nda soa' neu 'a masod'a' sia raefafo' ia sa,
te sia masod'a mana nema' a boe.
9 Ded'ea-'o'ola' ia ra teb'e! De mbed'a' sia ralam fo 'afi' lilii'. 10 Hita tamahena neu Lamatualain masod'a' a. Eni, mana fee masoi-masod'a' neu basa atahori, lelenan soa' neu hita mana tamahere neu E. Naeni de hita ue-tao tahere takandondoo' a.
11 Munori basa ia ra. Ma denu atahori fo tungga nenori ia ra. 12 'Afi' fee atahori raloe nggo, huu ho fe'e soru'. Musi mutud'u dala malole' soa' neu atahori mamahere' ra, mia 'o'olam, tatao-nono'im, susue-lalaim neu atahori, nemeherem neu Yesus Kristus, ma masod'a meumarem. 13 Lele' hei mihani au 'u'uma ngga, 'afi' lilii baca Lamatualain Ded'ea-'o'olan fee atahori mamahere' ra. Tao manggatetee rala na ra, ma nenori malolole se.
14 Pake malolole papala-b'ab'anggi' fo ho simbo mia Lamatualain, lele' malangga mananuni jama'at ra hule-o'e ma ndae lima na ra neu nggo. Lele' naa, ara rafad'e Lamatualain hehelu-fufulin so'al masod'am noo ue-tataom. Dad'i 'afi' mbed'a' hela papala-b'ab'anggi' fo hambu' naa. 15 Mulalao dala' naa ra noo nggate-nggate! Fo basa atahori rita rae, masod'am noo ue-tataom lao'. 16 Munea fo musod'a ndoos mukundoo' a. Ma munea fo munori 'a matetu'. Mete ma mu'utataa' moo basa naa, naa Lamatualain soi dala' fee nggo moo atahori mana rena nggo, fo hei nenembo'it mia basa dala de'ulaka' ra.