2 Tesalonika
Paulus susura karuan
fee neu atahori sarani' sia Tesalonika
Sod'a-mole'
1
Sod'a-mole' mia au, Paulus, ma mia au nonoo ngga ra, Silas noo Timotius.Susura ia, hai haitua neu basa atahori sarani' sia kota Tesalonika. Hei mana pili fo tungga hita Aman Lamatualain noo hita malanggan Yesus Kristus.a 2 Hai mo'e fo Ara ratud'u rala malole na ra neu nggi, fo misod'a noo mole-d'ame.
Paulus no'e makasi neu Lamatualain
3 Basa toronoo ngga ra, e! Mema' nandaa, hai mo'e makasi neu Lamatualain mikindoo 'a, huu hei bau mimihere neu E, ma hei esa bau sue esa. 4 Naa de hai dui-b'engga neu Lamatualain atahori sarani na ra sia bee-b'ee so'al hei. Hai dui mae, 'ona' mae atahori fea' ra tuni-ndeni tao doid'oso nggi o, hei mi'itataa' mikindoo moo mimihere ma ra.
5 Basa ia ra ratud'u 'oi, dei fo Lamatualain na'etu' ded'ea ma ra noo matetu'. Te doid'oso' fo hei lemba 'ale' ia, tao nggi mindandaa dad'i Eni atahori na ra. Eni, hei mane ma. 6 'Afi' mimitau, te Lamatualain naa, ndoo-tetu'. Mete neu' ena! Dei fo Ana bala-b'ae atahori mana tao doid'oso hei ra. 7 Boe ma ana o fee nggi hahae mia doid'oso' fo hei lemba' a. Ana o tao ta'o naa neu hai boe.
Basa ia ra dei fo dad'i, lele' Lamatua' Yesus 'onda nema noo basa ana ded'enu manaseli na ra mia sorga. 8 Dei fo ara 'onda rema roo ai manambila roroo'. Basa ma Ana bala-b'ae basa nda mana nau nahine Lamatualain sa, ma nda mana nau tungga Lamatua' Yesus Hara-lii Malolen sa. 9 Ana na'onda' huku-d'oki' beran seli neu basa se, de doid'oso rakandoo 'a. Ana 'oi hendi se mia matan, de ara nda ramed'a koasa mandete-masa'an sa.b 10 Te lele' Ana nema, basa atahori mamahere' ra so'u rananaru naran, ma fee had'at neu E. Hei o sia atahori mamahere' naa ra talad'a na ra, huu ama simbo basa Hara-lii Malole' naa, fo ma'ahulun hai mifad'e basa neu hei' a.
11 Naa de, hai hule-o'e fee nggi hatu'-rerelon, naa fo Lamatualain du'a nae hei mindaa dad'i Eni atahori na. Hai o mo'e fo Ana fee koasan neu nggi, naa fo ama tao basa malole' ra tungga saa fo mi'etu' basa mae tao, ma tungga saa fo mimihere' a. 12 Mete ma misod'a ta'o naa, na, atahori ra so'u rananaru Lamatua' Yesus nara na. Hei o nenekoa', huu hei tungga neu E. Dei fo basa ia ra dad'i, huu hita Aman Lamatualain noo hita Malanggan Yesus Kristus rala malole na.