Atoran soa' neu mana dad'i malangga mananuni jama'at
3
Atahori rae, “Mete ma se nae dad'i malangga mananuni jama'at, naa sosoan, ana pili nala ues esa malolen seli.” Ded'ea-'o'ola' naa mema' teb'e. 2 Malangga mananuni jama'at naa musi atahori mana na'ena nara meumare'. Eni musi nasod'a noo sao' esa 'a. Eni musi na'amamate' nala' ralan, mana nenee', atahori fee had'a-hormat neu e, hii 'a soi umen fo simbo fui' ra, ma nanori nala' atahori fea'. 3 Atahori naa 'afi' manamafu', ma liman 'afi' dai-d'ai' atahori. Mana nandaa, naeni, atahori rala lilo', mana hii 'a sangga dame, ma nda mana dale doi' sa. 4 Eni musi tao mata' neu ume isi na ra noo malole. Ana na ra o musi fee had'a-hormat ma rena e boe. 5 Te mete ma atahori naa nda bisa tao mata' neu ume isi na ra sa, na, ta'o bee fo ana bisa tao mata' neu Lamatualain jama'at na ra?6 Malole lena' pili atahori mana tungga Kristus doo' ena ma nahine noo malole. 'Afi' so'u malangga mananuni jama'at mia atahori mana fe'e namahere Lamatua' Yesus ena. Te ne'o ana koao neu' ena. 'Afi' losa Lamatualain hukun e, 'ona' Ana hukun nitur malangga na. 7 Mete ma mae pili atahori dad'i malangga mananuni jama'at, na, sangga atahori mana na'ena nara malole' noo atahori nda mamahere' ra sa boe. Ma atahori nda mamehere' ra sa o fee had'a-hormat neu e. Noo ta'o naa, ana nda mae saa-saa sa boe. Ma nitu ra malanggan nda bisa ratud'a' e sa.a
Atahori mana tulu-fali malangga mananuni jama'at
8 'Ona' naa boe mana tulu-fali malangga atahori sarani'. Sira, musi atahori mana na'ena nara malole', nda mana leleko' sa, nda mana ninu mafu' sa, ma nda hii laka-ese' atahori sa. 9 Rala na ra musi meumare', ma musi to'u rahere' nenori' fo Lamatualain fee nggita, atahori mamahere' ra. 10 Paresa' malolole masod'a na ra noo ue-tatao na ra. Mete ma atahori nda hambu sala na ra sa, dei fo fe'e so'u se fo tulu-fali malangga mananuni jama'at ra.
11 Sao na ra o 'ona' naa boe.b Sira, musi ina' mana nasod'a ndaa ma malole'. 'Afi' mana ma'amuti atahori. Ara musi ra'atataa' rala ao na ra, ma atahori ramahere se boe.
12 Mana tulu-fali malangga mananuni jama'at ra musi tou' mana sao esa 'a. Eni musi tao mata' neu ume isin noo malole', ma tao mata' neu ana na ra boe. 13 Sira mana mete-se'u atahori sarani' noo malole, de atahori boe fee had'a-hormat neu se. Ma ara boe rambarani 'ola' so'al nemehere na ra neu Yesus Kristus.
Netehuu' mia hita nemeheren
14-15 Tius! Au 'umuhena nda doo' sa te, 'uma 'undaa 'oo nggo. Mete ma au bab'anggo, na, susura ia losa na'ahulu' limam. Au sura' ia fo 'ufad'e nggo 'ae, Lamatualain bob'onggi na ra musi rasod'a ta'o bee. 'Afi' lilii' mae, Lamatualain naa, masod'a'. Atahori na ra 'ona' ume mana na'ena netehuu' noo rii ine manggatee'. Noo ta'o naa, ara musi tongga Lamatualain nenori matetu na.
16 Lamatualain natud'u saa manaseli' mia hita nemehere na. Netehuun ta'o ia:
Kristus nema sia raefafo' ia ena,
nendi' mata-aon 'ona' hita atahori boe.
Lamatualain Dula-d'alen natud'u 'oi,
Yesus, Atahori rala ndoos.
Lamatualain ana ded'enu na ra mia sorga rita E.
Lamatualain so'u nala E sorga neu,
basa ma, so'u nananaru E.
Eni dud'uin, nened'ui-b'engga' neu atahori ndule raefafo' ia.
Sia bee-b'ee sia raefafo' ia, atahori ramahere neu E.
Hita tamahere ta'o naa!