Ib'ad'a hohoro-lalane na
2
Ma'ahulun, au 'o'e nggi hule-o'e fee basa atahori ra. Mete ma hei hule-o'e neu Lamatualain, mo'e fo Ana tulu-fali basa atahori mana hambu sususa' ra. Ma mo'e makasi, huu Ana tao malole' neu basa se ena. 2 Hule-o'e ta'o naa fee mane-mane' ra roo basa malangga ra. Noo ta'o naa, basa hita tasod'a noo mole-d'ame, tungga Lamatualain hihii na. Masod'a' naa nandaa soa' neu atahori mana be'utee neu Lamatualain. 3 Hule-o'e' mata' naa, malole'. Naa tao nemeho'o Lamatualain, mana fee masoi-masod'a' neu nggita. 4 Ana nau basa atahori hambu masoi-masod'a', ma rahine saa fo ndoo-tetu'. Naeni:5 Lamatualain naa, esa 'a.
Ma lelete o esa 'a boe. Leleta naa, naeni Yesus Kristus mana nad'ame' Lamatualain noo hita atahori.
Ma Yesus naa, mema' atahori' teb'e-teb'e.
6 Ana fee aon fo soi-tefa basa hita mia sala ta ra.
Ndaa noo fain, Lamatualain soi relo-relo Hara-lii Malolen fo nafad'e neu basa atahori. 7 Huu naa, Lamatualain pili nala au dad'i ded'enun ena, fo 'uu 'ufad'e atahori nda Yahud'i ra sa sia bee-b'ee, ma 'unori se fo ara ramahere Lamatua' Yesus noo rasod'a tungga dala ndoo-tetu' a. Saa fo au 'ufad'e' ia, teb'e ta'o naa. Au nda leleko' sa.a
8 Au hihii ngga ta'o ia: sia bee-b'ee, mete ma hei mi'ib'ue fo hule-o'e, na, hei musi malolole esa noo esa. 'Afi' miminasa esa noo esa. 'Afi' mireresi. Mete ma boti' lima ma ra fo hule-o'e, rala ma ra musi meumare'.
9-10 Ina' ra o 'ona' naa boe. Au nau ara tao ao na ra randaa, ma pake bua-lo'as nandaa boe. 'Afi' koao fo tao atahori pupuik se, ma 'afi' tao langga fulu na ra mata'-mata', do, pake bua-lo'as mafelit nda nandaa had'at sa, do koao na'alelena' nendi' bua mbilas, lilo fula' noo mutiara ma permata. Te mana tao ina' ra meulau, naeni rala meumare' ma tatao malole na ra. Naa ndaa noo ina' mana be'utee neu Lamatualain.b 11 Mete ma atahori sarani' ra ra'ab'ue rena nenori', na, ina' ra o tungga hohoro-lalane' ra fo pasa ndiki na ra nenene malolole ma rena teteb'es nenori' naa. 'Afi' 'utu-'utu ma tao haras. 12 Tungga au, ina' ra nda randaa rananaru so'u ao na ra fo 'aka' parenda tou', ma ranori se sa. Malole lena' ina' ra sub'a-sub'a' a. 13 Huu Lamatualain na'ad'ad'i' Adam na'ahulu' dei de Hawa.c 14 Boe ma Adam nda nenetipu' na'ahulu' mia nitu ra malanggan sa, te ina'. Eni' a lele' naa, atahori ralena-langga Lamatualain hohoro-lalane na.d 15 Te 'ona' naa o, ina' ra o bisa hambu masod'a', huu ara bonggi. Sad'i ramehere teb'e neu Kristus, rasod'a esa sue esa, rasod'a noo rala meumare', ma rasod'a randaa noo had'a-d'ala'.e