Paulus no'e atahori sarani' Tesalonika ra hule-o'e fee sira
3
Toronoo ngga ra, e! 'Afi' lilii' hule-o'e fee hai. Hule-o'e fo Lamatualain Hara-lii Malolen nened'ui' noo lai-lai, naa fo atahori sia bee-b'ee fee had'a-hormat neu Hara-lii Malole' naa, 'ona' lele' hei simbo Hara-lii Malole' a. 2 Hule-o'e boe fo hai nenembo'it mia mana tao kaco ra, ma mia atahori de'ulaka fea' ra, te nda basa atahori ramahere Hara-lii Malole' naa sa.3 Te Lamatualain to'u 'o'ola na. Ana bisa tao ma'ad'ere hei, ma nanea hei mia de'ulaka'. 4 Hai o mimihere, Lamatua' Yesus tao hei tungga saa fo hai mifad'e hei' a. Ma hei o tao tungga mikindoo ta'o naa.
5 Hai mimihena Lamatua' Yesus nuni nggi, fo bau mihine mae, Lamatualain sue nggi. Ma ama o mihine mae, bisa mi'itataa' sia doid'oso', 'ona' ma'ahulun Kristus na'atataa' sia doid'oso na.
Basa atahori musi tao-ues, 'afi' mbera-mbike
6 Basa toronoo ngga ra, e! Au 'ufad'e mema' hei 'endi' Lamatua' Yesus Kristus naran, e! Ama 'afi' mi'ib'ue moo mana mbera-mbike' mana hii rolo-koo' ra. Ara nda tungga hai ue-tataom sa. 7 Basa nggi mihine mae, hei musi tungga hai masod'am lele' hai leo moo nggi. Hei mita ena. Hai nda nggari fai a parsuma 'a sa. 8 Hai tao-ues mita' mamate ma ra hatu'-rerelon, fo hai 'afi' tao mimib'era nggi. Hai nda simbo mita atahori nanaan noo mud'a' sa. 9 Hai ia Lamatua' atahori mana tao-ues na. De hai o mi'ena hak mo'e saa-saa mia hei e. Te hai nda nau pake hak naa sa. Hai mae mitud'u tatao-nono'i malole', fo ama tungga. 10 Ma'ahulun, hai lao hela fee hei hohoro-lalane' mae, “Seka nda tao-ues sa, na, 'afi' naa-ninu.”
11 Hai rena 'oi, hambu hei ruma rolo-koo 'a de nda nau tao-ues sa. Ara 'aka' tasib'u ma sambor roo atahori had'a-d'ala na. 12 Atahori 'ona' naa ra, hai fee se nesenened'a' mendi' Lamatua' Yesus Kristus naran, fo ara raloe' rolo-koo. Malole lena' ara tao-ues leo, fo sangga nanaat noo mbusa titi na ra.
13 Basa toronoo ngga ra, e! Hei 'afi' mbera-b'are tao saa fo malole', e!
14 Mete mib'eb'esa atahori nda mana nau tao tungga saa fo hai sura' sia susura ia sa. 'Afi' mi'ib'ue moo se, fo hela se mae. 15 Sad'i, 'afi' mete se 'ona' musu ma ra. Te mitea se malolole 'ona' toronoo ma ra.
Paulus sura' nate'e susuran
16 Lamatualain naa, mane dame. Au 'o'e fo Ana fee nggi damen neu sud'i 'a dala' bee. Au o 'o'e fo Lamatualain noo nggi mikindoo 'a.
17 Au 'ute'e susura ia noo lima rarale ngga, naa fo ama bub'ulu' mae, susura ia teb'e-teb'e' mia au. Basa susura laen ra, au tao ta'o naa boe.a
18 Au 'o'e fo hita malanggan Yesus Kristus natud'u rala malolen neu basa nggi.
Susura ia losa 'a ia ena,
Paulus