Atahori de'ulaka manaseli' musi nema na'ahulu', dei fo Lamatua' Yesus heo' bali'
2
Toronoo ngga ra, e! Ia naa hai mae mifad'e hei so'al fai hira' hita Malanggan Yesus Kristus nema, ma ta'o bee fo ta'ab'ue too E.a 2 'Afi' nenepepeko-leleko' noo mud'a' do dad'i bingun mete ma hei rena atahori rafad'e rae Lamatua' nema ena. Mae ara 'ola' rae, sira rahine mia Dula-d'ale' a, do rena mia atahori, do, hambu susura mia hai e, 'afi' mimihere se. Te basa naa ra, ombo koson! 3 'Afi' fee atahori ranggonggoa nggi. Te atahori de'ulaka' esa musi nema na'ahulu', dei fo Lamatua' Yesus heo' bali'. Atahori ia lab'an nahere' Lamatua', losa atahori hetar o tungga lab'an boe. Atahori ia mema' seli teb'e! Naa de ana maso' naraka o ndaa. 4 Ana nananaru aon lena' basa lamatua raefafo', ma lab'an basa saa fo atahori be'utee neu' ra. Sambe ana maso' nisi' Lamatualain Ume Hule-o'e Huun, ma to'o tendan 'oi, “Au ia, Lamatualain!”b5 Hei misined'a do hoko'? Ma'ahulun au 'ufad'e mema' neu nggi atahori naa dalan ena, lele' au fe'e 'oo hei, to?
6 Lele' ia, atahori de'ulaka' naa fain nda fe'e losa fo natud'u aon sa, huu hambu mana baa nala e. Hei o mihine saa mana baa nala e! 7 Lele' ia mana namue' a fe'e ue-tao na'afuni', huu hambu mana baa nala e. Te dei fo mana baa' a, mbo'i lima na. 8 Boe ma mana mamue' a, sou nema ma ue-tao noo relo-relo. Te nandaa noo Lamatua' Yesus fai nenema manaselin, Ana tao nalutu atahori de'ulaka' naa noo 'a ded'ea-'o'ola' esa' a.c
9 Te lele' Lamatua' Yesus nda fe'e nema sa, nitu ra malanggan fee koasa neu atahori de'ulaka' naa, fo ana tao manad'ad'i' mata'-mata', sambe atahori ra du'a rae, ana tao nendi' Lamatualain koasa na.d 10 Noo ta'o naa, atahori hetar nene'ed'i nala' mia atahori de'ulaka' naa pepeko-leleko na. Dei fo, sira mana nenenggari hendi' mia Lamatualain. Ana soi dala' nae fee masoi-masod'a' neu se, te ara nda simbo hihii-nanau malolen sa, ma nda nau ramahere ndoo-tetu' a sa. 11 Naa de, Lamatualain na'ateme rala na ra mia ndoo-tetu' a fo hela se ramahere pepeko-leleko' naa ra. 12 Noo ta'o naa, Lamatualain na'onda' huku-d'oki mamab'era' neu se, huu nda ramahere ndoo-tetu' a sa. Te ara hii tao de'ulaka'.
Atahori mamahere' ra musi ra'atataa' rahere'
13 Toronoo ngga ra, e! Hai mo'e makasi mikindondoo' a neu Lamatualain, huu Ana sue nggi. Te lele' Ana nda fe'e tao raefafo' ia sa, Ana na'etu' basa fee masoi-masod'a' neu nggi. Basa naa Ana fee Dula-d'alen fo tao nameu nggi, huu mimihere saa fo matetu' a. Dad'i hai mo'e makasi mikindondoo' a neu Lamatualain o, naa nandaa. 14 Lele' hai mifad'e Hara-lii Malole' neu nggi, Lamatualain pake Hara-lii Malole' naa fo no'e nggi, naa fo lele' hita Malanggan Yesus Kristus hambu mandete-masa'a', na, hei o tungga med'a mandete-masa'an boe.
15 Toronoo ngga ra, e! Mi'itataa' mikindoo noo to'u malolole saa fo hai mifad'e neu nggi' a. Misined'a saa fo hai sura' sia susura boe.
16-17 Hai hule-o'e mikindoo 'a neu Lamatualain, hita Aman, noo Yesus Kristus, hita Malangga na. Hai mo'e fo Ara tao manggatee hei rala ma ra, fo hela hei tao basa dala malole' ra. Hai mo'e ta'o naa, huu hai bub'ulu', Lamatualain sue naseli' basa hita. Huu ralan malole', naa de Ana nda naloe' tao manggatetee hita ralan sa. Noo ta'o naa hita tamahena takandoo neu E.