1 Tesalonika
Paulus susura kaesan
fee neu atahori sarani' sia kota Tesalonika
Paulus se haitua sod'a-mole'
1
Sod'a-mole' mia au, Paulus, ma mia toronoo ngga ra, Silas noo Timotius.Hai haitua susura ia, fee neu basa hei atahori sarani' sia kota Tesalonika. Hei mana hii tungga Lamatualain hita Aman, noo tungga Yesus Kristus, hita Malangga na.
Hai mo'e fo Lamatualain natud'u rala malolen neu nggi, naa fo ama misod'a noo mole-d'ame.a
Paulus no'e makasi huu atahori Tesalonika ra ramahere rakandoo
2 Hai mo'e makasi mikindondoo' a neu Lamatualain huu hei nemehere ma ra. Hai hule-o'e fee basa nggi hatu'-rerelo na. 3 Hai misined'a mikindoo 'a ue-tatao ma ra huu mimihere neu Lamatualain ma sue E. Hei mi'itataa' mikindoo moo tataos naa ra, huu mimihena neu Lamatua' Yesus. Hai 'aka' mo'e makasi ma mendi basa naa ra reu Lamatualain, hita Aman, matan.
4 Toronoo ngga ra, e! Hai bub'ulu' Lamatualain sue nggi. Naa de, Ana pili nala nggi dad'i bob'onggin. 5 Lele' hai misi' Tesalonika, hai mifad'e nggi Lamatualain Hara-lii Malole na. Lele' naa, hei pasa ndiki ma ra de rena malolole hai 'o'olam. Hei nda rena 'a sa, te ama o mita noo mata ao ma ra Lamatualain koasan mia Dula-d'ale Meumare na. Naa mana tao hei simbo teb'e-teb'e' Lamatualain Hara-lii Malole na. Lele' naa, hei mita hai tetende-nemberii ma ra, ma hai tao ta'o bee fo hei mihine teb'e-teb'e' Lamatualain dala na. 6 Huu hei hii nau tungga Lamatualain hihiin, naa de misod'a tungga hai tatao-nono'im, ma misod'a tungga Lamatua' Yesus tatao-nono'in boe. Te lele' hei simbo Hara-lii Malole' naa, hambu atahori ra'asususa' hei. Mae ta'o naa o, hei nda mi'iunda' sa, huu Dula-d'ale Meumare' tao namaho'o rala ma ra.b
7 Noo ta'o naa, hei mitud'u dala' soa' neu basa atahori mamahere' sia profinsi Maked'onia noo profinsi Akaya. 8 Te nda sia 'a naa sa. Lamatualain Hara-lii Malolen o nene'ola-'ola' mia hei sia Tesalonika losa sud'i 'a bee-b'ee. Dad'i hai fe'e mae 'ola' saa fai, huu basa atahori rena hei nemeherem neu Lamatualain ena. 9 Sia bee-b'ee atahori ra bad'ui' 'oi ma'ahulun hei simbo hai noo lima rua'. Basa ma hei nggari hendi sosonggo ma ra, de heo' bali' tungga Lamatualain matetu' a. Huu hei mae dad'i Lamatualain Masod'a' a pusaka na. 10 Ara o bad'ui' rae, hei nea-nea Lamatualain Anan Yesus nema mia sorga. Ma'ahulun, atahori ra tao risa E, te Lamatualain tao nasod'a bali' E ena. Mete ma Lamatualain nae fee huku-d'oki' neu atahori, na, Lamatua' Yesus mana soi nala nggita mia Lamatualain nasa na.