4-6 Toronoo ngga ra, e! 'Afi' losa Lamatua' neneman, sae nala nggi 'ona' na'o nema tetemba', nandaa noo hei masambeta'. Ama 'afi' ta'o naa! Hita nda tasod'a sia ma'ahatu' sa ena, 'ona' atahori fea' mana sunggu' masambeta' ra. Hita mana tamahere neu Yesus, tasod'a sia manggarelo' a, tahehere simbo E, ma tanea ao ta ra malolole. Hei bub'ulu' basa dala' ia ra ena. 7 Te atahori mana sunggu' ra, ara sunggu' tetemba'. Ma atahori manamafu' ra, ara mafu tetemba'. 8 Te ama 'afi' ta'o naa, huu hita ia ra tasod'a sia manggarelo' ena. Ama musi minea ao ma ra. Mete ma mimihere mikindoo neu Lamatualain ma sue-lai esa noo esa, naa 'ona' sold'ad'u mana pake pepele tenda'. De mete ma mimihena mikindoo neu Lamatua' Yesus mana mbo'i hei mia Lamatualain nasan, naa 'ona' sold'ad'u mana nasolo solo besi'.^b

9 Lamatualain nda pili nala nggita fo hambu Eni huku-d'okin sa. Te Ana pili nala nggita fo hambu masoi-masod'a', huu tamahere Yesus Kristus, hita malangga na. 10 Huu Ana mate nggati hita ena. De mete ma Ana heo' bali', hita tasod'a takandoo too E, mae hita mate ena, do fe'e masod'a'.^c 11 Huu naa, pake 'o'ola ngga ia, fo tao namaho'o ma tao manggatetee esa noo esa ralan, 'ona' hei tao eni' a ma'ahulu na.

12 Basa toronoo ngga ra, e! Misined'a fo fee had'at neu ina-ama malangga nggarei' ra. Te ara, ue-tao nae' seli fee nggi, noo fee nesened'a' neu nggi, fo ama 'afi' tud'a. 13 Fee had'a-hormat ma sue-lai se, huu ara ue-tao noo manggate' fee nggi. Misod'a mole-d'ame esa noo esa.

14 Toronoo ngga ra, e! Hai mae fee nesenened'a' hira ta'o ia: mifad'e mana mbera-mbike' ra fo ara ue-tao noo matetu'. Tao manggatee rala mana banggi-b'anggi' ra. Misila'e atahori manatud'a-loloe' ra. Ma mi'itataa' moo basa atahori ra.

15 Misined'a fo 'afi' bala-b'ae de'ulaka' noo de'ulaka'. Te tao 'a malole' moo basa atahori. 'Afi' tao malole' neu 'aka' a hita atahori na ra, te atahori dea' ra boe.

16 Mimiho'o mikindoo 'a. 17 Hule-o'e hatu'-rerelo na. 18 Mae susa do mimiho'o o, mo'e makasi neu Lamatualain. Huu Lamatualain hii-nau basa atahori mana tungga Yesus Kristus ra tao ta'o naa.

19 'Afi' 'ai-b'aa Dula-d'ale' ue-tatao na. 20 Mete ma hambu toronoo' esa nae eni simbo hara' mia Lamatualain, na, 'afi' miloe-mid'ae 'o'olan! 21 Hei musi paresa' milolole ded'ea-'o'ola' naa, teb'e huun mia Lamatualain do hoko'. Mete ma teb'e, na, tungga. 22 Te mi'id'od'oo' ao ma ra mia basa de'ulaka' ra.

23-24 Au hule-o'e fo Lamatualain tao nameu rala ma ra noo masod'a ma ra. Ana mana tao nggita tasod'a mole-d'ame esa noo esa. Noo ta'o naa, lele' hita Malanggan Yesus Kristus bali' nema, na, hei mimbirii' sia matan, moo ao ma ra, rala ma ra, boe ma samana ma ra nda hambu sala' saa sa boe. Teb'e! Lamatua' Yesus mana no'e nggi dad'i atahorin, ralan ndoos. Saa fo Ana 'ola', naa ana tao tungga. Dad'i dei fo Ana nendi hei noo meumare' nisi' Lamatualain mata na.

25 Toronoo' ra, e! 'Afi' lilii' hule-o'e fee hai sia ia.

26 Au 'o'e fo ama haitua sod'a-mole' fee neu basa Lamatualain atahori sarani na ra sia naa, o!

27 Au 'o'e noo Lamatua' Yesus naran, hei baca susura ngga ia fee neu basa atahori sarani' ra.

28 Au 'o'e hita Malanggan Yesus Kristus natud'u rala malolen neu basa nggi.

Ba'u a naa.