Dala masod'a mana tao Lamatualain ralan namaho'o
4
Dad'i ta'o ia, toronoo ngga ra, e! Hai kokoe nggi, fo misod'a tao mimiho'o Lamatualain ralan, 'ona' hai minori nggi' a. Mema' misod'a tungga basa naa ra ena, te huu hita ia ra dad'i Lamatua' Yesus bob'onggin ena, de hai mo'e fo ama bau ue-tao ma'ad'ere' selu' fai. 2 Basa hei bub'ulu' ena saa fo hai minori neu nggi naa, mendi' Lamatua' Yesus koasan. 3 Lamatualain hihiin ta'o ia: Misod'a meumare'! 'Afi' misod'a manggenggeo'. Naeni, 'afi' hohongge. 4 Hei musi tao mata' neu ao ma ra, fo misod'a meumare', sambe atahori fee had'at neu nggi.a 5 'Afi' misod'a tungga hihii ao-sisi ma ra, 'ona' atahori nda mana rahine Lamatualain sa. 6 'Afi' sangga hahambu', ma hohongge moo atahori mana nemehere neu Lamatualain boe. Te Lamatualain naa, Malangga mana bala-b'ae basa de'ulaka' 'ona' naa ra. Hai mifad'e nesefafali basa ia ra neu nggi ena, ma fee nesenened'a' eni' a dalahulun ena. 7 Lamatualain no'e nala hita fo dad'i atahorin ena. Eni hihiin, hita musi tasod'a meumare', nda tasod'a manggenggeo' 'ona' mana hohongge' ra sa. Nda ta'o naa sa. 8 Huu naa, atahori nda mana tungga nenori' ia sa, ana nda tola 'aka' a hai sa, te ana o tola Lamatualain, mana fee Dula-d'ale Meumaren neu nggi' a.9 Au nda parluu sura' selu' fee hei so'al dala susue' sa, huu Lamatualain nanori ena 'oi, hei esa musi sue esa. 10 Hai o rena hei sue basa toronoo' mana sia profinsi Maked'onia ra. Te toronoo', ra, e! Ia naa hai mo'e fo ama sue milena' se fai. 11 Malolole fo ama misod'a noo mole-d'ame, 'afi' tungga atahori fea' ra dalan, te esa-esa' tao mata' neu dala na. Ama musi tao ues fo sangga nanaa-nininu' ao ma ra, 'afi' mimihena atahori fea' ra. Hai fee nesenened'a' ia neu nggi eni' a dalahulu na. 12 Mete ma misod'a ta'o naa, na, nda tao mimib'era atahori laen sa. Dei fo atahori nda mana ramahere neu Kristus sa mete rita masod'a ma ra ta'o naa, na, ara rae, “We! Mema' atahori mana tungga Lamatua' Yesus naa, rasod'a noo ndoo-tetu', o!”
Lamatua' Yesus neneman
13 Naa! Ia naa, basa toronoo' ra, e, au 'ae 'ufad'e dala' esa, fo mihine teb'e-teb'e so'al atahori mates ra. Hita bub'ulu' tae, atahori mates ra dei fo rasod'a bali'. Dad'i mete ma hambu Lamatua' atahorin ruma mate, na, 'afi' mi'isususa' ao ma ra, 'ona' atahori fea' nda mana rahine dala' naa sa. 14 Te hita bub'ulu' tae, Yesus mate basa ma Lamatualain o tao nasod'a bali' E. Naa! Noo ta'o naa, Lamatualain o tao nasod'a bali' basa atahori mates mana ramahere' ra, ma na'ab'ue nala basa se roo Lamatua' Yesus.
15-17 Te lele' Lamatua' Yesus heo' bali', Ana 'onda mia sorga nisi' raefafo', dei fo hambu hara parenda mahere'. Ma ana ded'enu' sia sorga ra malanggan fee parenda' fuu ma'oa. Ma Lamatua' atahori mana mate na ra rasod'a bali'. Dei fo sira roo hita fe'e masod'a ia ra, neneso'u' lelee' ata teu fo soru Lamatua' Yesus nenema na. Basa naa, basa hita tasod'a takandoo too E.b