Paulus se ra'etu' fee Timotius Tesalonika neu
3
1-2 Sad'i hei bub'ulu', lele' hai lao hela nggi a, nda tungga hai hihiim sa. Hai mae' a 'ima mita hei, te nda bisa sa. Doo-d'oo ma hai nda mi'itataa' sa ena, naa de hai mi'etu' fee Timotius neti. Te au 'oo Silas mihati sia Atena. Timotius naa hai toronoo ma. Eni hai nonoom mana noo hai milalao Yesus Kristus Hara-lii Malole na. Hai denu e neti nanori ma tao manggatetee rala ma ra, naa fo hei boe mimihere mihere' neu Lamatualain.a 3 Noo ta'o naa, mete ma hambu sususa', hei nda minggongga' sa. To'u mihere' hei nemeherem. Huu hei bub'ulu', atahori mana ramahere neu Kristus ra, dei fo hambu sususa' ta'o naa. 4 Fe'esa'an, lele' hai fe'e mi'ib'ue moo nggi, hai fee nesenened'a' mae, atahori mana ramahere neu Lamatua' Yesus dei fo hambu sususa' mata'-mata'. Ia naa basa e dad'i ta'o naa ena, to!5 Huu au susa 'ae mate 'oo hei tetende-nemberii ma ra, de au denu Timotius Tesalonika neti, naa fo hai bub'ulu', hei fe'e mimihere mikindoo neu Lamatua', do hoko'. Te au 'umutau, 'afi' losa nitu ra malanggan nema sob'a-d'ou nggi, fo misid'ea Lamatualain. Mete ma dad'i ta'o naa, na, hai ue-tataom ma'ahulun naa, parsuma 'a.
Timotius bali' nema nendi hara' mia atahori sarani' sia Tesalonika
6 Ia naa Timotius bali' mia Tesalonika, ma nendi hara nemeho'ot fee hai. Ana dui nae, hei mimihere mikindoo neu Kristus, ma hei o esa sue esa mikindoo 'a. Ana o nafad'e nae, hei misined'a hai mikindoo 'a de mae mindaa moo hai 'ona' a hai o mae mindaa moo hei boe.b
7-8 Toronoo ngga ra, e! Mae hai sia ia mimed'a beran seli huu sususa' ia-naa nda mbei-mbei' a sa, te Timotius dud'uin tao hai mimiho'o teb'e-teb'e'. Huu ia naa hai bub'ulu' ena mae, hei mimihere mihere' neu Lamatualain.
Paulus hule-o'e fee atahori sarani' sia Tesalonika
9 Dad'i hai mo'e makasi nae-nae neu Lamatualain noo rala nemeho'ot 'ona' ia, huu hei tungga mikindoo E. 10 Hatu'-rerelon hai hule-o'e mikindoo 'a, fo 'ona bee, na, hita fe'e bisa tandaa selu' fai. Hai mae minori fo hei bub'ulu' basa dala' soa' neu Lamatualain dala masod'a na.
11 Hai mimihena Lamatualain, hita Aman, noo Yesus Kristus hita malanggan, soi dala' fo hai meti mindaa moo nggi fai. 12 Hai mo'e Lamatualain fo fee hei esa sue-lai esa nae' lena' fai. Ma hei o sue-lai basa atahori, 'ona' hai o sue hei ta'o naa boe. 13 Noo ta'o naa, Lamatualain tao manggatee rala ma ra, fo misod'a ndoos noo meumare', losa Lamatua' Yesus heo' bali' nema noo atahori na ra, na, hei hambu mimbirii' sia hita Aman Lamatualain matan, nda lemba sala' saa sa boe.