Paulus nasaned'a ue-tataon sia Tesalonika
2
Toronoo ngga ra, e! Basa hei bub'ulu', lele' hai mii tao ues fee Lamatualain sia Tesalonika, hai nda nggari hendi mbusa titi ma ra hie-hie' a sa. 2 Hei o misined'a, lele' hai nda fe'e misi' Tesalonika sa, atahori sia kota Filipi ra tao ra'asususa' ma doid'oso hai ena. Te Lamatualain tao manggatetee hai rala ma ra, de mimbirani mifad'e Lamatualain Hara-lii Malolen neu nggi, mae atahori nae' musu hai.a 3 Lele' naa, hai mendi Hara-lii Malole' naa fee nggi sia Tesalonika, nda mendi nenori' mana tao leli' sa. Hai nda meti tao minggonggoa do peko-leleko' hei sa.4 Hoko'! Fai' naa hai meti moo rala ndoos. Lamatualain mana dud'u hai, fo mendi Hara-lii Malolen fee neu nggi. Hai nda mae tao mimiho'o atahori rala na ra sa, te mae tao mimiho'o Lamatualain, huu Eni mana timba-tai hai rala ma ra nae, ndoos do hoko'.
5 Hei o mihine mae, hai nda maa mina sa, selu' fai mae sangga hahambu' sen esa-rua mia hei e. Lamatualain o bub'ulu' hai rala ma ra. 6 Hai o ue-tao nda mae sangga nara kokoa' mia atahori, mia hei do mia atahori fea' sa. 7 Hai ia ra Kristus ded'enun. De hai o mi'ena hak 'ona' malangga-malangga ra, te hai nda nau so'u boti' ao ma ra ta'o naa sa. Lele' naa hai tao ao ma ra 'ona' anad'iki' sia talad'a ma ra.b Hai o mitud'u susue' neu nggi, 'ona' mama sa nasusu ana na. 8 Hai nda mendi' a Hara-lii Malole' fee nggi sa, te hai o fee ao ma ra teme-teme huu hai sue miseli' nggi.
9 Toronoo ngga ra, e! Hei fe'e misined'a, hai o tao ues mita' mamate ma ra hatu'-rerelon, fo bisa tanggon hai masod'a ma ra. Lele' hai mendi Hara-lii Malole' a fee nggi, hai nda nau tao misimbute nggi sa. 10 Basa hei mita ao ma ra, ma Lamatualain o 'oi, lele' hai mi'ib'ue moo hei mana mamahere' sia naa, hai misod'a noo rala meu', leo-lao tungga dala ndoos, ma nda tao sala' saa sa boe. 11 Hei bub'ulu' hai tao mata' neu nggi, 'ona' ama bonggi' tao mata' neu ana na ra. 12 Hai tao manggatee rala ma ra, fee nggi nesenened'a', ma kokoe nggi fo misod'a mindaa-mitetu, fo tao nemeho'o Lamatualain rala na. Te Eni mana dad'i mane'. Ana no'e nala hei fo maso' dad'i bob'onggin, ma hambu mandete-masa'a' moo E.
Lamatualain ue-tao sia rala ma ra
13 Hai mo'e makasi nda nama'etu' sa neu Lamatualain, huu lele' hei rena Hara-lii Malole' naa mia hai, hei rena Lamatualain Ded'ea-'o'olan, te nda atahori raefafo ded'ea-'o'ola na ra sa. Huu Lamatualain ue-tao sia hei mana mamahere' ra rala ma ra.
14 Toronoo ngga ra, e! Hei fe'e mae tungga Lamatualain dalan, te atahori nusa isi ma ra tao ra'asususa' nggi ena. Noo ta'o naa, basa hei o mimed'a sususa' 'ona' atahori mamahere' sia profinsi Yud'ea ra, fo mana hambu sususa' mia sira atahori Yahud'i na ra, huu ramahere Yesus Kristus.c
15 Hambu atahori Yahud'i ruma nda taoafi' neu Lamatualain hihiin sa. Naa de, lele' Lamatualain haitua mana 'ola-'ola na ra neu se, ara tao doid'oso ma risa mana 'ola-'ola' naa ra. Ara o tao risa Lamatua' Yesus 'ona' naa boe. Ia naa ara sangga-sangga dala' fo rae mbuu hendi hai fai. Ara bamusu' roo basa atahori, de Lamatualain nda hii se sa.d 16 Lena' fai ara 'ai-b'aa mata'-mata', naa fo hai 'afi' mendi Lamatualain Hara-lii Malolen fee nusa fea' ra. Atahori Yahud'i naa ra nda nau Lamatualain fee masoi-masod'a' neu atahori fea' ra sa. Noo ta'o naa, ara boe tao sala' ra'aunu'. Naa de, Lamatualain namanasa, de hukun se.
Paulus nae 'a nandaa selu' noo atahori sarani' ra sia Tesalonika
17 Toronoo ngga ra, e! Mae 'oras ia, nau do nda nau sa o hita leo ta'ad'oo', te naa doo' sia 'a mata memete', nda doo' sia rala ta ra sa. Hai sangga-sangga dala', fo 'ona bee, na, hai meti se'u selu' nggi, huu hai o mae' a do bee fo mindaa moo nggi ena. 18 Au o sob'a 'usufafali 'ae 'eti 'ita nggi, te nitu malangga monae' a 'aka' bab'aa au nakandondoo' a. 19 Hei bub'ulu', ta'o bee de hai mae meti mita hei? Naa, huu hai mimihena nggi. Hei mana tao ma'ahee ma ne'emoko hai rala ma ra. Te see fai mana to'u nehere' Lamatua' Yesus naran? 'Aka' a hei! Mete ma Lamatua' nema nasafali, na, hai boti' mala mata ma ra huu hei. 20 Mema' teb'e! hei mana tao hai rala ma ra ra'amoko ma ramaho'o.