2 Hei musi manggate hule-o'e mikindoo 'a. Ma musi med'a sia rala ma ra so'al dala-d'ala' fo hei 'ola' moo Lamatualain, ma hule-o'e moo rala mana no'e makasi nakandoo 'a. 3 'Afi' lilii' hule-o'e fee hai, mo'e fo Lamatualain soi dala', fo hai mifad'e atahori dala-d'ala' fo ma'ahulun mana ma'afuni' so'al Yesus. Misined'a, au sia bui ia, huu au 'ufad'e atahori so'al Kristus. 4 Hule-o'e fo au dui-b'engga Hara-lii Malole' naa noo matetu', fo atahori bisa rahine noo malole'.

5 Misod'a noo ndoo-tetu' sia atahori nda mana fe'e ramahere Kristus ra talad'a na ra sa. Pake malolole kaka'e' fo Lamatualain fee neu nggi.^b 6 Mete ma hei 'ola', na, 'ola' noo malolole fo ndaa noo atahori rala na ra. 'Afi' 'ola' tao fee atahori mbera rena nggi. 'Ola' mendi' ded'ea-'o'ola matetu', fo hei bisa mitaa noo malole', mete ma hambu atahori ratane nggi.

7 Dei fo Tikikus nema dui nggi au tetende-nemberii ngga. Eni, hai toronoo susuem, mana ma'atataa' mete-se'u Lamatua' atahori mana tungga na ra. Dalahulun, ana o dui-b'engga Lamatualain ue-tataon noo au boe.^c 8 Au denu e ta'o naa, fo neti tao manggatee rala ma ra, ma dui nggi hai masod'a ma ra sia ia.^d 9 Au o denu bali' Onesimus, fo tungga noo e. Onesimus naa, hai toronoo susuem mana ma'atataa'. Eni, hei atahorim. Dei fo ru'a se dui basa dala' mana dad'i sia ia ra.^e

10 Aristarkus fee nggi hara sod'a-mole'. Ara tao e sia bui rala noo au boe. Barnab'as 'od'in Markus o fee hara sod'a-mole' boe. Dalahulun au helu mema' nggi 'ae, mete ma Markus nema se'u nggi, na, simbo e noo malolole'.^f 11 Yesus, (fo hita to'e tae, “Yustus”) fee nggi hara sod'a-mole' boe. Mia basa nonoo ngga mana dui-b'engga Lamatualain ue-tataon, 'aka' sira telu' se fo atahori Yahud'i mana dad'i atahori Kristen. Ma sira ia, mana tao manggatee rala ngga.

12 Hei nonoom Epafras sia ia, de ana o fee nggi hara sod'a-mole' boe. Ana dad'i Yesus Kristus atahori ded'enu na. Ana manggate hule-o'e fee nggi ma no'e Lamatualain tao manggatee nggi, tao na'ad'ad'ai' nggi, ma tao nggi mihine teb'e-teb'e' hihii-nanau na.^g 13 Au 'ufad'e mema' nggi, Epafras naa, tao ues nita' mamaten fee nggi, ma fee atahori sarani' ra sia kota Laod'ikia ma kota Herapolis.

14 Hambu hara sod'a-mole' mia Demas noo doter Lukas, fo hai sue' ra.^h

15 Au haitua hara sod'a-mole' fee atahori mamahere' ra sia kota Laod'ikia. 'Afi' lilii' fee hara sod'a-mole ngga neu Mama Nimfa noo atahori mamahere' mana biasa ra'ab'ue sia ume na.

16 Dei fo mete ma basa hei mana sia Kolose baca mala susura ia ena, na, haitua nakandoo nisi' atahori mamahere' sia Laod'ikia fo ara bisa baca boe. Ma hei o musi baca susura fo au haitua 'ita fee se' a boe.

17 Fee nesenened'a' neu Arkipus mae, “'Afi' lilii' mulalao mub'asa' ue-tataos fo simbo mia Lamatualain a.”ⁱ

18 'Afi' lilii' mae, ara fe'e tao au sia bui ia rala.

Au 'o'e fo Lamatualain natud'u Rala malolen neu nggi.

Mete ne'u ena, susura ia, au teken 'endi' lima heheli ngga,