3
Lamatualain fee nggi masod'a feu', 'ona' Ana tao nasod'a bali' nggi moo Kristus. Ia naa, Kristus 'endo' sia mamana nenefee had'a-hormat sia Lamatualain bob'oa 'ona na. Naa de hei musi du'a-d'u'a dala' fo mana tao Lamatualain ralan namaho'o.a 2 Du'a mikindoo neu dala-d'ala' fo Lamatualain hii' ra. 'Afi' tao mata' neu dala' mana tao' a atahori rala na ra ramaho'o'. 3 Te lele' Kristus mate, hei o mate boe. De hei masod'a feum naa, nenesad'ia', huu nenepa'a-sii' ena moo Kristus, mana noo Lamatualain sia nusa tetu' a. 4 Kristus nasod'a sia hei ralam, ma Ana o tao nggi misod'a noo matetu'. De lele' Ana bali' nema, na, hei o sou mi'ib'ue moo E boe. Basa naa ra, mandete-masa'a'!Masod'a mbaraa' noo masod'a mata feu'
5 Naeni de hei musi nggari hendi hihii-nanau de'ulaka ma ra. 'Ona' a: hii 'a hohongge; hii 'a tao dala-d'ala manggenggeo-malafu' ra; hii 'a tao tungga ao-sisi' hihii-nanaun; hii 'a tao de'ulaka' mata'-mata'; hii 'a mu'ena basa-b'asa' e (tao-tao te naa 'ona' sosonggo' e, huu so'u munanaru dala' laen mana seti hendi Lamatualain) 6 Dala' naa ra mana tao Lamatualain namanasa nala seli, losa Ana nae huku-d'oki basa atahori nda mana rena E sa. 7 Dalahulun, hei misod'a 'ona' naa boe, huu rala ma ra nenepa'a' roo basa dala de'ulaka' naa ra.
8 Te ia naa, hei musi nggari hendi basa hei dud'u'am mana hii 'a tao de'ulaka'. 'Ona' a: hii 'a miminasa; nasab'ori'; mimbed'a' rala'; mi'imuti-mi'imuu atahori naran; ma 'ola' ded'ea mamaet. 9-10 Ama 'afi' peko-leleko' esa noo esa. Huu hei nggari hendi hei dud'u'am mana hii 'a tao de'ulaka' ena, ma lao hela masod'a mbaraa ma ra ena.b
De ia naa hei nggati noo dud'u'at feu' ena. Naa 'ona' atahori nggari hendi bua-lo'a mbara manggenggeo na ra, de seluao bua-lo'a feu' fo meu' a. Lamatualain mana na'ad'ad'ad'i nggi. Ma 'ale' ia o Ana fee nggi boe mihine E, ma doo-d'oo na tao nggi dad'i mii mata' esa 'ona' E boe.c 11 Sia masod'a feu' ia, hita nda nile atahori sia 'a rou dea' tae, sira atahori Yahud'i, do nda Yahud'i sa; atahori mana sunat do, nda sunat sa; atahori nusa dea' do; atahori nda mana nahine had'at do;d ate do, atahori nenembo'it do. Naa nda pantiin sa! Te pantiin, mete ma ara nenepa'a' roo Kristus, ma Ana nasod'a sia rala na ra.
12 Lamatualain pili nala nggi ena, huu Ana sue nggi. Masud na nae 'ona bee, na, hei dad'i Eni atahori meumaren mana fea' noo atahori laen ra. Naa de hei musi dad'i atahori ma rala malole', rala meulau', rala neloe-ned'ae', noo se'a-na'us, ma mana ma'atataa'. 13 Hei musi mi'itataa' ma mihine esa noo esa. Mete ma mia hei ia hambu mana sangga' a netofa-neuu' noo nonoon, na, 'afi' mimbed'a' rala'. Te hei musi lilii' hendi salan, ma fee ambon neu e 'ona' Lamatualain lilii' hendi hei sala ma ra boe.e 14 Misined'a, te susue' a nalena' basa e. Hei musi mi'ena susue' sia rala ma ra, 'ona' atahori pake buas sia ao na ra. Huu susue' naa, 'ona' 'ab'as fo hita tenu dad'i teme' meulaun seli. Naa mana pa'a nggita dad'i teu esa.
15 Hita bisa d'ame too Lamatualain, huu Kristus. Dad'i hei musi fee dad'ame' mana mia Kristus lole-lau sia hei rala ma ra. Lamatualain nau basa nggi misod'a mole-d'ame esa noo esa, huu basa nggi nenepa'a-sii' dad'i ao' esa ena. Ma rala ma ra musi ro'e makasi mikindoo 'a, huu Ana pili nala nggi ena.
16 Kristus Ded'ea-'o'ola na ra o musi lole-lau hei ralam ma masod'a ma ra boe. Ded'ea-'o'ola' naa ra 'ona' hata-heto mafelit soa' neu nggi. Ara ratud'u dala' neu nggi fo bisa mihine dala' nae' tungga Lamatualain dud'u'a na. Basa fo ama bisa pake minori ma fee nesenened'a' neu esa noo esa. Mete ma minori atahori ma ra, na, 'afi' minori noo deres, te minori noo rala se'a-na'us ma sofe' noo rala mana no'e makasi nakandoo 'a. Pake sosod'a koa-kio' ra, sosod'a rohani' ra, ma sosod'at fo hei sura' ao ma ra fo so'u kokoa-kikio' neu Lamatualain. 17 Hei ia, dad'i Yesus Kristus lima 'onan ena. Dad'i misined'a, basa saa fo hei 'ola' ra, hei mendi nara na. Ma basa saa fo hei tao' ra, hei mendi nara na boe. De 'afi' lilii' tao basa-b'asa' e mendi' malanggam Yesus Kristus naran. Ma mo'e makasi mikindondoo' a neu Aman, Lamatualain.f
Atahori sarani' ra esa noo esa, musi rasod'a ta'o bee?
18 Sao ina' ra, e! Ama musi tob'a ma rena-rena' sao ma ra, huu naa nandaa neu atahori mana tungga neu Yesus Kristus.g
19 Sao tou' ra, e? Ama musi sue sao ma ra, ma 'afi' laka-ese se, fo tao rala na ra mera.h
20 Ana ngga ra, e! Ama musi tob'a ma rena ina-ama ma ra sia basa dala' ra, te naa mana tao Lamatualain ralan namaho'o.i
21 Ina-ama' ra, e! 'Afi' tao deres mbali ana ma ra, naa fo rala na ra 'afi' mera ma rambed'a' rala' roo nggi.j
22 Atahori mana tao ues ra, e! sia raefafao' ia, hei musi tao tungga malanggam sia basa dala' ra. 'Afi' sangga' a rala' lele' ara rita nggi. Sangga dala' fo tao mimiho'o se mikindoo 'a. Tao-ues sia basa dala' ra noo matetu', huu mihine mae, Lamatualain memete' nggi. 23-24 Hei tao sa o, tao noo manggatee'. Hei musi tao-ues 'ona' hei tao fee Lamatuam Yesus Kristus boe, te nda tao fee neu atahori sa. Huu hei mete-se'u E. Dei fo Ana bala-b'ae ue-tatao ma ra noo hata-heto'. 25 Te mete ma hei nda tao-ues noo matetu' sa, na, dei fo Ana huku-d'oki nggi. Huu Eni ndoo-meu' ma nda mete mata' sa.k