2
Hei mana leo sia kota Kolose, ma mana leo sia kota Laod'ikia, ma nda mana fe'e randaa roo au sa. Rena malolole! Au nau fo basa e bub'ulu' au manggate ue-tatao fee neu nggi, ma fee neu se boe. 2 Au masud ngga 'ae tao basa se rala na ra manggatee, fo ara ra'ab'ue reu esa huu rasod'a esa sue esa. Ara ramahere teb'e, huu rahine teb'e Lamatualain masud na fo ma'ahulun mana ma'afuni' a. Mana ma'afuni' naa, naeni Kristus! 3 Mete ma hei nenepa'a-sii' mi'ib'ue moo Kristus ena, dei fo Ana fee basa dud'u'at fo mae mi'ena' a, ma nanori hei nendi' dud'u'at naa fo tao dala malole' ra. Dud'u'at ia ra 'ona' hata-heto mafelit e.4 Au 'ufad'e hei basa dala' ia ra, naa fo atahori 'afi' rema peko-leleko' nggi noo maa mina na ra. 5 Mema' au leo 'u'ud'o' 'oo nggi. Mae ta'o naa o, au nda lilii' nggi sa, huu rala ngga na'ab'ue neu esa noo nggi. Au o 'umuho'o, huu au bub'ulu' hei masod'a ma ra nandaa, ma fe'e to'u mihere' nemehere ma ra neu Kristus.
Hita mana ta'ab'ue too Kristus, hambu masod'a ndoo-tetu'
6 Huu fai ma'ahulun hei simbo Yesus Kristus dad'i Malangga ma ra, naa de ia naa, hei musi rena mikindoo E. Te Eni, fe'e dad'i hei Malanggam mana na'ena hak parenda nggi. 7 Mete ma hei misod'a nenepa'a-sii' moo E ta'o naa, na, hei 'ona' hau huu mana bau manggatee, huu 'okan nenesela' roman seli. Ma hei 'ona' ume manggatee', huu nenenefefela' sia netehuu manggatee'. Hei ma'ad'ere' mikindoo sia hei nemehere ma ra, 'ona' hei rena mala' naa. Hela fo rala ma ra sofe' noo 'a rala mana no'e makasi nekendoo' a, huu basa dala' fo Lamatualain tao fee nggi' ra ena.
8 Besa-b'esa fo ama 'afi' tungga atahori laen dud'u'a na ra, fo 'afi' rendi nggi lao hela dala ndoo-tetu' a. Ma 'afi' tungga atahori nenori mahinen nda mana na'ena huu-pata' sa. Te nenori na ra naa, lao' mia 'a atahori dud'u'a na ra, ma mia atoran raefafo' ra. Nenori' naa ra nda ma netehuu' sia Kristus sa.
9 Basa mana sia Lamatualain aon, hambu sia Kristus aon boe. Ma Kristus o dad'i atahori 'ona' nggita boe. 10 Huu hei mi'ib'ue moo Kristus ena ma dad'i atahori na ra, naa de Ana tao nggi dad'i matetu-manad'ai'. Te Ana lena' mia basa koasa ra ma mana to'u parenda' ra, mae malole' do de'ulaka'.
11 Lele' atahori Yahud'i ra sunat, ara 'uta hendi mamae na ra rou tonggon fo dad'i tatanda 'oi, sira, Lamatualain atahori na ra. Lele' hei dad'i Kristus atahori na ra, hei o ‘sunat’ boe. Eni masud na ta'o ia: sunat ia nda so'al atahori 'uta hendi ao roun sa, te so'al Kristus 'uta hendi basa dala-d'ala de'ulaka' ra mia rala ma ra. Naeni, dala-d'ala de'ulaka' fo hita hii' a tao huu hita ia ra, atahori.
12 Lele' ara sarani nggi rendi' oe, naa 'ona' ne'oi nggi mi'ib'ue moo Kristus. De hei hambu masod'a feu' 'ona' Ana hambu masod'a feu' boe. Hei hambu ta'o naa, huu hei mimihere mae, Lamatualain pake Koasa manaselin, fo tao nasod'a bali' Yesus Kristus mia mamate na. Ana o ue-tao sia rala ma ra nendi' koasa naa boe.a
13 Fe'esa'an, hei 'ona' mates ena, huu sala-kilu ma ra mata'-mata', boe ma hei nda fe'e dad'i mii Lamatualain atahori na ra sa. Mae 'ona' naa o, Ana soi-tefa nala basa sala-kilu ma ra, ma fee masod'a feu' neu nggi 'ona' Ana tao nasod'a bali' Kristus.b 14 Matetun, hita musi nenehukun, huu hita talena-langga neu Lamatualain hohoro-lalane na ra. Te Ana soi-tefa nala sala-kilu ta ra, lele' Kristus nenembaku' mia hau nggangge' a.c d 15 Sia naa, Ana nasenggi' basa koasa-koasa ma'ahatu' noo mana to'u parenda de'ulaka' ra. De Ana na'amamae' se mia atahori nae' mata na ra. Naa 'ona' sold'ad'u ra rasenggi' musu a, de bali' ma tao pawe rereo' fo ratud'u musu fo sira rasenggi' ra.
16 Mete ma atahori rae ra'atutud'a' nggi sia dala nanaa-nininu' ra, na, 'afi' taoafi' neu se. Ma mete ma atahori rae ra'asesenggi' roo nggi so'al fai-fai malole' ra, do feta fula feu', do hohoro-lalane fai hahae ao', na, 'afi' rena se.e 17 Ded'eat mata' naa ra, nda pantiin sa! Huu ded'eat naa ra 'ona' salao', mana dei fo sambu-lalo hendi neu' ena. Te Kristus naa, matetu'. Ana sia nakandoo 'a.
18 Mete ma atahori rae ra'atutud'a' nggi, huu hei nda tungga hohoro-lalane' fo ara tao' ra sa, na, 'afi' rena. Te, mete ma hei rena se, na, hei nda bisa simbo dala-d'ala malole' fo Lamatualain nae fee nggi' a sa. Te besa-b'esa, e! Te mema' hambu atahori hii sangga dala' fo ra'atutud'a' nggi. Ara nau hei musi leo-lao miloe-mid'ae ao ma ra, ma songgo neu Lamatualain ate na ra sia nusa tetu', huu ara rae ne'o hambu meit natud'u neu se ta'o naa. Ara rae sira malole' lena' atahori laen ra. Tao-tao te nda ta'o naa sa! Huu dud'u'a na ra 'ona' atahori ra boe. 19 Ara nda nenepa'a-sii' roo Kristus sa. Tao-tao te, Eni malangga. Ma atahori na ra 'ona' eni aon fo Eni mete-se'u' a. Ana tao fee atahori na ra ma'ad'ere' nendi' Lamatualain koasa na. Noo ta'o naa, ara dad'i 'ona' ua' noo rui' nenefutu manggatee' fo esa tulu-fali esa, losa ao-sisi' bisa tao ues noo malole'.f
Mete ma hita nenepa'a-sii' too Kristus, na, hita hambu masod'a feu'
20 Hei mate mi'ib'ue moo Kristus ena. De hei nda 'afi' nenepa'a-sii' moo koasa ma'ahatu' a sia raefafo' ia sa. Te, ta'o bee de hei fe'e tungga neu raefafo' a hohoro-lalanen mata'-mata' fai? Ara rae ta'o ia: 21 “'Afi' to'u ia; 'afi' mua naa; 'afi' nggama ia.” 22 Hohoro-lalane' naa ra, atahori mana tao, fo ranori neu atahori ra. Te huu hohoro-lalane' naa ra mete-se'u neu 'aka' dala-d'ala mana sambu-lalo'! 23 'Ona' atahori bisa tao tungga hohoro-lalane' naa ra, rae ne'o dei fo atahori fee had'a-hormat neu se, ma 'oi sira mahine na ra seli, atahori mana tungga agama teb'e-teb'e', mana maloe-mad'ae ralan, mana tao doid'oso ao na ra. Tao-tao te hoko'! Hohoro-lalane' ra nda nalole-nalau nala malole' atahori dud'u'an ma ralan fo mana hii tao de'ulaka' sa!