2 Au 'o'e ina karua' naa ra, naeni Yod'ia noo Sinteke, fo sud'i rareresi fai. Sira ru'a se musi bad'ame fo rasod'a dame esa noo esa. Huu ru'a se Malanggan esa, naeni Yesus. Naa de ara nenepa'a-sii' esa noo esa.

3 Nonoo mana tao ues ngga, e! Au 'o'e fo ator mala ina karua' ra dei, losa esa malole noo esa. Te ma'ahulun, ru'a se o manggate tao-ues fo tulun au rafad'e atahori so'al Lamatualain Hara-lii Malole na. Ru'a se o tao-ues 'ona' naa boe roo Klemens, ma nonoon ruma boe. Basa se nara na ra nenesura' sia Lamatualain susuran fo mana sura' basa atahori mana dei fo rasod'a ra'ab'ue roo Yesus sia nusa tetu' a.

4 Huu hei dad'i Lamatua' atahorin ena, naeni de rala ma ra musi ramaho'o hatu'-rerelo na. Au 'ufad'e selu' fai: tao rala ma ra ramaho'o rakandoo 'a!

5 Hei rala ma ra musi malole' moo basa atahori. Ma 'afi' lilii', mae Lamatua' Yesus deka nema ena. 6 Mete ma hei hambu sususa', na, 'afi' du'a-d'u'a' saa boe. Te hule-o'e mo'e Lamatualain tulu-fali nggi sia basa' e. Basa saa fo hei mo'e' naa ra, 'afi' lilii' mo'e makasi neu E. 7 Mete ma hei tao ta'o naa, na, dei fo Lamatualain fee rala ma ra nee-nee lino-lino. Mema' atahori nda bisa rahine teb'e-teb'e' rala mana nene-nee lino-lino' fo ata hambu mia Lamatualain a sa. Te, huu hei mimihere neu Yesus Kristus, de Lamatualain mana fee rala ma ra nene-nee lino-lino a, nau nanea nggi fo rala ma ra 'afi' ramue-raanggi.

8 Toronoo ngga ra, e! Matetun ta'o ia: 'afi' dud'u'a leli. Minea rala ma ra ma du'a neu 'a dala-d'ala' fo mana ndaa noo Lamatualain ralan, ma du'a dala malole' ra, fo mana tao nemeho'o atahori rala na ra. Hei musi du'a ndoos ma meumare'. Dud'u'a dala-d'ala ndoo-tetu' ma malole' ra. Sangga dala' fo atahori fea' bisa nenefee had'a-hormat. Sangga dala' fo atahori laen ra hambu had'a-hormat. Sangga dala' fo so'u dala malole' ra. 'Afi' miloe' dud'u'a basa dala malole' ra. 9 Au o 'unori nggi tungga Lamatualain dala masod'a na. Hei musi mete neu au dala masod'a ngga, ma tungga basa saa fo au 'ola' 'oo nggi ma tao' ra. Mete ma hei tungga ta'o naa ena, na, Lamatualain tao manggatee rala ma ra fo hei rala ma ra nee-nee lino-lino ma bisa misod'a noo sod'a-mole' boe.

10 Au 'o'e makasi ma koa-kio Lamatualain, huu hei nda lilii' au sa. Mema au bub'ulu', fe'esa'an, hei misined'a au, te nda fe'e ka'e mala fo tulu-fali au sa. 11 Au nda 'u'ena masud 'o'e saa sia nggi sa boe. Au nda 'umed'a to'a-taa saa sa boe ena, huu au 'unori ao ngga ma'ahee 'oo saa fo 'u'ena' a ena. 12 Au o parnaa 'usod'a lima rou' boe. Ma au o parnaa 'usod'a hambu basa-b'asa' e boe. Au o 'umed'a ndoe-la'as ma 'u'ub'eta boe. Sia sud'i 'a dala' saa, au 'unori 'ala nggoen ena fo bisa 'u'utataa' 'usod'a. 13 Au bisa lemba-'usaa basa dala' ra, huu Kristus mana tao ma'ad'ere au!

14 Mae ta'o bee o, au 'o'e makasi, huu hei mitud'u rala malole ma ra, ma tulu-fali au sia sususa ngga. 15 Fe'esa'an, lele' au lao hela profinsi Maked'onia de 'uu dui-b'engga Lamatualain Hara-lii Malolen sia mamana' laen ra, 'aka' hei mia Filipi mana fee doi dala'. Atahori sarani' laen ra, hoko'. Te hei bub'ulu' dud'uit naa ena. 16 'Ona', lele' au mia kota Tesalonika o, hei haitua fee au doi' lao esa do rua boe, fo tulu-fali au.^a 17 'Ale' ia au nda 'u'ena masud 'o'e saa sia nggi sa ena boe. Te au 'o'e fo Lamatualain bala-b'ae fee nggi papala-b'ab'anggi' huu rala ma ra malole' moo au. 18 Au simbo 'ala mia Epafrod'itus basa tutulu-fafali' fo hei haitua fee au' ra. Naa dad'i papala-b'ab'anggi' fee au, de losa ia nema au nda to'a saa sa boe. Naa o dad'i tutunu-hohotu ma'ameni', fo atahori lalangge fo be'utee neu Lamatualain. Ma Lamatualain o simbo noo malole tutunu-hohotu' naa, huu naa tao fee ralan namaho'o.^b

19 Lamatualain fo au be'utee neu' naa, mamasu'in lena' basa e. Ma Ana bub'ulu' teb'e saa fo hei parluu' a. Ma dei fo Ana natud'u rala malolen ma fee nggi papala-b'ab'anggi' mia Eni su'i mandete-masa'an, huu hei nenepa'a' moo Yesus Kristus ena. 20 Dad'i hela neu fo hita so'u tananaru Ama' Lamatualain naran, losa doo ndu'u-d'oon neu. Naa ndaa ena!

21 Ama mifad'e hara sod'a-mole' ngga neu basa atahori mana tungga Yesus Kristus sia Filipi.

Nonoo ngga ra mana sia ia ra o, fee hara sod'a-mole' neu nggi boe.

22 Basa atahori mamahere' sia Roma ia o, fee hara sod'a-mole' boe.

Toronoo mana tao-ues sia mane monae' a ume panggat na o, fee nggi hara sod'a-mole' boe.

23 Au 'o'e fo hita Malanggan Yesus Kristus, natud'u rala malolen neu basa nggi boe.