Lamatualain simbo atahori, huu ramahere neu Yesus Kristus
3
Toronoo ngga ra, e! Rena malolole! Rala ma ra musi ramaho'o, huu hei nenepa'a-sii' moo Kristus. Hela fo au sura' 'usufafali ta'o ia, te au nda bengge fee nesenened'a' neu nggi fo ama 'afi' nenepepeko-leleko'!2 Besa-b'esa moo mana peko-leleko' mana nau ra'asusuu' atahori rae, “Hei musi sunat fo dad'i tatanda' 'oi, hei, Lamatualain atahori na ra ena.” Tao-tao te, Lamatualain nda parenda ta'o naa sa! Ara sala ena! Mae 'ona' naa o, ara fe'e 'use-'oi atahori 'ona' busa de'ulaka'. 3 Huu ara rae Lamatualain simbo atahori huu ara sunat. Te naa sala! Hita bub'ulu' ena tae, Lamatualain simbo atahori huu ramahere Yesus. Dad'i Lamatualain atahori ndoo-tetu na ra, naeni hita mana tamahere neu Yesus! Hita mana be'utee tungga Dula-d'ale Meumare na. Hita mana so'u tananaru Yesus Kristus, huu Ana soi dala' de hita dad'i Lamatua' atahorin ena. Te hita nda bisa hambu masoi-masod'a' huu tungga atahori ue-taon sa.
4 Fe'esa'an, au o du'a sala 'ona' sira boe. Au 'ae, atahori dad'i Lamatua' atahorin sad'i ara sunat. Tao-tao te naa atahori ue-tataon! Mete ma tae 'ola' atahori ue-tataon, na, au bisa 'ola' koao lena' basa naa ra, huu fe'esa'an au ue-tao ngga tungga tetu-tetu basa atahori Yahud'i ra agaman hohoro-lalane na. 5-6 Tungga agama hohoro-lalanen, ina-ama ngga ra sunat au eni' a fe'e fai falu. Au ia, atahori Yahud'is, huu au mia leo Benyamin, nufa-nelu' mia ba'i Isra'el. Au manggate tungga tetu-tetu basa hohoro-lalane' partei agama Farisi ra, de nda hambu atahori esa bisa fee sala' mbei neu au sa boe. Lelenan fai, au manggate tao doid'oso atahori mana tungga Kristus, huu au du'a 'ae, atahori ia ra nggari hendi hita agaman hohoro-lalanen ena.a
7-8 Te doo-d'oo ma dud'u'a ngga nasafali, lele' au tungga bali' Kristus. Dad'i ia naa au nda koao 'oo masod'a ma'ahulu ngga naa sa, huu naa ra nda ra'ena sosoa ndaa-ndaa' fee au sa ena. Saa fo au du'a 'ae manaseli', naeni: au bisa 'uhine Yesus Kristus, mana na'ena hak parenda au. Basa dala' laen ra, au du'a 'ae naa ra 'ona' afu-rae. 9 Au 'ae 'usod'a 'u'ub'ue 'oo Yesus Kristus. Huu, mae au tungga basa agama hohoro-lalanen o, nda fe'e bub'ulu' Lamatualain simbo au sa. Boe ma mae au 'ae au ao ngga ndoo-tetu' o, nda fe'e bub'ulu' Ana simbo au sa boe. De au musi 'umuhere neu Yesus Kristus, dei fo Ana simbo au nae, “Huu Kristus 'ose hendi sala-singgo ma ra, naa de ho dad'i meu' ena.”
10 De au hihii ngga ta'o ia: au 'ae 'uhine matalolole Kristus. Au o 'ae 'uhine teb'e-teb'e' Lamatualain koasan, fo Ana pake tao nasod'a bali' Yesus Kristus mia mamate na. 'Ita' mbei ma atahori rae ra'asususa' au huu tungga Yesus Kristus o, hela neu. Te atahori o ra'asususa' Kristus boe. Ma 'ita' rae risa au huu au mete-se'u atahori o, au simbo boe. Te Kristus o mate huu au boe. 11 Ma mete ma au mate, na, dei fo Ana o tao au 'usod'a bali' boe.
Ata manggate fo tungga teb'e-teb'e' Lamatualain dalan
12-13 Toronoo ngga ra, e! Au nau tungga basa Kristus dala masod'an ma hihii-nanau na. Te mete ma 'ola' noo ndoos, au nda fe'e tungga matetu' ta'o naa sa. Naa de au 'umburii' 'uhere', huu Yesus Kristus pili nala au ena fo tungga E ta'o naa. Au 'ona' atahori mana tungga nasesesu' fo losa nggaris mate'e na. Dad'i au 'ela' ndoos mata' 'uu, nda heo' dea ngga fo dud'u'a dala ma'ahulu ngga ra sa. Au lilii' hendi se ena. 14 Te au 'ela' 'uhere' losa nggaris matete'en, fo hambu beker. Au beker ngga, naeni: dei fo Lamatualain simbo au sia nusa tetu', huu 'umuhere neu Yesus Kristus.
15 De au hule fo basa hei mana mori ma mi'oka mihere' sia Kristus, rala' sa moo basa dala' ia ra. Te mete ma hambu dud'u'a fea', na, hela fo Lamatualain natud'u dala sosoi malole'. 16 Te 'ona' naa o, hita musi to'u tahere' ma tao tungga basa dala matetu', fo Lamatualain nanori hita' ra ena.
17 Basa toronoo ngga ra, e! Hei musi mete au dala masod'a ngga. Hei ruma sia naa dala masod'a ma ra o 'ona' au ena boe. Te bee fe'e hoko', na, minori malolole mia se, fo tao tungga ta'o naa boe.b 18 Besa-b'esa moo atahori mana lab'an Kristus, ma nda mana simbo malole' mamaten sia hau nggangge' a sa. Sira dala masod'a na ra ratud'u sira lab'an Kristus. Au 'ufad'e hei atahori 'ona' naa ra dala na ra ena, te ia naa au 'ufad'e selu' noo luu oe'. 19 Te dei fo Lamatualain timba hendi se, ma nggari se risi' mamana huku-d'oki' a, huu rala na ra nda nenepa'a-sii' roo E sa. Ara to'u rahere' dala-d'ala de'ulaka', ma sangga-sangga' a dala' fo tao ramaho'o ao na ra losa koao rendi' de'ulaka na ra. Ara nda mae rahine sa. Ara du'a 'ona' a atahori nda mana rahine Lamatualain sa.
20 Ama 'afi' tao tungga se, te tao tungga 'a hai. Huu hita dad'i Lamatualain atahorin ena, ma to'u hak atahori nusa tetu' ena. Ia naa hita nea-nea hita Malanggan Yesus Kristus. Ana nae nema mia nusa tetu' a fo mbo'i nggita mia Lamatualain nasab'ori na. 21 Dei fo Kristus 'ub'a hita ao mana noen mana bisa mate' ia, dad'i ao feu' nda mana mate' sa, 'ona' ao mandete-masa'aa na. Ana 'ub'a hita ao na ra, nendi' koasa monae na. Ana o pake koasa naa fo tao basa' e sia bee-b'ee be'utee tungga Eni parenda na.