Lamatua' Yesus atahori na ra musi rasod'a reu esa, 'ona sira dad'i Eni aon
4
Au 'ulalao Lamatua ngga ue-tataon, losa au dad'i atahori bui. De ia naa, au 'ae kokoe nggi fo ama leo-lao noo matetu' tungga Lamatualain hihii-nanaun, huu Ana no'e nala nggi dad'i atahorin ena. 2 Huu naa, hei musi misod'a miloe-mid'ae ralam, ma misod'a esa malole noo esa ma esa sue esa. Musi mi'itataa' ma mihine esa noo esa hihii-nanau na. Mete ma sia hei e, hambu esa sangga hal noo nonoon, na, 'afi' mimbed'a' rala'.a 3 Sangga dala teb'e-teb'e' fo misod'a esa bad'ame noo esa, huu Lamatualain Dula-d'alen tao nggi dad'i esa ena. 4 Huu Yesus Kristus atahori na ra dad'i reu esa 'ona' Eni ao hehelin ena. Ma basa se simbo Lamatualain Dula-d'alen fo isek 'a. Basa se ramahena neu 'a Lamatualain, huu Eni mana no'e se dad'i reu atahori na.5 Hita Lamatuan, mana na'ena hak parenda nggita, 'aka' esa 'a;
Hita tamahere ta ra, 'aka' dala' esa 'a,
fo bisa bad'ame too E.
Ma basa hita simbo sarani',
fo nenepa'a' too E.
6 Lamatualain, 'aka' esa 'a,
Ma hita Aman, 'aka' Eni.
'Aka' Eni mana parenda basa hita.
'Aka' Eni mana na'ab'ue noo basa hita.
Ma 'aka' Eni mana nasod'a nakandoo sia basa hita rala na.
Kristus fee ue-tataos mata'-mata' fo atahori na ra boe ma'ad'ere
7 Yesus Kristus banggi koasan fee neu nggita ena, fo hita esa-esa' talalao Eni ue-tatao na. 8 Naa de Lamatualain Susura Meumaren sura' nae,
“Ana hene nisi' mamana naru',
fo natati sia naa losa nasenggi'.
Basa fo, noo bali' atahori nenehumu nala' ra naen seli,
ma banggi-b'a'e hahambu' fee atahori.”b
9 (Misined'a ded'ea-'o'ola' 'oi, “Ana hene”. Mete ma Ana hene, naa sosoan nae, lele ulu' a Ana 'onda nita raefafo' nema. 10 Dad'i atahori mana 'onda' naa, naeni Kristus. Huu Eni mana hene bali' sorga neu, fo mete-se'u basa-b'asa' mana sia lalai noo raefafo'.) 11 Kristus mana fee koasa neu atahori na ra, fo ara ralalao ue-tataos fo Ana banggi basa fee se ena. Ana fee koasan neu ruma dad'i ded'enun, ruma dad'i mana 'ola-'olan, ruma dad'i manatad'a soa' neu atahori na ra, ruma dad'i atahori mahine' mana ranori Eni atahorin, ma ruma fai dad'i mana nendi Hara-lii Malole' nisi' mamana-mamana feu' ra. 12 Esa-esa' simbo ue-tataon fo tao rehehere Kristus atahori na ra, fo basa se bisa ralalao Eni ue-tatao na. Noo ta'o naa, basa hita mana tamahere neu Kristus boe ma'ad'ere, 13-14 losa basa hita tamahere noo rala' esa. Ma basa hita tahine teb'e-teb'e' Lamatualain Ana na. Hita nda 'ona' anad'iki' sa ena, huu hita tungga teb'e-teb'e' dalan ena, ma dad'i atahori mana nasod'a tungga basa Eni hihii-nanau na. Mete ma tasod'a 'ona' naa ena, na, hita nda 'ona' 'amba mana sob'o mbana', fo lea e bee neu na ana tungga-tungga 'a. Te mete ma mana peko-leleko' ra rema ranori dala peko-leleko', na, ara nda ranggonggoa hita sa ena.
15 Te hita 'ola 'a malole' tungga matetun fee toronoo ta ra, huu hita sue se. De mete ma tasod'a 'ona' naa sia sud'i 'a dala' bee, hita dad'i 'ona' Kristus. Te Eni, hita Malanggan mana mete-se'u nggita. 16 Ma hita ia, 'ona' Eni ao na. Mete ma atahori lima-ein ma mbana-b'afan esa tao ues tulun esa tungga esa-esa' ue-tataon, na, aon boe ma'ad'ere. 'Ona' naa boe Kristus atahori na ra. Mete ma hita esa sue esa ma esa tulu-fali esa, na, basa hita o bau ma'ad'ere boe.c
Lao hela dala masod'a mbaraa' a fo tungga dala masod'a feu' a
17 Rena malolole saa fo au 'ae 'ola' ia, huu Lamatua ngga mana nafad'e au. Ama 'afi' sud'i misod'a 'ona' atahori nda mana nahine Lamatualain sa. Te saa fo ara tao' naa, tungga 'a nggoa na ra. 18 Ara lao' leli, 'ona' atahori lao' sia ma'ahatu'. Ara leo saranggaa roo Lamatualain, huu langga fatu ma nda nau rena E sa. 19 Ara nda rahine mamaet sa ena. De ara tungga 'a hihii-nanau na ra, ma rasod'a manggenggeo'. Te ara o nda med'a rae naa dai ena sa boe.
20 Te Kristus dala masod'an, fo hei minori' a, nda ta'o naa sa! 21 Huu saa fo hei minori so'al Yesus Kristus, mema' nenori ndoo-tetu'. Ne'o hei rena ena, to! 22 Dad'i lao hela masod'a mbaraa ma ra! Te mete ma misod'a manggenggeo' tungga 'a atahori hihii-nanaun, na, hei nenepepeko-leleko' ta'o 'a naa ena. Hei nda mi'ena hak sia naa sa ena.d 23 Te hela fo Lamatualain tao rala-d'ud'u'a ma ra dad'i feu', 24 fo ama dad'i atahori feu' 'ona' Eni mata-aon boe. Dad'i hei musi mitud'u rala feu', mana ndoos ma meumare'.e
25 De ia naa, miloe' peko-leleko' leo! Esa 'ola' ndoo-tetu' noo esa, huu basa nggita nenepa'a' dad'i esa, 'ona' ao' esa na'ena ei-lima' ma mbana-b'afa'.f 26 Mete ma miminasa, na, 'afi' miminasa losa ama tao sala'. Malole lena' ama malolole leo! 'Afi' mimbed'a' nasat losa relo a mopo!g 27 Noo ta'o naa, nitu ra malanggan nda bisa sob'a-d'ou nala nggi sa. 'Afi' fee ne hambu kaka'et mbei boe. 28 Atahori mana hii 'a ramana'o, miloe' leo! Malole lena' atahori 'ona' naa tao ues noo malole' nendi' lima hehelin, fo ana bisa bab'anggi buna-b'oa' noo atahori mana tud'a-loloe' ra. 29 Mete ma 'ola', na, 'afi' 'ola' de'ulaka', mae 'aka' ded'ea-d'eke' esa 'a! Malole lena' 'ola' malole'. Ma fee nenori' neu atahori, fo tulun teb'e-teb'e' se, ma tao manggatee rala na ra. 30 'Afi' namera' Lamatualain Dula-d'ale Meumaren ralan, te Ana sia rala ma ra. Ma Ana hengge-nee hei ena nae, hei ia Lamatualain 'ena na. Dula-d'alen o fee tatanda nemehere' 'oi, losa fai matete'en, na, Lamatualain fee masoi-masod'a' neu nggi fo misod'a mikindoo moo E. 31 De 'afi' mimbed'a' rala' moo atahori laen! 'Afi' mingginggio mbali atahori! 'Afi' miminasa! 'Afi' mitofa-miuu'! 'Afi' mi'imuti atahori nara na. Ma 'afi' tao dala de'ulaka' laen ra fai! 32 Malole lena' hei esa sue esa, ma esa tao dala malole' noo esa. Hei musi lilii' hendi atahori sala-kilu na ra, ma fee ambon neu e, 'ona' Lamatualain 'ose hendi sala ma ra, huu hei nenepa'a' moo Kristus ena.h