Paulus nendi Hara-lii Malole' fee atahori nda Yahud'i ra sa
3
Huu Lamatualain nda pili-tad'a atahori Yahud'i roo atahori nda Yahud'i ra sa, naa de Ana denu au, Paulus, 'uu dui-b'engga Yesus Kristus Hara-lii Malolen neu hei atahori nda Yahud'i ra sa sia kota Efesus. Au 'ulalao ue-tatao ngga naa, losa au dad'i 'uu atahori bui ena. 2 Tantu hei o bub'ulu' mae, Lamatualain denu au, huu Ana nae natud'u rala malolen neu nggi. 3 Mema' ma'ahulun a Lamatualain nda fe'e nafad'e atahori, so'al saa fo Ana na'etu' fee atahori nda Yahud'i ra sa. Te ia naa nafad'e dala' ia neu au ena. De ia ra, au sura' 'e'eku' fee neu nggi ena. 4 Mete ma hei baca basa ena, na, hei o bisa mihine Lamatualain dud'u'an so'al Yesus Kristus, fo Ana natud'u neu au ena. 5 Te dalahulun, atahori nda fe'e rahine Eni dud'u'an sa. Te ia naa, Ana pake Dula-d'alen fo nafad'e dud'u'an neu mana 'ola-'ola na ra ma ded'enu na ra. 6 Te mia dalahulun, Lamatualain na'etu' basa ta'o ia: mete ma atahori nda Yahud'i ra sa ramahere Yesus Kristus Hara-lii Malolen, na, ara o bisa maso' dad'i Lamatualain ana na ra, 'ona' atahori Yahud'i ra boe. Naa de, ia naa hita dad'i bob'onggi' esa ena, ma ata bisa simbo papala-b'ab'anggi' mia hita Aman Lamatualain.7 Lamatualain natud'u rala malolen ma pili au dad'i ded'enu na. Ma Ana o fee koasan neu au, fo 'ulalao Eni ue-tatao na. 8 Mia basa Lamatua' atahori na ra, au ia atahori anad'iki' lena'. 'Ona' naa o, Lamatua' pili au fo 'ulalao Eni ue-tatao manaseli na. Ana nau fo au 'ufad'e atahori nda Yahud'i ra sa, so'al Kristus rala malolen, nda mana'etu' ma nda manabasa' sa. 9 Te eni' a Lamatualain na'ad'ad'ad'i' raefafo' ia, Eni dud'u'an nae denu Kristus nema, ma'ahulun fe'e ma'afuni'. Te ia naa, Ana nau fo au 'uu fee basa atahori bub'ulu' dud'u'an naa. 10 Te dud'u'an naa mahinen seli. Ma Ana nae pake atahori na ra fo reu ratud'u mahinen naa, neu basa koasa ma parenda' mana sia lalai ra. 11 Lele' Ana nda fe'e na'ad'ad'ad'i' raefafo' ia sa, Ana na'etu' basa nae soi dala' fo fee masoi-masod'a' neu atahori. Naa de, Ana denu hita Lamatuan Yesus Kristus, fo tao tungga ta'o naa. 12 Huu naa, hita mana tamahere neu Yesus Kristus, 'afi' tamatau tema 'ola-'ola' too Lamatualain. Huu Ana nau simbo hita, sud'i 'a fai' bee.
13 Misined'a, e! Au doid'oso huu mete-se'u hei, atahori nda Yahud'i ra sa. 'Ona' naa o, rala ma ra 'afi' ra'ana. Huu au lemba doid'oso' ia, naa fo hei simbo mala malole na.
Paulus hule-o'e no'e makasi mbali Lamatualain
14 Lele' au du'a 'ala Ama' Lamatualain rala malolen manaselin naa, ma au sende' lulu-langga ngga hule-o'e 'o'e makasi neu E. 15 Huu basa bob'onggi' mana sia raefafo' ma sorga Aman, naeni Eni.
16 Au hule-o'e fo Ana fee papala-b'ab'anggi' nae' neu nggi tungga rala malole manaseli na.
Au o 'o'e fo Ana fee Dula-d'alen ma koasan, fo rala ma ra boe manggatee.
17 Au 'o'e fo Yesus Kristus leo sia rala ma ra, huu mimihere mikindoo neu E.
Au o hule-o'e fo hei misod'a mi'ib'ue moo susuen, 'ona' hau huu' mana mori mahere', huu 'okan nandoro rae rala neu roma'.a
18-19 Au o hule-o'e, fo hei moo basa Lamatua' atahori na ra, bisa mihine Kristus susuen fo atahori nda bisa uku rala e sa. Huu susue' naa, monaen seli, loan seli, roman seli, ma naen seli!
Au hule-o'e fo hei o med'a Eni susuen, losa susue' naa nasofe ralam ma masod'a ma ra.b
20 Lamatualain koasan manaseli', lena' basa saa fo hita bisa to'e' a, ma mia saa fo hita bisa du'a' a. Ma Ana ue-tao sia hita ralan nendi' koasa manaseli na. 21 Huu naa, hita mana ta'ab'ue too Yesus Kristus, 'ima fo ata so'u tananaru E! Koa-kio takandoo E, mia fai' ia losa doo ndu'u-d'oon neu. Naa nandaa!