Atahori mana ramahere neu Yesus Kristus simbo masod'a feu'
2
Dalahulun, hei milena-langga neu Lamatualain parenda na ra, ma tao sala' mata'-mata'. Naa de Ana nae hei 'ona' atahori mates. 2 Dalahulun, misod'a tungga 'a raefafo' ia hihiin, ma tungga nitu ra malanggan hihii na. Losa fai' ia, nitu naa fe'e kokoe atahori, fo lab'an Lamatualain. 3 Ma'ahulun, hita masod'a ta ra 'ona' naa boe. Losa saa fo hita med'a, do, du'a, hita tao tungga 'a hihii-nanau ta ra. Hita tao de'ulaka' 'ona' atahori laen ra boe, naa de Lamatualain namanasa nala hita seli, 4-5 ma Ana nae hita o 'ona' atahori mates mana sarangga mia E. 'Ona' naa o, Ana kasian nggita, huu Ana sue naseli' nggita. Naa de Ana natud'u rala malolen ma fee Yesus Kristus nema nendi masod'a feu' soa' neu nggita. Dad'i Lamatualain mana fee masoi-masod'a' neu nggita, huu rala malole na.a 6 Yesus Kristus mate, te Lamatualain tao nasod'a bali' E. Boe ma Lamatualain so'u E to'u parenda' sia sorga. Lamatualain o tao 'ona' naa neu nggita boe. Ana fee masod'a feu' neu nggita, basa ma ana so'u nggita, fo to'u parenda' ta'ab'ue too Kristus sia sorga. 7 Noo ta'o naa, eni' a fai' ia losa doo ndu'u-d'oon neu, Lamatualain natud'u susuen naen seli, ma rala malole maselin, huu tamahere neu Yesus Kristus.8-9 Lele' hei mimihere Kristus, Lamatualain fee masoi-masod'a' neu nggi huu rala malole na. Ana fee masoi-masod'a' 'ona' naa, nda neu bala-b'ae' soa' neu saa fo hei tao' a sa. Naa bab'anggi' fo Ana fee neu nggi deo-d'eo, naa fo hei nda hambu dala' fo koa saa fo hei tao' a sa.b 10 Hita sia, huu Lamatualain na'ad'ad'ad'i' nggita. Basa ma, Yesus Kristus fee masod'a feu' neu nggita, naa fo sia hita masod'an, hita bisa tao dala malole' fo Lamatualain na'etu' mema' eni' a dalahulu na.
Lamatualain simbo noo malole' atahori mia basa nusa' ra
11 Toronoo ngga ra, e! Hei bub'ulu', atahori Yahud'i ra to'u rahere' sira atoran sunat na, ma ara raloe-rad'ae hei atahori nda Yahud'i ra sa. Huu hei nda tungga sira atoran na ra sa! Tao-tao te naa 'aka' atoran so'al atahori ao-sisin, nda so'al atahori ralan sa. 12 Lele' hei nda fe'e mimihere Yesus Kristus sa, hei nda mi'ena hak fo maso' dad'i Lamatualain atahorin sa. Te fe'esa'an, hei nda fe'e maso' sia Lamatualain hehelu-fufulin noo Abraham ma tititi-nonosi na ra sa. Lele' naa, hei leo sia raefafo' ia ma nda bisa mimihena Lamatualain sa, huu hei fe'e dad'i atahori fea', 13 mana sarangga mia Lamatualain. Te ia naa, Yesus Kristus soi dala' fo hei bisa nenepa'a' moo Lamatualain ena. Huu Kristus mate de tao ma'asufu Lamatualain ralan, fo hei bisa bad'ame moo E, ma bisa dad'i atahorin boe.
14 Ma'ahulun, hai atahori Yahud'i nda bisa misod'a bad'ame moo hei mia nusa' laen ra sa. 'Ona' hambu tembok mana tao hita saranggaa. Te huu Yesus Kristus mate sia hau nggangge', de Ana nasea' hendi tembok naa, fo hita mana bamusu' ma'ahulun, bisa bad'ame bali' dad'i nusa' esa. 15 Te dalahulun, atahori Yahud'i ra sangga dala' fo rasod'a malole roo Lamatualain rendi' sira agaman atoran na ra. Te lele' Yesus Kristus mate, Ana nggari hendi dala mbaraa' de soi dala feu', naa fo atahori mia nusa Yahud'i roo atahori nusa' laen ra, bisa rasod'a malole roo Lamatualain. Noo ta'o naa, basa se ra'ab'ue reu esa dad'i nusa feu' esa, mana rasod'a noo mole-d'ame'.c 16 Dad'i Kristus mate sia hau nggangge', fo tao mana bamusu' ra dad'i reu esa, ma noo bali' se risi' Lamatualain. Huu Kristus sapu hendi basa' e fo ma'ahulun mana dad'i neu dala', de bamusu' ena.d 17 Ana raefafo' nema nendi Hara-lii Malole' fee atahori Yahud'i ma atahori laen ra boe nae, “Dalahulun hei bamusu', te ia naa hambu dala' fo misod'a esa dame noo esa.”e 18 De hai atahori Yahud'i ma hei atahori nda Yahud'i ra sa, hita hambu dala' tisi' Ama' Lamatualain, huu Yesus soi dala' fee basa hita ena. Ma Lamatualain Dula-d'ale Meumaren o natud'u dala' naa neu basa hita boe.
Yesus Kristus atahori na ra 'ona' ume hule-o'e'
19 Huu Yesus Kristus tataon naa, de hei atahori nda Yahud'i ra sa, nda atahori fea' ra sa ena, fo mana nda na'ena hak saa-saa sa boe. Huu ia naa, hei hambu hak dad'i rauinggu sia sorga, huu hei maso' dad'i Lamatualain bob'onggin ena. 20 Naa 'ona' Lamatualain nae naririi ume esa. Ana tao fatu netehuu', naeni Yesus Kristus. Boe ma nafefela fanderen, naeni mana 'ola-'ola na ra roo ded'enu na ra. Basa ma, Ana dama fatu ra reu ata. Fatu naa ra, naeni basa hita mana maso' dad'i bob'onggi na. 21 Ume naa nambarii' nahere', huu fatu ra nened'ama malole' sia fatu netehuu' a ata. Ma ume naa boe doo' boe na'amoko, losa atahori reu sia naa fo hule-o'e neu Lamatualain. 22 De ia naa, Lamatualain tao fo hei atahori nda Yahud'i ra sa dad'i 'ona' fatu, 'ona' hai atahori Yahud'i ra. Lamatualain na'atotod'o' basa hita, dad'i mamana leleo' soa' neu Dula-d'alen ena.