Esa tulu-fali esa
6
Toronoo ngga ra, e! Mete ma atahori mamahere' esa tao sala, na, hei mana mihine teb'e-teb'e' Lamatualain Dula-d'alen hihii-nanaun, mii 'ola' moo e noo rala malole'. Ma moo bali' e, fo ana tungga Lamatualain dala ndoo-tetu na. Ma minea ao ma ra fo 'afi' tud'a tungga sala na. 2 Mete ma atahori hambu sususa', na, hei laen ra tulu-fali e. Noo dala' naa hei tao tungga Kristus hohoro-lalane na. 3 Mete ma hambu atahori koa-koa' aon 'oi, eni lena' atahori laen ra, te nda ta'o naa sa, na, ana peko-leleko' bali' ao na. 4 Dad'i esa-esa' musi paresa' saa fo eni tao' a. Mete ma saa fo eni tao' naa malole' ena, na, ana ma'ahee. 'Afi' mi'isasama' ao ma ra moo atahori laen. 5 Au 'ola' ta'o naa, huu atahori esa-esa' musi lemba-nasaa saa fo eni tao' a. 6 Te huu atahori mana simbo Lamatualain nenorin, musi bab'anggi hahambu-d'ad'ain, fo tulu-fali atahori mana nanori e.7 Misined'a, e! Lamatualain bub'ulu' basa' e. De 'afi' peko-leleko' ao ma ra, ma 'afi' sob'a-sob'a peko-leleko' E. Te saa fo atahori sela sia osi, dei fo ana hambu bali' mbule-b'oa na. 8 'Ona' naa boe, mete ma atahori tao dala de'ulaka' tungga hihii-nanaun, dei fo ana hambu masod'a de'ulaka'. Te mete ma atahori tao dala malole' tungga Dula-d'ale Meumare' a hihii-nanaun, dei fo atahori naa hambu masod'a ndoo-tetu' nda mana 'etu' sa. 9 Huu naa, ama 'afi' mbera tao dala malole'. Te nandaa noo fain, na, hita hambu bali' malole', sad'i ata ta'atataa' takandoo. 10 De mete ma hita ka'e tala, na, tao malole' neu basa atahori, lelenan fai neu hita toronoo atahori mamahere ta ra.
Paulus nate'e susuran
11 'Oras ia au sura' ao ngga susura ia, 'endi' huruf monae'. 12 Misined'a, e! Mana peko-leleko' ra o ramahere Yesus Kristus mana mate sia hau nggangge' a. Te ara ra'asusuu' hei fo simbo sunat, huu ramatau atahori Yahud'i laen ra tuni-ndeni se, mete ma sira ranori rae, Lamatualain o simbo malole' atahori nda mana tungga hohoro-lalane sunat sa. Naa de ara sangga rala' sia atahori Yahud'i ra. 13 Te mae sira nenesunat ena o, ara nda tao tungga agama a hohoro-lalane na ra sa boe. Ara nau hei simbo sunat fo dad'i sira atahori na ra. Noo ta'o naa, sira partei na koa-koa' se.
14 Te au naa, au koa-koa' 'aka' a hita Lamatuan Yesus Kristus. Ana mate sia hau nggangge', fo tao nisa dala de'ulaka' fo atahori tao' ra, tungga raefafo' hihii-nanau na. Naa de au nda 'afi' fad'uli raefafo' hihii-nanaun sa ena. Ma raefafo' hihii-nanaun nda 'afi' pa'a au sa ena. 15 Sunat do, nda sunat sa, naa nda mangguna' sa. Te mana mangguna', naeni hita simbo masod'a feu' mia Lamatualain. 16 Au hule fo Lamatualain natud'u Susuen neu basa atahori mana tungga au nenori ngga ia, naa fo ara bisa leo-lao noo mole-d'ame, ma esa natud'u rala kasian neu esa. Huu sira dad'i reu Lamatualain nusa feun ena.
17 Tungga ndoon, au nda nau atahori ngganggu au so'al dala' ia ra sa ena. Te ao ngga mabisu foa' ena, huu au dui-b'engga Yesus Kristus nara na.
18 Toronoo ngga ra, e! Au hule fo hita Lamatuan Yesus Kristus natud'u rala malolen neu basa nggi.
Ta'o 'a naa ena!
Sod'a-mole' mia au,
Paulus