2 Rena, e! Ia au, Paulus, mana 'ola' ia. Mete ma hei simbo sunat fo tungga atahori Yahud'i ra hohoro-lalanen, na, Kristus mamaten fo mana mbo'i hendi hei naa, nda ma ngguna saa sa ena. 3 Mete ma atahori simbo sunat, na, ana musi lemba-nasaa nala bali' basa hohoro-lalane' naa ra. Misined'a naa, do hoko'? Te fe'esa'an, au 'ufad'e mema' ena. 4 Atahori mana nau pake hohoro-lalane' fo nae tao Lamatualain simbo e noo malole', ana na'ad'od'oo' aon mia Lamatualain. Te noo dala' naa, ana tola hendi Lamatualain rala malole na. 5 Te Lamatualain Dula-d'ale Meumaren mana soi dala' fo tamahere neu Yesus Kristus. Naa de hita tahani 'a tae, dei fo Lamatualain hengge-nee nala hita nae, hita atahori ndoos. 6 Atahori sunat do hoko', naa nda mangguna' sa. Te mana ma ngguna' a naeni, atahori ramahere neu Kristus, naa de ara sue atahori laen.

7 Fe'esa'an, hei misod'a tungga dala ndoo-tetu' ena. Te ia naa see mana peko-leleko' hei, de losa nda tungga dala' naa sa ena? 8 Nenori pepeko-leleko' fo hei rena' naa, nda mia Lamatualain sa. Tao-tao te, Ana mana nameli hei dad'i atahori na. 9 Saa fo ara ranori' naa, fefeun 'aka' ded'eat esa-rua 'a. Te doo-d'oo ma nenori' naa tao nalutu dud'u'a ma ra. 'Ona' bib'it mbei, atahori sambor noo tarigu fo rumu dad'i roti. Doo-d'oo ma, bib'it a tao tarigu mana nenesambor a hene.^a 10 Huu hita dad'i esa too hita Lamatuan Yesus Kristus, naa de au 'umuhere 'ae, dei fo Ana fee hei mimihere bali' saa fo au 'unori' naa. Ma dei fo Lamatualain huku-d'oki sud'i 'a see mana tao nalutu nemehere ma ra.

11 Ta'o ia, toronoo ngga ra, e! Mete ma au 'unori 'ae, atahori musi sunat, na, ne'o au nda nenetao doid'oso' 'ona' ia sa. Ma atahori Yahud'i ra nda sud'i tola hendi au nenori ngga so'al Yesus mamaten sia hau nggangge' a sa. 12 Te atahori mana tao hei bingun so'al sunat naa, hela fo ara 'uta hendi ‘mamae’ na ra!

13 Toronoo ngga ra, e! Lamatualain mbo'i hendi hei ena, naa fo ama 'afi' sud'i tungga agama hohoro-lalanen hihii-nanau na. Te 'afi' du'a mae, hei nenembo'i' ena fo misod'a tungga 'a hihii-nanau ma ra! Te matetun, hei musi misod'a esa sue esa, ma esa mete-se'u esa, 'ona' ate mete-se'u malangga na. 14 Sia Lamatualain Susura Meumaren nenesura' 'oi, “Ho musi sue atahori laen 'ona' ho sue aom boe.” Mete ma hei tungga 'aka' hohoro-lalane' esa ia, na, hei tao tungga basa atahori Yahud'i ra agaman hohoro-lalanen hihii-nanaun ena.^b 15 Te mete ma hei esa ra'u mala esa, na, dei fo mete! Nda doo' sa te, hei esa tao milutu esa ena.

16 Au masud ngga ta'o ia: mete ma hei misod'a tungga Lamatualain Dula-d'alen hihii-nanaun, na, hei nda tungga atahori hihii-nanaun sa ena. 17 Te atahori hihii-nanaun nda tungga Dula-d'ale' a hihii-nanaun sa. Ma Dula-d'ale' a hihii-nanaun o nda tungga atahori hihii-nanaun sa boe. Huu ru'a se balab'an na! Naa de ama 'afi' sud'i tao tungga 'a hihii-nanau ma ra fai.^c 18 Te mete ma Lamatualain Dula-d'alen nalalao nggi, na, hei nda sud'i nenepa'a' mia hohoro-lalane' naa ra sa ena.

19 Atahori mana tungga-tungga 'a atahori hihii-nanaun, 'ona' a: atahori mana hohongge', atahori dud'u'a de'ulaka mana nda na'ena mamaet sa, 20 mana songgo nitu fo suanggi', mana bamusu', mana hii 'a nareresi, mana hii horo-mbala, mana hii 'a namue-naanggi', mana du'a 'a aon, mana hii 'a dud'unggu-mbambau atahori, mana hii 'a namue leli, 21 mana hii 'a rala mera', mana hii 'a ninu mafu, mana hii 'a feta-d'ote setelele', ma mana tao sala-singgo' laen fai. Fe'esa'an, au fee nggi nesenened'a' 'ae, atahori mana tao tungga dala' naa ra, nda bisa dad'i Lamatualain atahorin sa.

22 Te atahori mana nasod'a tungga Lamatualain Dula-d'alen hihii-nanaun, Dula-d'ale' a tao e dad'i atahori mana hii 'a sue-lai, rala nemeho'ot, hii 'a mole-d'ame', mana na'atataa', ralan malole noo atahori, hii tulu-fali atahori, hii to'u nahere' ded'ean, 23 rala meulau' noo basa atahori, ma bisa nanea aon noo malole'. Nda hambu hohoro-lalane' esa o, 'ena-'ai dala' ia ra sa boe. 24 Atahori mana dad'i Yesus Kristus atahorin, ana nda tungga atahori hihiin sa ena. Te dud'u'a de'ulaka' ra nenembaku mates roo Yesus sia hau nggangge' ena. 25 De mete ma Lamatualain Dula-d'alen fee masod'a feu' neu nggita ena, na, ata musi tungga takandoo hihii-nanau na. 26 Huu naa de, ata 'afi' hii sangga had'a-hormat, 'afi' hii 'a balab'an esa noo esa, ma sud'i tao rala mera' esa noo esa fai.