4
Au fee conto esa fai. 'Ana' esa na'ena hak simbo hata-heto' mia aman, mete ma aman mate. Te mete ma toon nda fe'e dai sa, nda bisa simbo hata-heto' naa sa, mae basa naa dei fo dad'i eni ena na. Te mete ma toon nda fe'e dai sa, eni 'ona' ate nda na'ena hak fo ha'i malanggan hata-heto na ra sa. 2 Huu naa, musi hambu atahori mete-se'u e noo hata-heto na ra. 'Ana' naa musi tungga mana mete-se'u' a hihii-nanaun, losa fai' fo aman na'etu' nala, dei fo ana fe'e bisa simbo hata-heto na.3 Hita o 'ona' naa boe. Lele' Yesus Kristus nda fe'e nema sa, hita fe'e 'ona' anad'iki' naa. Huu hita fe'e nenepa'a' too raefafo' a hihii-nanaun 'ona' ate esa. 4-5 Te nandaa noo fai na, Lamatualain haitua Anan nema dad'i atahori, naa fo atahori o neneso'u' dad'i Lamatualain ana na ra boe. Lamatualain Anan naa, nasod'a tungga atahori Yahud'i ra agaman hohoro-lalanen, fo Ana bisa mbo'i basa atahori ma'ahulun mana rasod'a tungga hohoro-lalane' naa.
6 Huu hei dad'i Lamatualain ana na ra ena, naeni de Ana fee Anan Dula-d'alen nema nisi' hei rala ma ra. Noo dala' naa, hei mi'ena hak mimeli Lamatualain, mae “Ama Bonggi'”. 7 De ia naa, hei nda 'afi' dad'i ate mana nda na'ena hak simbo hata-heto' sa. Te hei dad'i Lamatualain anan mana na'ena hak simbo basa hata-heto' fo Ana helu-fuli' a.a
Paulus du'a sosonat atahori Galatia ra
8 Fe'esa'an, lele' hei nda fe'e mihine Lamatualain sa, tao ao ma ra dad'i ate fo songgo dala nda matetu' ra sa. 9 Te ia naa, hei mihine Lamatualain ena. Malole lena' au 'ufad'e 'ae, Lamatualain mana nahine nggi. De ta'o bee de hei mae bali' fo to'u mala ma tungga bali' raefafo' a hihii-nanaun, mana nda na'ena ngguna' ma koasa saa sa boe? Hei mae to'u mihere' dala' naa ra, fo dad'i ate na ra fai, do? 10 Au rena 'oi, hei tao tungga hohoro-lalane' tungga fai, fulan, ma too, fo mae sob'a tao Lamatualain ralan namaho'o. 11 Ia tao au du'a sosonat! Se'u-se'u te au bengge 'unori nggi doon seli ena, te parsuma 'a.
12 Toronoo susue ngga ra, e! Au hule fo misod'a nenembo'it mia dala' naa ra, 'ona' au ia. Huu au 'usod'a nenembo'it mia agama hohoro-lalanen ena, 'ona' hei nda atahori Yahud'i ra sa. Fe'esa'an, lele' hita ta'ab'ue, hei nda mi'isususa' mita au sa. 13 Basa hei bub'ulu', lele' au 'uma dui-b'engga Hara-lii Malole' neu hei fefeun, au ao ngga mana male-ma'a'. 14 'Ona' naa o, hei nda 'oi au sa, te hei simbo au, 'ona' au ia, Lamatualain aten mia sorga. Lelenan fai, hei simbo au, 'ona' au ia, Yesus Kristus. 15 Lele' naa, basa nggita tamaho'o tala seli. Te ta'o bee de 'ale' ia nda ta'o naa sa ena? Tao-tao te, lele' naa hei sue mala au seli, sambe hei sad'ia 'ed'o mala mata heheli ma ra fo fee neu au. 16 Te 'ale' ia hei du'a mae au ia musu, huu au 'ola' ndoo-tetu' fee neu nggi, do?
17 Mana peko-leleko' ra nda nau au 'u'ub'ue 'oo nggi sa, de ara manggate kokoe nggi, fo tungga basa atahori Yahud'i ra agaman hohoro-lalane na. Ara nau hei mbute-mue tungga 'a hihii-nanau na ra. 18 De mete ma hei manggate tao dala malole', naa malole boe! Mae au 'u'ub'ue 'oo hei, do hoko' o, tao 'a malole'.
19 Ana susue ngga ra, e! Ia naa, au tao-ues 'ita mamate ngga fee nggi, de au doid'oso 'ona' ina' mana named'a nae bonggi. Ma au nda 'uloe' tao ues sa, losa rala ma ra dad'i 'ona' Kristus rala na. 20 Te ia naa, au nda 'ita' 'ae tao nggi ta'o bee sa boe! Au hii 'ae 'eti 'ola' mata' 'oo nggi, naa fo au 'afi' 'ola' deres ta'o ia.
Paulus fee nekendandaa' nendi' dud'uit Hagar anan, noo Sara anan
21 Mete ma hei mae misod'a tungga atahori Yahud'i ra agaman hohoro-lalanen, malole lena' hei mihine hohoro-lalane' a sosoan dei. 22 Te sia Lamatualain Susura Meumaren dui so'al sira ba'i Abraham na ana toun rua. Ana hambu 'ana' esa mia aten, ma 'ana' esa mia sao kab'in na, fo nda ate sa.b 23 Ate naa bonggi nala anan, huu tungga atahori hihii-nanau na. Te sao kab'in na bonggi nala anan, huu Lamatualain helu-fuli mema' ta'o naa neu Abraham ena.
24 Ina karua' naa ra dad'i nekendandaa' netud'u Lamatualain tao hehelu-fufulin rua noo atahori. Hehelu-fufuli' esa, Ana helu neu ba'i Musa mia lete Sinai, lele' na'onda atahori Yahud'i ra agaman hohoro-lalane na. Atahori mana to'u nahere' agama hohoro-lalanen naa, sira o ate 'ona' Hagar boe. 25 Mamana' naa sia lete Sinai sia rae Arab, 'ona' Hagar e boe. Basa atahori Yerusalem mana fe'e to'u rahere' Agama Yahud'i hohoro-lalanen, sira o ate 'ona' Hagar boe.
26 Te hehelu-fufuli' laen a natud'u kota Yerusalem esa sia sorga. Lamatualain ana na ra mana leo sia naa nda ate sa. Sira, atahori nenembo'it nda mana nenepa'a' noo agama hohoro-lalanen sa. Huu naa, sira 'ona' hita mama Sara na, Abraham sao kab'in na. 27 Huu nenesura' sia Lamatualain Susura Meumaren 'oi:
“Woi! Ina nda mana bonggi' sa, e!
Tao mumuho'o ralam leo!
Woi! Ina' nda mana named'a hed'i bob'onggi' sa, e!
Sod'a noo nemoho'ot leo!
Ina rala mana mambalutu', huu saon nda taoafi' neu e sa ena,c
dei fo ana hambu ana' hetar lena' ina masao'.”d
28 De toronoo ngga ra, e! Lele ulu' a Lamatualain helu-fuli fo fee Abraham ana'. Te doo' dei de Lamatualain natetu hehelu-fufulin, fo fee Sara bonggi Isak fee Abraham. Hita o 'ona' Isak boe, huu Lamatualain helu-fuli fee tititi-nonosi' laen fee Abraham. 29 Lele' ate a anan, fo neneb'onggi' tungga atahori hihii-nanaun, na'amoko ma, ana tao na'asususa' Isak, fo mana neneb'onggi' tungga Lamatualain Dula-d'alen hihii-nanau na. Naa o 'ona' a saa mana dad'i lele' ia ena.e 30 Lamatualain Susura Meumaren sura' 'oi, “Mbuu hendi ate a noo ana na. Huu ate a anan nda na'ena hak simbo hata-heto' sa. 'Aka' sao kab'in a anan na'ena hak.”f
31 De ta'o ia, toronoo ngga ra, e! Hita nda 'ona' ate a anan sa, huu hita nda 'afi' to'u tahere' agama Yahud'i hohoro-lalanen sa. Te hita ia, 'ona Abraham anan mia sao kab'in na, huu hita tamahere neu Yesus Kristus.