Lamatualain simbo hita noo malole', huu tamahere neu Yesus Kristus
3
Wee! Atahori Galatia ra, e! Dalahulun au 'ufad'e mia mata ma ra, so'al Yesus Kristus mamaten sia hau nggangge'. Te ia naa atahori leleko' hei noo mud'a' ena, to! Hei nggoa ma ra seli! 2 Au 'ae 'utane dala' esa 'a. Hei simbo mala Lamatualain Dula-d'alen naa, huu hei tungga agama hohoro-lalanen, do? Hoko', to! Dula-d'alen nema nisi' hei, huu hei mimihere Hara-lii Malolen fo hei rena' a. 3 Dad'i ta'o bee de hei miminggoa seli ta'o naa, e? Dalahulun hei misod'a tungga Dula-d'ale Meumare' hihii-nanaun ena. Te 'ale' ia hei misod'a tungga bali' atahori hihii-nanau na. 4 Lele' hei fe'e mae mimihere neu Kristus, hei hambu doid'oso' nae-nae. 'Afi' losa basa naa ra dad'i parsuma 'a! (Tao-tao te, tamahere neu Kristus nda bisa parsuma 'a sa.) 5 Lele' Lamatualain fee Dula-d'alen, ma natud'u manad'ad'i' manaseli' mata'-mata' sia mata ma ra, hei du'a mae Ana tao ta'o naa huu ama tungga agama hohoro-lalanen, do? Hoko', to! Ana tao ta'o naa, huu mimihere Hara-lii Malole' fo ama rena' a.6 Misined'a atahori Yahud'i ra bei-ba'i na ra, naeni ba'i Abraham. Te Lamatualain Susura Meumaren sura' nae, “Huu namahere neu Lamatualain, naa de Lamatualain simbo e noo malole', ma hengge-nee e nae fee ne atahori rala ndoos.”a
7 Dad'i hei musi mihine malolole dala' ia! Atahori mana namahere 'ona' Abraham, sira dad'i Lamatualain atahori matetu na.b 8 Lamatualain nafad'e mema' sia Susura Meumaren nae, dei fo Eni simbo atahori mia nusa fea' ra boe, mete ma ara ramahere Eni. Te fai ma'ahulun Ana nafad'e mema' Hara-lii Malolen neu ba'i Abraham nae, “Dei fo basa nusa' sia raefafo' ia hambu papala-b'ab'anggi' huu ho.”c 9 Huu Lamatualain hehelu-fufulin naa, naa de Ana o fee papala-b'ab'anggi' neu basa atahori mana ramahere neu E, 'ona' Ana fee neu Abraham.
10 Atahori mana tungga agama hohoro-lalanen, naa fo Lamatualain simbo e noo malole', na, ana musi lemba-nasaa basa hohoro-lalane' naa, 'ona' eni nenesumba-ndoon ena. Te nenesura' sia Lamatualain Susura Meumaren 'oi, “Atahori nda mana tungga nakandoo agama hohoro-lalanen losa lutu'-lelo' sa, na, ana hambu sumba-ndoon!”d 11 Te matetu' ena, Lamatualain nda simbo atahori, huu eni tungga hohoro-lalane agama sa. Te nenesura' 'oi, “Atahori musi ramahere Au, dei fo Au fe'e simbo e 'ona' atahori rala ndoos, fo ana hambu masod'a ndoo-tetu'.”e
12 Naa! Mete ma atahori nau nasod'a tungga agama hohoro-lalanen hihii-nanaun, na, ana musi tao tungga basa-b'asa' e losa lutu'-lelo'! Te Lamatualain nafad'e mema' sia Susura Meumaren nae, “Atahori mana nae nasod'a tungga hohoro-lalane' a, dei fo batasib'u noo 'a hohoro-lalane' ra.”f
13 Huu Kristus bae 'etu ena, fo mbo'i hendi hai mia agama hohoro-lalanen mana pa'a hai' a. Fe'esa'an, hai misod'a lemba-misaa agama hohoro-lalanen 'ona' atahori nenesumba-ndoon e. Te ia naa, Lamatua' Yesus so'u hendi sumba-ndoon naa mia hai ena. Te nenesura' sia Susura Meumare' a 'oi, “Atahori mana mate nenelonda' sia hau, eni nenesumba-ndoon.”g 14 Lele' Yesus Kristus mate fo fee masoi-masod'a' neu nggita, papala-b'ab'anggi' fo Lamatualain fee neu Abraham ena o, 'onda neu nusa fea' ra boe. Noo ta'o naa, basa atahori mana ramahere neu Kristus bisa simbo Lamatualain Dula-d'alen fo Ana helu-fuli mema' a.
Lamatualain to'u nahere' hehelu-fufulin
15 Toronoo ngga ra, e! Ia naa au 'ae 'utud'u conto mia hita masod'an fais-fais. Mete ma hambu atahori sura' nala susura pusaka, basa ma ana teken basa naran ena, na, susura naa nenehengge-nee' ena. Atahori laen nda bisa fee 'e'ena-'a'ai' neu saa fo nenesura' sia susura naa sa, ma nda bisa sura' selu' saa-saa sia naa sa ena boe. 16 'Ona' naa boe lele' Lamatualain helu-fuli' noo Abraham ma tititi-nonosi na. Lamatualain nda nae, “Au Helu-fuli ia 'oo tititi-nonosi ma ra”, huu Ana nda helu-fuli neu atahori hetar sa. Te Ana helu-fuli fee neu 'aka' Abraham tititi-nonosin esa, naeni Kristus.h 17 Au masud ngga ta'o ia: Lamatualain helu-fuli na'ahulu' noo ba'i Abraham. Boe ma basa too natun haa telu nulu, dei de Ana na'onda' agama hohoro-lalanen fee atahori Yahud'i ra tungga sira ba'in Musa. Mae 'ona' naa o, Lamatualain nda lea bali' hehelu-fufuli ma'ahulun naa sa.i 18 Lamatualain fee papala-b'ab'anggi' neu Abraham, nda huu ana tao tungga hohoro-lalane' sa. Te Ana fee papala-b'ab'anggi' huu Ana helu-fuli mema' nae fee mud'a' Abraham eni' a ma'ahulu na. Naa, 'ona' 'ana' esa simbo pusaka mia ama na. Ana simbo, huu aman helu-fuli mema', nda huu 'ana' naa tao tungga atoran sa.j
19 Dad'i ia naa au 'ae 'utane ta'o ia: mete ma Lamatualain simbo ba'i Abraham noo malole' huu nemeheren, ta'o bee de Lamatualain fee tamba hohoro-lalane' neu ba'i Musa fai? Ana fee tamba agama hohoro-lalanen fo nenori atahori dala sala na ra mata'-mata'. Eni masud na, naa fo atahori rasod'a tungga hohoro-lalane' a hihii-nanaun, losa Abraham tititi-nonosin esa nema. Boe ma, mete ma tititi-nonosi' naa, naeni Kristus, nema, na, hohoro-lalane' naa nda parluu sa ena.
Lele' Lamatualain fee agama Yahud'i hohoro-lalanen, Ana nda fee mata' sa. Te Ana pake ate na ra mia sorga, de rendi neu ba'i Musa, dei de Musa fee neu atahori Yahud'i ra. Noo ta'o naa, Musa dad'i neu mana nendi hara' fee Lamatualain noo atahori na ra. 20 Te lele' Lamatualain helu-fuli noo Abraham, Ana nda pake mana nendi hara' sa. Ana helu-fuli mata' noo mata aon! Noo ta'o naa, hita tahine tae, Lamatualain hehelu-fufulin manaseli' lena' hohoro-lalane' naa ra.
Agama hohoro-lalanen nanori atahori so'al sala na ra mata'-mata'
21 Lele' Lamatualain fee agama hohoro-lalane na ra neu ba'i Musa, naa balab'an noo hehelu-fufuli na ra, do? Hoko'! Huu mete ma hambu hohoro-lalane' fo atahori bisa tao tungga fo Lamatualain simbo e noo malole' ma nasod'a, na, ne'o atahori Yahud'i ra hohoro-lalanen bisa tao ta'o naa boe. Tao-tao te nda hambu hohoro-lalane' esa sa boe, fo atahori bisa tao tungga, fo tao ma'asufu Lamatualain ralan, fo Ana simbo e noo malole'. 22 Huu sia Lamatualain Susura Meumaren nenesura' 'oi, basa atahori nenepa'a mates roo sala' mata'-mata'. Naa de 'aka' atahori mana ramahere neu Yesus Kristus, mana bisa simbo saa fo Lamatualain helu-fuli' a.
23 Lele' Kristus nda fe'e nema sa, hai atahori Yahud'i ra nenepa'a mates moo hohoro-lalane' naa ra, losa nda bisa nenembo'i' sa. Te losa fain, Lamatualain soi dala' fo hai nenembo'i' mia hohoro-lalane' ra, sad'i hai mimihere neu Kristus. 24-25 Dad'i agama hohoro-lalane' naa ra, 'ona' mana nanea mana nanori hita noo malolole losa Kristus nema. Te mete ma Ana nema ena, na, deifo hita bisa tamahere E, fo tasod'a malolole too Lamatualain. Naa de, ia naa hita nda parluu mana nanea' naa sa ena.
Atahori mamahere' ra dad'i Kristus bob'onggin ena
26 Ia naa hei dad'i Lamatualain ana na ra ena, huu mimihere neu Yesus Kristus. 27 Basa hei mana nenesarani' fo dad'i atahorin, ama o nenepa'a mates moo E boe. 28 Basa atahori mana ramahere neu Kristus, ara 'ona esa' ena. De mae hei atahori Yahud'i, do nda Yahud'i sa o, ate do nda ate sa, tou' do ina', basa atahori mana ra'ab'ue roo Yesus Kristus, 'ona esa'.
29 Kristus naa, Abraham tititi-nonosin fo Lamatualain helu-fuli eni' a dalahulu na. Huu hei mi'ib'ue moo Kristus, de hei dad'i Abraham tititi-nonosi matetun ena. Noo ta'o naa, hei o bisa simbo papala-b'ab'anggi' fo Lamatualain helu-fuli ma'ahulun neu Abraham.k