Lamatua' Yesus ded'enun laen ra simbo Paulus nenorin noo malole'
2
Basa too sanahulu haa boe ma, au bali' kota Yerusalem 'uu 'oo Barnab'as. Hai o moo atahori mamahere' esa, nda atahori Yahud'i sa, naran Titus.a 2 Au naa 'uu, huu Lamatualain mana denu. Basa naa ma, au dui lasi-lasi Kristen ra, Hara-lii Malole' fo au 'unori neu atahori nda Yahud'i ra sa. Lele' naa, au 'ola' mata' 'oo se naa fo ara paresa' malolole saa fo au 'unori' naa, teb'e' do hoko'. Huu, mete ma ra'etu' rae nda teb'e sa, na, atahori bisa rae ue-tatao ngga parsuma 'a!3 Ara rena au 'ola' ta'o naa ma, ara simbo noo malole'. Ara o simbo Titus noo malole' boe. Mae eni nda atahori Yahud'i sa o, ara nda ra'asusuu' e sunat sa. 4 Te lele' naa, hambu toronoo' hira nda ra'ahei' sa, huu ara ranori laen. Sira atahori Kristen nda matetu' sa. De rema nee-nee fo rae ra'asusuu' Yesus Kristus atahori nda Yahud'i na ra sa, fo tungga basa hohoro-lalane' agama Yahud'i. Tao-tao te Yesus Kristus mbo'i hendi hita ena, naa de hita nda nenepa'a' sia hohoro-lalane' naa ra sa ena, 'ona' ate. 5 Mae ara ra'asusuu' ta'o naa o, hai nda simbo mbei sa boe. Noo ta'o naa hei mimihere mikindoo Hara-lii Malole' fo au 'unori' a. Te naa mema' teb'e.
6 Lasi-lasi' naa ra simbo au nenori ngga naa, ma nda tamba-tamba' saa sa boe. Te Lamatualain nda mete mata' sa. De mae sira atahori moko-monaen do anad'iki' boe o, naa nda ma sosoa' sa.b 7 Te sosoan, naeni: ara bub'ulu' 'oi, Lamatualain pili nala au ena fo 'endi Hara-lii Malolen fee neu atahori nda Yahud'i sa. 'Ona' Ana denu Petrus nendi Hara-lii Malolen neu atahori Yahud'i ra. 8 Te Lamatualain fee koasa neu Petrus fo dad'i ded'enu' soa' neu atahori Yahud'i ra. Ana o fee koasa neu au 'ona' naa boe, fo dad'i ded'enu' soa' neu atahori nda Yahud'i ra sa. 9 Lele naa, atahori du'a ena rae Yakob'is, Petrus,c ma Yohanis, malangga nggarei'. Lele' telu' se bub'ulu' rae, Lamataulain natud'u rala malolen neu au ena, ma ara rambarii' de rema to'u lima' roo au 'oo Barnab'as, fo dad'i tatanda' 'oi, basa hai rala' esa ena. Ara nau fo hai mii mendi Hara-lii Malole' neu atahori nda Yahud'i sa, ma sira mana rendi fee atahori Yahud'i ra. 10 'Aka' na, ara fee nesenened'a' esa neu au 'oo Barnab'as. Naeni, hai 'afi' lilii' tulu-fali atahori hata-taa' ra. Mema' naa, au 'ae tao ena.
Paulus 'ai Petrus mia Antiokia, huu ana lao hela atahori nda Yahud'i ra sa
11 Lao esa ma Petrus nisi' kota Antiokia, boe ma au 'ai e relo-relo, huu ana tao sala'. 12 Lele' ana fe'e nema a, ana hii 'endo' naa na'ab'ue noo Kristus atahori nda Yahud'i na ra sa. Te lele' Yakob'is nonoon atahori Yahud'i na ra rema, boe ma Petrus lao hela toronoo nda Yahud'i na ra sa, ma nda 'endo' naa noo se sa ena. Huu namatau atahori Yahud'i mana ranori rae, Kristus atahori na ra musi to'u rahere' atahori Yahud'i agaman hohoro-lalanen ma musi rasod'a ra'ad'od'oo' mia atahori nda Yahud'i ra sa.
13 Atahori Yahud'i laen ra rita Petrus tataon naa, ma ara o tao tungga boe. Losa Barnab'as o tungga sira mana dea-rala na ra boe. 14 Te lele' au 'ita se nda tungga matetu' Hara-lii Malole' a hihiin sa, ma au 'ai mema' Petrus mia mata na ra 'ae, “Wee, 'a'a Pe'u! 'A'a ia, mema' atahori Yahud'i. Te Lamatualain soi dala' fo atahori mana ramahere neu Yesus Kristus 'afi' nenepa'a' roo atahori Yahud'i ra agaman hohoro-lalanen fai. 'A'a simbo nala dala' naa ena. Te ta'o bee de 'ale' ia 'a'a fe'e mae mu'ususuu' atahori nda Yahud'i ra sa, fo tao ao na ra 'ona' atahori Yahud'i fai?”
15 Au 'ai Petrus ta'o naa, huu hai ru'a nggi atahori Yahud'i. Hai nusa Yahud'i ma nda 'ona' nusa' laen ra sa, huu hai atahori ma ra rahine Lamatualain doo' ena. 16 Te ia naa hita o bub'ulu' tae, Lamatualain nda simbo noo malole' atahori esa sa boe, huu eni tao tungga agama hohoro-lalane na. Te Lamatualain simbo noo malole' atahori', mete ma ana namahere neu Yesus Kristus, nda huu eni tao tungga agama hohoro-lalanen sa. Ta'o naa dei, fo Lamatualain fe'e hengge-nee atahori nae, salan nese ena.d
17 Naeni de hita tanori tae, Lamatualain simbo malole' atahori, huu namahere neu Yesus Kristus. Te hambu atahori Yahud'i fua sala' neu hai rae, hai sala ena, huu hai mimihere neu Kristus, te nda to'u mihere' agama Yahud'i hohoro-lalanen sa ena. Hei o mae fua sala' ta'o naa boe, to? 18 Te mete ma au to'u 'ala bali' agama hohoro-lalanen fo au mbo'i hendi' a, na, naa dei fo au sala! 19-20 Mema' dalahulun au manggatee tao tungga agama Yahud'i hohoro-lalanen, naa fo au malolole 'oo Lamatualain. Te au nda bisa sa. Naa de ia naa au mbo'i hendi hohoro-lalane' ra fo 'usod'a 'u'ub'ue 'oo 'a Kristus. Noo ta'o naa, dei de Lamatualain simbo au noo malole. 'Ona' au mate nenembaku' sia hau nggangge' 'oo Kristus ena. Ia naa au nda 'usod'a sa ena, te Kristus nasod'a sia au rala. Au hambu masod'a feu' ia, huu au 'umuhere neu Lamatualain Ana na. Te Ana sue naseli' au, losa Ana mate nggati au. 21 Lamatualain simbo au huu rala malolen, nda huu au tao tungga agama hohoro-lalanen sa. Huu mete ma atahori bisa malolole roo Lamatualain huu tungga agama hohoro-lalanen, na, naa sosoan, Kristus mamaten, parsuma 'a.
Naa, au 'ufad'e neu Petrus se sia Antiokia.