Minea malolole masod'a ma ra
13
Dad'i ia lao katelun ena au 'ae 'eti se'u nggi. Mete ma hambu atahori nae fua sala' neu atahori, na, 'afi' lilii' hohoro-lalane na. Huu Lamatualain Susura Meumaren sura' nae, “Mete ma hambu atahori fua sala' neu atahori esa, musi hambu sakasii rua do telu 'ola' 'ona esa' dei, dei fo fe'e simbo na. Te mete ma nda 'ona' naa sa, na, 'afi' simbo.”a 2 Lele' au 'eti sia hei e lao karuan, au fee nesened'a' ena neu atahori mana rasod'a tao de'ulaka' ra. Ia naa, au fee nesened'a' neu se fai, na'ab'ue noo basa-b'asa atahori mana rasod'a tao de'ulaka' ra. 'Ona' dalahulun, au fee nesened'a' 'ae, dei fo mete ma au dad'i 'uma, au nda hela se neu' ena sa.3 Hei sangga-sangga bukti mae, Kristus 'ola' pake au. Naa. Mete ma Kristus nau nauli nala nggi, Ana tao koasa manaseli' sia talad'a ma ra. Te Ana nda tao ues noo noe-na'us sa. 4 Lele' ara tao risa E mia hau nggangge' a, mema' Ana masaloe, huu Ana mbo'i hendi koasa na. Te Lamatualain fee koasa neu Kristus de nasod'a lele' ia. Ma mae hita mana dad'i Eni atahorin med'a nda tab'e'i sa, te Lamatualain fee nggita masod'a feu' ena. Naa de hai bisa mete-se'u nggi mendi' Eni koasa na.
5 Esa-esa' paresa' rala ma ra fo bub'ulu' mae, hei mimihere teb'e neu Kristus, do hoko'. Koasan nenenita' sia masod'a ma ra, do hoko'? Sob'a ao ma ra ta'o naa. Huu mete ma Ana nda nenepa'a' noo nggi sa, ama nda dad'i atahorin sa. 6 Mete ma hei paresa' hai, na, hei bisa mita koasan nenenita' sia hai masod'a ma ra. Noo ta'o naa, hai mala seri. 7 Hai o hule-o'e mo'e mbali Lamatualain, fo ama 'afi' tao sala' saa-saa boe. Hai nda fad'uli mae atahori hii, do hoko' neu hai tatao ma ra sa. Te hai nau fo ama tao ndoo-tetu', 'ita' mae atahori ruma rae mbuu hendi hai. 'Ona' naa o nda saa-saa sa boe. 8 Huu hai nda bisa tao saa-saa sa fo lab'an ndoo-tetu' a sa. Hai mihine' a tao ndoo-tetu' a. 9 Mete ma hei dad'i ma'ad'ere, ma hai dad'i male-ma' a, hai mimiho'o' a. Huu hai hule-o'e mo'e fo Lamatualain tao nggi boe dad'i manad'ai'. 10 Naa de, mae au 'u'ud'od'oo' 'oo nggi o, au sura' dala' ia ra lele' ia, fo mete ma au 'eti na, au nda sud'i boe 'ola' 'oo nggi noo deres sa ena. Au dad'i hita Lamatuan ded'enu na. Te Ana fee au hak ma koasa fo tao ma'ad'ere nggi, nda tao 'ulutu nggi sa.
Paulus nate'e susuran
11 Toronoo susue ngga ra, e! Au 'o'ola ma'ab'ui ngga ia, 'aka' a sod'a-mole'. Tao netetu basa dala' ra. Rena malolole nenori ngga. Misod'a noo rala' esa. Hei musi malolole esa noo esa. Susue' naa na'oka sia Lamatualain. Au hule fo Ana noo nggi nakandoo 'a, ma tulu-fali nggi fo misod'a noo mole-d'ame esa noo esa.
12 Hei esa musi natea esa noo i'id'u susue-lalai' a, mana nandaa soa' neu Lamatua' atahori meumare na. Lamatua' atahorin mana sia ia ra basa se helu hara sod'a-mole' neu nggi boe.
13 Au hule fo hita Lamatuan Yesus Kristus natud'u Rala malolen neu nggi. Au hule fo Lamatualain natud'u susue-lalain neu nggi. Au o hule fo Lamatualain Dula-d'ale Meumaren natud'u rala malolen, naa fo basa nggi misod'a noo rala' esa.
Ba'u 'a naa ena,
Paulus