Paulus nita dala' esa 'ona' nalamein
12
Mete ma hei nau, na, hela fo au 'ola' koao selu' mbei fai. Tao-tao te 'ola' koao nda na'ena ngguna sa. Te 'ae 'ufad'e nggi dala-d'ala' fo hita Lamatuan natud'u neu au, 'ona' sia meit e. 2-4 Au 'uhine atahori sa nenepa'a' noo Kristus. Too sanahulu haa manalao' naa, eni neneso'u-b'oti' lalai naru' ata neu. Ana neneb'oti' noo aon, do, 'aka' samanan o, au nda 'uhine sa. 'Aka' Lamatualain nahine. Au o 'uhine 'ae, lele' ana hene nisi' Lamatualain Mamana Meulaun, ana rena ded'ea-'o'ola manaseli' teb'e, losa atahori nda bisa 'ola' sa. 5 Dad'i soa' neu atahori mata' naa, au 'ae 'ola' koao. Te au nda nau 'ola' koao so'al ao ngga sa. So'al saa fo au nda tao be'i sa, au fe'en 'ola' koao ta'o naa. 6 Mete ma au 'ae 'ola' koao, na, au nda parluu 'ombo-koson sa, te au hambu dala ndoo-tetu' hetar fo au bisa 'ola'. Te au 'u'umamate' ao ngga, fo atahori 'afi' dud'u'a rae, au manaseli' lena' mia saa fo ara rena ma rita mia au. 7 Lelenan fai, Lamatualain natud'u neu au dala' hetar manaseli'. Te au o hambu sususa' boe, naa fo au 'afi' koao. Te nitu ra malanggan denu ana ded'enun esa fo 'aka' ngganggu au nakandoo 'a, 'ona' nggaut esa 'aka' mbau-mbau' ao ngga. Weh! Au doid'oso seli teb'e!8 Au hule lao telu ena fo Lamatualain so'u hendi dala' ia ra mia au. 9 Te Ana nataa au nae, “Au 'utud'u rala malole ngga neu nggo. Naa dai soa' neu nggo. Te lele' ho du'a mae, tungga ma'ad'erem, naa nda fe'e dai sa, na, Au koasa ngga boe ma'ad'ere sia naa.” Naeni de au 'ae 'ola' nae' selu', lele' au nda tao be'i dala' esa sa. Huu 'ona' naa, au bub'ulu' 'ae, Kristus koasan nasod'a sia au. 10 Naa de, mete ma au med'a nda bisa tao 'ala dala' esa sa, au rala ngga sub'a-sub'a' a. Dad'i lele' atahori 'ola' ra'amamae' au, do tao ra'asususa' au, do tao doid'oso au, do poko-paru au, huu au dad'i Kristus atahorin, de rala ngga sub'a-sub'a' a. Te mete ma au nda bisa sa, na, au hambu koasa lao' mia Kristus fo bisa tao dala' naa.
Paulus dud'u'a so'al atahori mamahere' sia Korintus
11 Naa, hei misod'a 'ona' Lamatua' nda parnaa denu au 'eti sia naa sa. Naa de, nau do nda nau sa o, faa' ra au 'ola' 'ona' nggoa' e mbei. Matetun, hei musi 'ola' koao so'al au. Mema' au nda 'u'ena sosoa' saa-saa sa boe. Te mete ma ne'esasama' au 'oo “atahori manaseli' naa ra”, mana 'oi Lamatua' mana denu sira, na, sira nda manaseli' lena' au sa.
12 Mete ma Lamatua' denu atahori esa fo neu dui-b'engga atahori so'al Eni, atahori naa tao manad'ad'i manaseli' mata'-mata' nendi' koasa, fo natud'u bukti 'oi, Lamatua' mana denu eni. Te 'afi' lilii', huu lele' au mia hei talad'a ma ra, au o tao manad'ad'i manaseli' 'ona' naa boe. Te au tao ta'o naa ma 'u'utataa' 'ukundoo 'a. 13 Te 'afi' miminasa, e! 'Aka' dala' esa' a, au nda tao sia hei e sa, fo atahori laen tao sia atahori sarani' laen ra. Naeni, au nda nau fo ama tanggon masod'a ngga sa.
14 Ta'o ia! Au 'uhehere 'uma sia hei lao katelun ena. Au nda parluu nggi tanggon masod'a ngga sa. Au o nda parluu hei su'im sa boe. Te tungga hita had'at na, nda nandaa anad'iki' ra mbed'a' su'in fee neu ina-ama na ra sa. Nandaa naa, na, naeni atahori lasi' mana mbed'a' hela su'in fo fee neu ana na ra. Dad'i au nda parluu fo ama mbed'a' hela su'im fee au sa, huu hei 'ona' au ana ngga ra boe! Au parluu' a hei ao ma ra noo rala susue ma ra. 15 Mete ma parluu, na, au hii' fee basa sud'i 'a saa ngga ra ma nau tao ues 'ita' mamate ngga fo masod'a ma ra tungga Lamatualain hihii-nanau na. Dad'i mete ma au sue 'useli' nggi, na, hei o musi sue au 'ona' naa boe. Dad'i, ta'o bee de hei keke'e susue ma ra? Nda nandaa sa, to?
16 Hambu mia hei e rataa rae, au nda tao 'umub'era nggi sa. Te ruma fai rae, au dad'i atahori mana mahine peko-leleko' ma leleko' 'ala nggi, losa tao nggi tungga au hihii ngga. 17 Dad'i ta'o bee? Mbei ma atahori fo au haitua reti sia nggi, leleko' rala nggi, do? 18 Huu au denu Titus fo neti sia nggi. Au o denu toronoo' laen esa neu noo e boe. Do 'ita' Titus leleko' nala nggi, do? Hoko', to? Huu Titus hei atahori nemeherem. Ma Titus noo au ia, 'ona esa'. Hai ue-tao dala' 'ona esa', huu hai ru'a nggi dud'u'a ma ra, 'ona esa' boe.
19 Toronoo susue ngga ra, e! Se'u te hei dud'u'a eni' a faa' ra mae, hai misila'e ao ma ra sia mata ma ra, do? Hoko'! Huu basa saa fo hai 'ola' ia ra, Lamatualain bub'ulu'. De hai nda bisa mi'ifuni' saa-saa mia E sa. Hai o nenepa'a' moo Kristus boe. Huu hai sue nggi, naeni de basa saa fo hai tao' ia ra, hai mi'ena masud mae tao ma'ad'ere nggi.
20 Dei fo, lele' au 'eti sia nggi, au du'a-d'u'a, 'afi' losa hei nda dad'i 'ona' au hihii ngga sa. Se'u-se'u te hambu ruma rareresi, rala mera', mbed'a' rala', ruma du'a' a ao na ra, ruma 'ola' ra'amuti-ra'amuu atahori na ra malole na ra, ruma rendi-rendi' a ded'ea lena', ruma koao, ma ruma ramue-raanggi. Mbei ma au o dad'i atahori nda 'ona' hei hii 'a sa boe. 21 Dei fo lele' au 'eti sia nggi, dud'u'a ngga liuali huu hei tatao ma ra. 'Afi' losa Lamatualain nae tao na'amamae' au sia mata ma ra. 'Afi' losa au tao atahori named'a mambera', huu hetar mia hei e fe'e misod'a tao' a de'ulaka', ma nda nau doa' sa, fo tungga bali' Lamatualain dala ndoo-tetu na. Sira manggenggeo'! Huu ruma 'aka' hohongge. Ara tao mata'-mata' nda rahine mamaet sa.