Kristus ded'enu matetu na ra, ma ded'enu nda matetu na ra sa
11
Au 'ae 'ola' 'ona' nggoa' e mbei. Dad'i rena malolole au dei! Ta'o ia: 2 Au 'ona' hei ama ma. Hei 'ona' au ana feto ngga mana nenenetane basa' ena. Mana netane' a, naeni Kristus. Ma au nau 'unea nggi malolole, naa fo mete ma ama sao, na, hei fe'e meumare'. Dad'i au 'unea malolole fo esa 'afi' ngganggu nggi, do tao nalutu nemehere ma ra. 3 'Ale' ia hei tungga Kristus dala ndoo-tetun noo rala meumare'. Te au 'umutau, 'afi' losa hambu atahori leleko' rala nggi, fo ama lao hela dala' naa, 'ona' a lele ulu' a mengge a peko-leleko' nala Hawa. Nitu a bisa peko-leleko' 'ona' naa, huu eni, mana peko-leleko' ra ba'in!a 4 Mete ma atahori mata' 'ona' naa ra rema risi' nggi, ma ranori nggi so'al Yesus mata' laen, nda 'ona' Yesus fo hai minori neu nggi' a sa, na, ta'o bee de ama mimihere atahori naa? Dalahulun, hei soi rala ma ra fo simbo Lamatualain Dula-d'ale Meumaren de nauli nggi. Dad'i, ta'o bee de 'ale' ia hei nau simbo mala dula-d'ale mata' laen fai? Dalahulun, hei mimihere Kristus Hara-lii Malolen fo hai dui-b'engga neu nggi. Dad'i, ta'o bee de 'ale' ia hei nau simbo nenori' mata' laen fai?5 Ara so'u-so'u ao na ra rae, sira, Lamatua' ded'enun manaseli' teb'e. 'Ita' hak na ra lena' au, do? Hoko'! Au nda tungga dud'u'at 'ona' naa sa. 6 Mae au nda 'ola' 'uhine 'endi' ded'ea mad'iku' sa, te au 'uhine teb'e-teb'e' saa fo au 'ola' a. Hei bub'ulu' dala' ia ra ena, huu au 'utud'u 'usufafali neu nggi ena.
7 Lele' au 'unori Lamatualain Hara-lii Malolen neu nggi, au nda 'o'e nggi tanggon masod'a ngga sa. Au tao ao ngga dad'i anak, naa fo au bisa so'u boti' nggi. Mbei ma hei mae fua sala' neu au, huu naa, do? 8 Te atahori mamahere' sia atahori sarani' sia mamana' laen ra mana tanggon masod'a ngga, naa fo au bisa mete-se'u 'ala nggi. Naa 'ona' au ha'i mia se, fo bisa tulu-fali neu nggi. 9 Lele' au 'u'ub'ue 'oo nggi, ma au parluu, na, au nda ngganggu nggi sa, do 'o'e saa-saa mia nggi. Toronoo ta ra mana rema mia profinsi Maked'onia mana tulu-fali au. Te au nda tao 'umub'era saa-saa mbali nggi sa, ma au nda nau tao ta'o naa sia fai mana nema' ia sa.b 10 Kristus Ded'ea-'o'olan, teb'e, au o 'umuhere 'ae, au ded'ea-'o'ola ngga, teb'e boe, huu au nenepa'a' 'oo Kristus. Nda hambu atahori sia profinsi Akaya bisa bab'ata rala au bafa ngga sa, ma ra'anggee rala au fo 'afi' 'ola' koao 'ae, au nda tao 'umub'era nggi ta'o naa sa. 11 Ta'o bee de au 'ola' ta'o ia? Mbei ma, huu au nda sue nggi sa, do? Mae hei du'a ta'o naa, te Lamatualain bub'ulu' au susue ngga neu nggi.
12 Naa, dala' fo au tao 'ita' ra, au nau tao 'ukundoo. Noo ta'o naa, atahori mana hii so'u-so'u' ao na ra fo 'ola' koao rae sira tatao na ra 'ona' hita, na, ara nda ra'ena netehuu' sa ena. 13 Ara rae Lamatualain mana denu sira. Sira, atahori mana tao ues mana hii 'a leleko' atahori! Ara sob'a-sob'a tao ao na ra 'ona' Kristus ded'enu matetu na ra. Tao-tao te, basa naa ra 'ombo-koson! 14 Ama 'afi' heran, e! Te nitu ra malanggan o sob'a-sob'a tao aon 'ona' Lamatualain aten mia sorga mana rendi manggarelo' noo rala malole'. 15 Naa de hei 'afi' heran mete ma atahori mana tao ues na ra o sob'a-sob'a tao ao na ra 'ona' atahori mana ue-tao noo rala ndoos. Te besa-b'esa, huu dei fo Lamatualain bala-b'ae de'ulaka na ra.
Kristus ded'enu matetu na ra, lemba doid'oso' mata'-mata' lele' ara dui-b'engga so'al Lamatua' Yesus neu atahori
16 Mete ma hei nau, na, hela fo au 'ola' 'ona' nggoa' e mbei fai. Te au 'ae sob'a 'ola' koao. 17 Au sura' ia fo so'u-so'u ao ngga ta'o ia, na, au 'ola' 'ona' nggoa' e. Huu 'o'ola ngga ia, nda na'oka sia hita Lamatuan sa. 18 Hambu atahori hetar hii 'a so'u-so'u ao na ra tungga atahori sia raefafo' ia had'a na. Dad'i au o 'ae 'ola' koao tungga se boe. 19 Te hei tao ao ma ra 'ona' atahori dud'u'a ndoos, mete ma mindaa moo atahori sa utan 'ona' ee, na, hei hela neu noo rala loa', to? 20 Mete ma atahori laen tao saa-saa mbali nggi, na, hei hela se neu' ena. Conto 'ona': mete ma hambu atahori tao nggi dad'i 'ona' ate, na, hei hela se neu' ena. Mete ma atahori ramana'o rala sud'i 'a saa ma ra, na, hei hela se neu' ena. Mete ma hambu atahori leleko' rala nggi, na, hei hela se neu' ena. Mete ma hambu atahori so'u ao na ra 'ona' moko-monaen, ma raloe-rad'ae nggi 'ona' anad'iki', na, hei hela se neu' ena. 'Ona' naa boe, mete ma atahori mbasa nggi, na, hei hela neu' ena. 21 Te 'afi' miminasa, e! Te au mae, huu hei noe-na'us. Te hai nda bisa tao ta'o naa sa, 'ona' atahori ra tao neu nggi.
Te mete ma ara rae 'ola' koao so'al saa, na, au o 'umburani 'ola' koao ta'o naa boe. (Te 'afi' lilii', huu au 'ola' 'ona' nggoa' e!) 22 Sira atahori Ibrani teb'e'-teb'e', do? Hei! Te au boe. Sira atahori Isra'el, do? Hei! Te au boe. Sira, ba'i Abraham tititi-nonosin, do? Hei! Te au boe. 23 Sira, Kristus atahori mana tao ues na, do? Hei! Te au o 'ona' naa boe. ('afi' lilii', te au 'ola' 'u'ulelena' ia!) Mema' au 'ae, au 'ona' se boe. Tao-tao te, au lena' se fai. Huu au ue-tao ma'ad'ere lena' se. Atahori nggari hendi au bui rala 'uu lao hetar lena'. Ara filo au lao hetar lena'. Au o 'ae' a mate lao hetar lena'.c 24 Huu sia au atahori Yahud'i ngga ra liman, ara filo au lao lima. Mete ma ara filo au lao esa, na, ara li'u lao telu nulu sio.d 25 Atahori ra popoko au lao telu rendi' hau. Lao esa ara mbia fatu fo rae tao risa au. Au 'ofa ngga molo lao telu. Au lalaa mia tasi roma' rerelo' sa ma tetemba' sa.e 26 Au lao doo' 'uu sia bee-b'ee lao hetar. Hambu sosoe' hetar tao au 'ae' a mate. Conto 'ona': oe mandali' mia loe monae', mana rambok ra, au atahori Yahud'i ngga ra, atahori nda Yahud'i ra sa, ma atahori mana tao aon 'ona' toronoo atahori mamahere', tao-tao te sira mana leleko'. Au o 'ae' a mate mia tasi talad'an sia kota rala, ma sia mamana rou' boe.f 27 Au tao ues 'ita' mamate ngga, ma hambu sususa' mata'-mata'. Lao hetar au nda sunggu' 'ala sa. Au o ndoe ma 'u'umad'a. Lao hetar au nda hambu 'ua saa-saa sa boe. Parnaa au nda ma bua-b'a'us sa, de au ma'arini ae' a mate. 28 Mete ma nda nau 'ingga basa dala' naa ra sa, na, 'ingga ta'o 'a ia: te tungga fain langga ngga nareo-nafali, huu au dud'u'a so'al basa hita toronoo atahori mamahere' ra mana ra'ab'ue sia bee-b'ee. 29 Mete ma hambu atahori named'a aon nda nab'e'i sa, na, nasaned'a au. Te au o 'ona' naa boe. Mete ma atahori kokoe atahori mamahere' ra fo tungga-tungga tao sala', au mae, ma 'umunasa.
30 Naa, Mete ma au musi 'ola' koao, malole lena' au 'ola' koao so'al dala-d'ala mana natud'u nae, au ia, mana noe-na'us. Teb'e! 31 Hita Lamatuan Yesus, noo Aman Lamatualain, rahine rae au nda leleko' sa. Naa nandaa atahori so'u kokoa-kikio neu E rakandondoo' a.
32 Conto 'ona', dalahulun mia kota Damsik, mane Aretas gofernor na denu atahori fo tefa au sia kota lelesun, fo to'u rala au. 33 Te au nonoo ngga ra tao au 'isi' boa esa rala 'uu, de ra'onda' au rendi' tali' mia kota a tembok na dea'. Dad'i au 'ala seri mia gofernor lima na. Misined'a, te mete ma au mesa' nggo, na, nda bisa sa, to?g