Paulus nasala'e aon so'al ue-tataon fee neu Kristus
10
Au, Paulus, mesa' nggo, mana sura' sia ia. Tantu hei ruma du'a ta'o ia: mete ma au 'u'ub'ue 'oo nggi, na, au mae 'ola' relo-relo. Te mete ma au 'u'ud'od'oo' 'oo nggi, au 'umburani 'ola' nda bambi-b'ambi sa. 'Ona' naa, to? Tao-tao te, au hule fo ama rena au, huu Kristus rala malolen neu nggi, boe ma Ana hii 'a fee susuen neu nggi. 2 Te hambu hei ruma nda nau rena au sa. Ara 'ola' rae, hai tatao ma ra, 'ona' atahori laen sia raefafo' ia tatao na ra boe. Dad'i mete ma au 'eti sia naa, ne'o au musi 'ola' fee se nda bambi-b'ambi sa. Naeni de au 'ufad'e mema' neu basa nggi, naa fo au 'eti, na, au sud'i boe 'ola' nggere-nggere 'oo se fai. 3 Mae hita atahori biasa, te mete ma tatofa too atahori laen, ata 'afi' hehea' fo tareresi 'ona' atahori sia raefafo' ia nda mana rahine Lamatualain sa. 4 Te mete ma hita tatofa too atahori, 'afi' lilii', huu hita tee-tanden nda 'ona' atahori sia raefafo' ia 'enan sa. Ma mete ma hita tatofa too atahori langga fatu mana nareresi nakandoo 'a noo nggita, na, hita o ta'ena Lamatualain koasan mana bisa bonggar nalutu atahori netehuun boe. 5 Lamatualain koasan bisa bonggar hendi basa dud'u'a' mana lab'an Lamatua', mana tao atahori nda rahine E sa. Eni koasan o bisa natud'u dala', fo nggati hita dala dud'u'a mbaraan, noo dala dud'u'a feu'. Noo ta'o naa, hita tanori fo du'a tungga Kristus nenori na.a 6 Hei hetar mulai tao rerena' neu Kristus, ma tao tungga basa dud'u'an ena. Te hei ruma nda fe'e nau tao rerena' neu E sa. Dad'i hai mihehere fo hukun nda mana nau rena neu E sa.7 Hei hii 'a mete dala' mana nenenita' sia dea' a. Te hei musi mete atahori rala na ra. Dad'i mete ma hambu atahori esa nae eni Kristus atahorin, na, misined'a malolole. Huu hita o Kristus atahorin, 'ona' e boe. 8 Mbei ma hei du'a mae, au 'ola' 'u'ulelena' so'al koasa fo hita Lamatuan fee neu nggita. 'Ona' naa, do? Hoko'! Huu koasa naa, sia fo tao ma'ad'ere nggi, nda tao nalutu nggi sa. Dad'i au nda hela atahori tao ra'amamae' au huu ara bonggar tao ralutu ue-tatao ngga sa. 9 Au nda 'u'ena masud fo 'u'utatau' nggi 'endi' susura ngga ra sa. 10 Te atahori naa ra 'ola' rae, “'Afi' taoafi' moo Paulus. Te mae susuran manaseli' ma deres o, te mete ma nema aon, eni mana male-ma'a', ma 'o'olan o nda na'ena koasa sa.” 11 Naa, hela neu fo atahori mana 'ombo-koson ta'o naa du'a dala' ia: saa fo hai sura' sia susura mia doo-d'oo', nda fea' noo saa fo hai 'ola' a sa, mete ma hai 'ima sia talad'a ma ra.
12 Atahori ruma hii 'a so'u-so'u ao na ra 'oi, sira, Kristus ded'enun manaseli'. Hai nda mimbirani mi'isasama' ao ma ra 'ona' se sa. Mihine ao ma ra, to? Te ne'o hai nda manaseli' 'ona' sira sa! Atahori mata' 'ona' naa, sangga' a atahori 'ona' sira boe. Ma esa tob'a' esa, huu sira 'ona esa' e! Nggonggoa na ra dei! 13 Tao-tao te, hai nda 'ola' koao sa, mete ma nda na'ena netehuu' sa. Hai 'ola' ba'u a naa so'al ue-tataos fo Lamatualain fee neu hai' a. Saa fo hai tao fee neu nggi naa, tungga 'aka' saa fo Lamatualain denu hai tao. Hai nda ue-tao milena' naa sa. 14 Matetun, hai nda 'ola' mi'ilelena' sa, lele' hai 'ola' koao so'al hei. Huu hai ia ra, mana 'ima dui-b'engga neu nggi so'al Kristus Hara-lii Malole na. Hei o simbo hai 'o'olam boe. Mete ma Lamatualain nda denu nita hai sa, te hai 'ola' koao so'al hei, na, naa nda matetu' sa. 15 Mete ma atahori laen mana ue tao, na, hai nda 'ola' koao sa mae, naa huu hai ue-tataom. Te pantiin na, naeni, hei nemehere ma ra boe manggatee. Noo ta'o naa, hai ue-tataom fee nggi eni' a fai dalahulun, buna-b'oan boe namanae nakandoo 'a. 16 Basa naa hai bisa mii dui-b'engga Kristus Hara-lii Malolen sia mamana-mamana' mana sia hei bob'oa ma ra, fo atahori nda fe'e reu ue-tao sia naa sa. Huu hai nda nau 'ola' koao mendi' atahori laen ue-tataon sa.
17 Te sia Lamatualain Susura Meumaren, nenesura' nae, “Mete ma hambu atahori sa nae 'ola' koao, na, hela neu fo ana 'ola' koao so'al hita Lamatua na.”b 18 Mete ma atahori sa 'ola' koao so'al aon, naa nda na'ena sosoan saa-saa sa boe. Te mete ma hita Lamatuan mana so'u kokoa' neu atahori naa, na, naa fe'e manaseli' ena!