Doi tutulu-fafali' fee atahori sarani' sia Yerusalem
9
Matetun, au sud'i boe sura' fai, fo 'o'e nggi tulu-fali Kristus atahori mamahere na ra. 2 Huu au bub'ulu' ama mi'ena susue' tulu-fali atahori 'ona' naa ena. Au o hii 'a dui hei rala malole ma ra neu atahori mamahere' mana sia Maked'onia. Au dui 'ae, hei mia profinsi Akaya sad'ia mae haitua doi tutulu-fafali' ena eni' a too mana lao' a. Au o dui so'al hei susuem, fo tao atahori laen nau tungga tulu-fali neu atahori mana susa-sona' ra boe. 3 Au o denu hita toronoo na ra, reu ratud'u rae, saa fo hai dui so'al hei naa, nda leleko' sa. Au 'ufad'e ta'o naa, fo ama sad'ia mema'. 4 Te mete ma atahori Maked'onia ra rema ramalolo' roo au, ma hei nda fe'e sad'ia sa, na, basa nggita mae. 'Afi' losa au nemehere ngga sia hei e nda na'ena netehuu' sa. 5 Naeni de au du'a 'ae, malole lena' hai toronoo ma ra reu ra'ahulu' sia nggi, fo basa nggi bisa ator doi tutulu-fafali' tungga hei hehelu-fufuli dalahulu ma. Hei musi fee mia rala malole ma ra. 'Afi' de'u.6 Eni hihiin ta'o ia: “Atahori mana sela fini 'id'a' 'a, dei fo hambu mbule-b'oan 'id'a' 'a boe. Atahori mana sela fini hetar, ma nda de'u sa, dei fo hambu bali' mbule-b'oan ma papala-b'ab'anggi' hetar boe.” 7 Atahori esa-esa' musi na'etu' aon, ana nae fee ba'u saa. 'Afi' fee noo rala seseri'. 'Afi' fee huu atahori ra'asusuu'. Huu Lamatualain sue atahori mana fee noo rala teme-ao'. 8 Lamatualain bisa fee nggi basa papala-b'ab'anggi' mata'-mata'. Ana o bisa fee lena' boe, naa fo ama nda to'a-taa saa sa boe. Te mete ma ama parluu, na, dei fo ama hambu dai lena fai. Noo ta'o naa, ama bisa fee lenan fo tulu-fali neu ue-tatao malole' ra. 9 Nenesura' sia Lamatualain Susura Meumaren nae,
“Lamatualain hii pala-b'anggi fee atahori mana to'a-taa' ra
mia Eni rala malole na.
Ana tao ndoo-tetu' nakandoo 'a,
huu rala ndoo-tetun, na'atataa' nakandoo 'a.”a
10 Lamatualain mana fee fini, fo atahori mana tao tine-osi ra sela. Lamatualain mana fee nanaat, fo ata bisa taa. Lamatualain naa boe mana fee nggi papala-b'ab'anggi' fo ama bisa tao ndoo-tetu'. Naa 'ona' hei dad'i mana tao tine-osi, ma Lamatualain fee nggi fini fo ama sela. Boe ma mbule-b'oa' naa ra, Ana tao se boe ramaheta tungga-tungga fai.b 11 Te Lamatualain nae fee nggi lena' mia hei parluu ma, naa fo hei bisa tulu-fali atahori laen mia rala malolem. Dad'i mete ma ama tulu-fali atahori laen 'ona' naa ena, dei fo ara ro'e makasi mbali Lamatualain. 12 Huu tutulu-fafali' fo hei fee neu Lamatua' atahorin mana sia naa, tantu tulun se. Ma naa o tao nggi mo'e makasi mbali Lamatualain. 13 Te lele' hei tulu-fali atahori laen ra, naa natud'u bukti 'oi, hei mimihere noo teb'e-teb'e'. Naa o tao atahori laen so'u koa-kio' mbali Lamatualain. Huu ara bisa rita, hei nemeherem neu Kristus Hara-lii Malolen, nda leleko' sa. Naa, huu hei tao tungga nemehere ma ra. Basa ma, lele' hei fee tutulu-fafali' neu se ma atahori laen ra, mia rala malole ma ra, na, tao se so'u koa-kio' neu Lamatualain.
14 Naa, atahori mana simbo rala tutulu-fafali' mia nggi naa, dei fo ara hule-o'e fee nggi. Ara o hii rae rita nggi boe, huu Lamatualain natud'u rala malolen nae-nae neu nggi. 15 Te Lamatualain fee hie-hie' hita Hadia esa meulaun manaseli' teb'e. Naeni, Yesus! Eni felin, lena' mia basa' e! Naa de basa nggita to'e mbali Lamatualain tae, “Makasi!”