Ara fee tutulu-fafali' noo rala teme-ao'
8
Toronoo susue ngga ra, e! Hai nau fo ama mihine Lamatualain rala malolen, fo Ana natud'u basa neu atahori sarani' sia profinsi Maked'onia ra. 2 Te mae ara hambu susa-sona' naen seli o, rala na ra ramaho'o rakandoo 'a. Naa de, mae ara to'a-taa o, ara fe'e fee doi' nae' noo rala teme-ao, fo tulu-fali atahori mamahere' laen mana hambu sususa-sosona' ra sia Yerusalem. 3 Au bisa dui 'ae, ara fee basa saa fo ara bisa fee. Ma ara fee lena' naa boe. Esa nda na'asusuu' se sa boe. 4 Ara mana ro'e noo teb'e-teb'e' fo hai soi dala' soa' neu se. Noo ta'o naa, ara bisa tulu-fali atahori mamahere' mana hambu sususa-sosona' sia Yerusalem.a 5 Dalahulun, hai mimihena ara nau tao ta'o ia, te saa fo ara tao' naa, lena' mia saa fo hai mimihena' a! Kaesan, ara fee ao na ra neu hita Lamatua na. Boe ma, ara 'ola' fai rae, “Hai mae fee ao ma ra fo tulu-fali nggi, huu naa tungga Lamatualain hihii-nanau na.”6 Huu atahori sarani' mana sia Maked'onia ra ratud'u ta'o naa, naa de hai mo'e fo Titus bali' neu nggi sia Korintus, naa fo ama bisa tulu-fali Lamatua' atahorin mana hambu susa-sona' sia Yerusalem. Te dalahulun, eni mana mulai kumbu doi' fee neu se. Ma 'ale' ia o, hai hule fo ana tao na'ad'ai' hei ue-tatao ma ra fo tulu-fali atahori boe.b 7 Hei ue-tatao ma ra soa' neu Lamatualain malolen seli. Conto 'ona': hei nemehere ma ra manggatee; hei 'o'ola malole ma ra; hei mihine nae' so'al Lamatualain; hei manggate ma ra, seli; ma hei sue mala hai seli. Naa de au nau fo ama tulu-fali Lamatua' atahorin mana hambu sususa-sosona' noo fee se doi' nae'.
8 Au nda parenda nggi sia Korintus fo fee doi' nae' sa, te au 'ae sob'a nggi. Te atahori sarani' mana sia Maked'onia ra rae tulu-fali se ena. Dad'i noo ta'o ia hei bisa mitud'u mae hei sue teb'e-teb'e' atahori mana susa-sona' ra. 9 Te hei bub'ulu' mae, hita Lamatuan Yesus Kristus, natud'u rala malolen neu nggi ena. Dalahulun Ana 'ona' atahori mamasu'i'. Te Ana nau dad'i atahori hata-taa' fo tulu-fali nggi, naa fo ama bisa mimisu'i sia dala' hetar.
10 Hei mulai kumbu doi' fee se eni' a too mana lao' naa ena. Hei nda fee 'aka' doi' sa, te ama tulu-fali mia rala ma ra boe. Dad'i tungga au, ama musi tao ta'o ia: 11 Dalahulun hei mae tulu-fali Lamatua' atahorin mana hambu susa-sona' sia Yerusalem. Dad'i ia naa, fee mib'asa' saa fo hei mi'etu' basa mae tulu-fali mendi'. Ma hei be'i fee ba'u saa, na, fee leo. Te sad'i fee noo rala nemeho'ot. 12 Huu mete ma hita fee noo rala nemeho'ot tungga beb'e'i ta ra tae fee ba'u saa, na, naa o malole' boe. Sia 'a hita e. Huu atahori mana fee noo ne'esusuu', na, naa mana tao na'asususa' e.
13 Au nda 'u'ena masud tao 'umub'era nggi sa, naa fo atahori laen ra ramanggafa. Te Au masud ngga, basa nggita lemba-d'oi sususa-sosona' naa 'ona esa'. 14 Te 'ale' ia hei hambu lena', ma sira nda hambu dai sa. Dei fo ara bisa bala-b'ae boe, mete ma hei nda hambu dai sa. Noo ta'o naa ata bisa lemba-d'oi bela'. 15 Naa 'ona' Lamatualain Susura Meumaren sura' nae,
“Atahori mana hambu nae'
nda hambu lena' sira parluun sa.
Ma atahori mana hambu mbei 'a,
nda to'a-taa mia sira parluun sa.”c
So'al Titus, ma atahori laen mana nau rendi tutulu-fafali' a
16 Au 'o'e makasi mbali Lamatualain, huu Eni mana kokoe-nanasi Titus fo nau tulu-fali nggi, 'ona' au nau tulu-fali nggi boe. 17 Mema' hai mo'e fo neti se'u nggi. Te Eni o hii-nau aon boe. Dad'i ana nau neti tulu-fali nggi, nda huu au 'o'e sa. 18 Te nda neu mesa' ne sa. Huu hai o denu toronoom esa neu namalolo' noo e. Basa atahori sarani' mana sia ia ra rahine atahori ia ena, huu ana tao-ues nita' mamaten dui-b'engga neu atahori so'al Lamatualain Hara-lii Malole na. 19 Atahori sarani' ra malangga na ra o pili rala e fo lao' namalolo' noo hai boe, fo tulun hai to'u tutulu-fafali' ra. Hai milalao ue-tataos ia, fo mitud'u hita Lamatuan manaselin, ma tao malole' fee atahori mana susa-sona' sia Yerusalem.
20 Hai sangga dala' fo tao ndoo-tetu' a, naa fo nda hambu atahori ra'asasala' hai rae, hai nda tao noo matetu' sa lele' mendi doi' fee neu atahori mana parluu' ra. 21 Huu hai dud'u'a losa noo malole' fo tao ndoo-tetu' mia hai rala ndoos ma sia Lamatualain matan, boe ma sia atahori matan boe.d
22 Naa, hai o denu toronoo' esa fai fo neu namalolo' noo Titus se fo rendi doi' naa. Hai paresa' e lao hetar ena. De hai bub'ulu' ana nau ue-tao noo manggate' fee nggi. Ana manggate 'ona' naa, huu ana bub'ulu' 'oi, hei tao ndoo-tetu'.
23 Mete ma hambu atahori ratane so'al Titus, na, mifad'e se mae, Titus naa, au toronoo ngga mana tao ues noo au nakandoo 'a fee nggi. Atahori mamahere' sia mamana' laen o pili rala sira atahorin ena, fo ara tungga se rendi doi' ia ra risi' Yerusalem. Ara ra'ab'ue fo rae reu ena. Titus na'ab'ue noo se boe. Dei fo basa se ratud'u Kristus manaselin 'ona' naa. 24 Dad'i hei musi mitud'u susue ma ra neu atahori mana rendi doi' naa. Boe ma mitud'u neu se, saa de hai hii 'a 'ola' koao so'al nggi. Noo ta'o naa, atahori mamahere' mia atahori sarani sia bee-b'ee bub'ulu' teb'e rae, hei sue-lai se boe.