2 Toronoo ngga ra, e! Fee hai kaka'e'. Soi rala ma ra fo simbo hai noo malole. 'Afi' mi'iteme rala ma ra. Huu dalahulun, lele' hai sia hei talad'a ma ra, hai nda tao mita sala' neu atahori esa sa boe. Hai nda kokoe mita atahori fo tao sala' sa. Hai o nda laka-ese mita atahori fo sangga hahambu' mia se sa. 3 Au masud ngga, nda fua sala' neu nggi sa. Te au 'ufad'e basa ena 'ae, hai sue nggi. De mae ta'o bee o, 'ita' hai mate do masod'a' o, hai nenefutu-pa'a' moo nggi. 4 Ia naa au nda dud'u'a sa ena, huu 'umuhere neu nggi. Au o 'ola' koao so'al nggi. Hei o tao manggatee rala ngga boe. Dad'i 'ita' mae hai hambu sususa' mata'-mata' o, au rala ngga namaho'o nakandoo 'a, huu hei.

5 Ma'ahulun lele' hai 'ima sia profinsi Maked'onia, hai bengge mita' mamate ma ra. Huu hai hambu sususa' dii-'ona na. Hai o mireresi moo atahori dea' ra boe. Hai mimed'a nemetaus sia rala ma ra.^a 6 Te Lamatualain, mana fee beb'e'i-b'ara'ai' neu atahori mana mopo nemehena na ra, ma mana named'a baraat. Dad'i Ana tao manggatee hai rala ma ra lele' Ana haitua Titus nema. 7 Titus neneman naa, tao manggatee hai rala ma ra. Huu ana nafad'e nae, lele' eni fe'e sia naa, hei tao manggatee eni rala na. Rena ta'o naa, naa tao manggatee hai rala ma ra. Ana o dui nae, hei hii mae mita au, ma hei fale rala ma ra teb'e huu hei nda 'ena-'ai mana hohongge' a sa. Ana o dui so'al hei tao saa fo tulu-fali au. Naa de au rala ngga namaho'o.^b

8 Naa, au bub'ulu' 'ae, susura dalahulu ngga mana 'ena-'ai nggi seli, mema' tao nggi susa. Te au nda fale-rala ngga sura' susura naa sa. (Tao-tao te lele' naa, au fale rala ngga mbei, lele' au bub'ulu', susura ngga naa, tao nggi susa, mae losa 'a.) 9 Te 'ale' ia, au rala ngga namaho'o. Au nda ma'ahee sa huu lele' naa hei susa. Hoko'! Au 'umuho'o, huu lele' naa, susura ngga kokoe nggi fo doa' leo. Basa ma mitaa sala-kilu' naa, ma lao hela tatao-nono'i nda malole' naa sa, fo heo' bali' tungga Lamatualain dala masod'a ndoo-tetu na. Te Lamatualain mana tao nggi fale rala ma ra ta'o naa. Noo ta'o naa, hai susuram tao nggi dad'i malole'. 10 Huu mete ma hita fale rala ta ra tungga Lamatualain hihii-nanaun, na, hita taloe' tao dala de'ulaka' ra, fo heo' bali' tao dala ndoo-tetu' ra. Naa mana mbo'i nggita mia Lamatualain huku-d'okin, naa fo hita o sud'i boe fale rala ta ra takandoo 'a. Te mete ma tae hita fale rala ta ra te sia 'a bafa ta ra, 'ona' atahori raefafo' ia biasa na ra, dei fo hita tambalutu.

11 Hei dud'u'a sob'a! Lele' hei baca au susura ngga, au bub'ulu' hei fale rala ma ra boe. Naa tungga Lamatualain hihii-nanau na. Huu naa tao nggi tao ues mita' mamate ma ra fo 'ena-'ai mana hohongge' a. Hei bengge moo de'ulaka' naa. Hei o mimitau boe, 'afi' losa ana tao nakandoo de'ulaka' naa. Hei hii mae mita au fai, ma mihehere fo tao' a malole'. Hei o mihehere fo mae huku-d'oki atahori mana tao sala' a. Huu hei tao ndoo-tetu' ta'o naa, naa de hei meu'. Noo ta'o naa, nda hambu esa fee sala' neu nggi sa boe. 12 Dad'i au nda sura' susura dalahulu ngga naa, fee neu atahori mana tao de'ulaka' a sa. Au o nda sura' fee neu atahori mana hambu de'ulaka', mia atahori naa de'ulakan sa. Te au sura' susura naa fee neu nggi, fo 'utud'u 'ae, hei ded'ea-'o'olam sia Lamatualain matan naa, teteb'es. Ma ama sue hai noo teteb'es. 13 Basa ia ra, tao manggatee hai rala ma ra.

Hei o tao manggatee Titus ralan boe, naa fo ralan o teer boe. Naa o tao hai rala ma ra boe ma'ahee. 14 Au so'u-so'u' 'ita nggi sia Titus matan so'al hei tatao-nono'i malole ma ra. Au o 'ufad'e e 'ae, hei nda tao mi'imamae' mita au sa. Huu basa dala' fo hai dui mita neu nggi, naa teb'e. Ma, basa dala' fo hai dui so'al hei neu Titus, naa o teb'e boe. 15 Dad'i mete ma Titus nasaned'a hei tao tungga au parenda ngga, naa ana boe sue nggi. Ana o nasaned'a lele' eni naa neti, ama simbo e noo had'a-hormat. 16 Au rala ngga namaho'o, huu au 'umuhere nggi sia basa dala' ra. De au nda du'a-d'u'a' nggi sa ena.