Lamatualain tao malole' fee nggita
6
Huu hai ue-tao mi'ib'ue moo Lamatualain, hai mae minori-mifad'e nggi 'ona' ia: Lamatualain natud'u rala malolen naen seli neu nggi. Dad'i ama simbo mala Rala malolen, na, 'afi' hie-hie' a. 2 Te sia Susura Meumaren, nenesura' 'oi,“Nandaa noo fain, na, Au rena nggo.
Au o tulu-fali nggo lele' Au fee atahori masoi-masod'a'.”
Naa, rena malolole, e! Lele' ia, eni fai malole na. Huu lele' ia, Lamatualain fain fo fee atahori masoi-masod'a'.a
3 Naeni de hai mae minea ao ma ra malolole fo misod'a ndoos. Huu hai nda nau dad'i kai-b'aa' soa' neu atahori mana nau neu sia Lamatualain dala masod'an sa. Boe ma hai o mae 'ola' ndoos, naa fo atahori 'afi' 'ola' ra'amuti hai nara malole ma. 4 Ma basa-b'asa saa fo hai tao' a, hai tao fo mitud'u mae, hai ia, Lamatualain atahori mana tao ues malole na. Dad'i mae hai hambu sususa-sosona' do, hambu doid'oso', do masod'a ma ra sia nemue-neanggi' a talad'an, na, hai mi'itataa' mikindoo 'a. 5 Hai o mi'itataa' mikindoo, lele' hambu poko-paru', lele' ara nggari hai bui rala mii, lele' atahori ramue-raanggi, tao ues mita' mamate ma ra, nda hambu sunggu' sa, boe ma lele' mimed'a ndoe.b 6 Hai o mi'itataa' moo rala meu'. Hai bub'ulu' nae', so'al Lamatualain. Hai mi'itataa' noo mi'imamate' rala ma ra. Hai tao malole' fee neu atahori. Hai hela Lamatualain Dula-d'alen nalalao hai. Hai o sue teb'e-teb'e' atahori, ma hai nda dea-rala' sa boe. 7 Lele' hai 'ola', hai 'ola' teb'e, nda leleko' sa. Hai o simbo mala koasa mia Lamatualain fo tao malole' ra. Naa 'ona' hai dad'i sold'ad'u to'u tee-tande manad'ai' mia Lamatualain, fo hai mitati lab'an musu a, ma nda rasenggi' hai sa. 8 Hai o mi'itataa', mae atahori ratud'u had'a-hormat neu hai, do, 'ola' ra'amuti hai nara ma ra; mae atahori 'ola' ratutud'a' hai, do ranea hai nara malole ma ra; mae atahori leleko' rae, hai laka-ese mala atahori, do, ara 'ola' rae, hai 'ola' matetu'. 9 Ruma nda rahine hai sa. Te sira hetar rahine hai nara ma ra. Hai mae' a mate lao hetar ena, te hai fe'e misod'a boe. Ara hukun hai lao hetar beran seli, te hai o nda mate sa boe. 10 Mae hai mimed'a beran seli, te hai mimiho'o mikindoo 'a. Mae hai nda mad'oi' sa, te hai tao atahori hetar rala na ra ramasu'i. Naa 'ona' hai nda mi'ena saa-saa sa boe, te hai o mi'ena basa-b'asa' e.
11 Hai 'ola' relo-relo mbali nggi sia kota Korintus. Hai o sue nggi teb'e-teb'e'. 12 Hai mitud'u susue ma ra neu nggi mikindoo 'a. Te hei nda sue hai mikindoo 'a sa. 13 Dad'i au 'ae 'unori-'ufad'e nggi 'ona' hei dad'i au ana ngga ra. Malole lena' hei sue hai mikindoo 'a.
'Afi' dad'i teu esa too atahori nda mana ramahere Lamatua' sa
14 'Afi' dad'i teu esa too atahori nda mana ramahere Kristus sa. Huu hei nda 'ona esa' sa. Atahori mamahere' mana nasod'a ndoos nda rala' esa noo atahori mana lab'an Lamatua' sa, de nda nandaa sa mete ma ara rahehere rae tao ues ra'ab'ue. Atahori rala malole roo atahori rala nda malole' ra sa, nda randaa dad'i toronoo' sa. Naa 'ona' manggarelo' a nda bisa na'ab'ue noo ma'ahatu' a sa. 15 Kristus nda bisa nala hara' sa noo nitu a malanggan sa, to?c 'Ona' naa boe, atahori nda mana namahere neu Lamatualain sa, nda hambu bab'anggi 'ona esa' roo atahori mana ramahere E sa.
16 Hei du'a ta'o bee, e? Ita' mbei ma hei du'a mae, hei bisa misi' Lamatualain ume hule-o'en rala mii fo fee had'a-hormat neu E, dei fo misi' ume sosonggo' rala mii fo hule-o'e neu sud'i 'a saa sosonggo' ra, do? Nda nandaa sa, to! Huu Lamatualain naa, Lamatualain masod'a'. Eni o dad'i hita Lamatuan mana na'ena hak parenda nggita. Boe ma, hita dad'i 'ona' Eni ume hule-o'en ena, huu Ana leo sia rala ta ra. Huu Lamatualain sura' sia Susura Meumaren nae,
“Au ume ngga hambu sia atahori ngga ra talad'a na ra.
Au o 'uu dea-rala sia talad'a na ra boe.
Au 'ae dad'i sira Lamatualain na.
Sira o dad'i au atahori ngga boe.”d
17 Naeni de Lamatualain o sura' ta'o ia nae,
“Hei musi lao hela talad'a na ra ma saranggaa mia se,
fo ama 'afi' dad'i 'ona' se.
Hei rala ma ra musi meu'.
Boe ma, ama musi mi'id'od'oo' mia basa mana tao rala ma ra ranggenggeo,
noo ta'o naa, Au simbo nggi noo malole'.e
18 Au 'ae dad'i hei Ama ma;
ma hei o dad'i Au ana ngga ra boe.
Naa, hita Lamatuan mana 'ola'.
Eni, mana koasa manaseli'.”f