5
Te hita bub'ulu', hita aon lele' ia, hita pake ne'etataa' sia raefafo', 'ona' lalaat esa taririi ne'etataa' a. Mae dei fo hita aon nambalutu hendi e, te ata 'afi' dud'u'a, huu Lamatualain tao hela mamana malole' sa fee nggita sia sorga. Atahori nda tao mamana' naa sa. Te Lamatualain mana tao, ma mamana' naa na'atataa' nakandoo 'a. 2 Hita aon bengge sia raefafo' ena. Ma hita hii tala seli tae hambu ao feu' fo pake sia sorga. 3 Ma mete ma hita losa naa ena, 'ona' hita nda ma'ahola' sa, te pake bua-b'a'u feu'.a Huu hita nda ta'ena' a samana' sa, te hita o hambu ao feu' boe. 4 Hita aon mana nambalutu' lele' ia, tao nggita lea hahae naru', huu tamed'a beran seli. Mae 'ona' naa o, hita nda nau mate fo nda ta'ena ao' sa ena. Hoko'! Hita nau hambu ao feu', fo lao hela ao mbaraa' ra, nggati noo masod'a feu ndoo-tetu' a. 5 Lamatualain mana tao nggita tahehere fo simbo masod'a feu' a. Ana o fee nggita Dula-d'alen boe, fo dad'i tanda nemehere' mia Eni Hehelu-fufuli na.6 Huu naa, hita tamahere takandoo. Hita tahine tae, mete ma hita fe'e sia ao-sisi' lele' ia, na, hita fe'e ta'ad'od'oo' too Lamatualain. 7 Naeni de hita tasod'a tungga nemehere ta ra neu Kristus. Hita nda tasod'a tungga saa fo tita sia raefafo' ia sa. 8 Te hita o tamahere tae, mete ma hita mate lao hela ao-sisi' lele' ia, fo teu tasod'a ta'ab'ue too Lamatualain sia sorga, tantu hita tamaho'o lena' fai. 9 Mae hita tasod'a takandoo sia raefafo' ia, do, hita mate sia ia, do, tasod'a sia naa, te malolen, naeni, hita tao tamaho'o Lamatualain rala na. Te naa, hita hihii-nanau na. 10 'Afi' lilii'. Doo-d'oo te basa atahori musi rataa mbali Kristus. Eni, Mana Na'etu' Ded'eat mana nile basa atahori masod'a na ra sia raefafo' ia. Dei fo Kristus mana bala-b'ae nandaa noo atahori tatao-nono'i na ra. Huu Kristus bub'ulu', atahori tao malole', do tao nda malole' sa.b
Hita bisa malolole too Lamatualain, huu Kristus
11 Huu hai misined'a mae dei fo Kristus paresa' masod'a ma ra, naeni de hai mimitau ma fee had'a-hormat neu E. Dad'i hai ue-tao mita' mamate ma ra fo kokoe atahori fo ara ramahere neu Kristus. Lamatualain bub'ulu' rala meu ma ra ena. Au o nau fo hei mihine hai rala meu ma ra boe. 12 Hai nda so'u-so'u' aom sia hei mata ma ra sa. Hoko'! Te hai fee nggi netehuu', naa fo ama bisa 'ola' koao so'al hai, ma nda mae sa. Noo ta'o naa, hei bisa mitaa mbali meser mana pepeko-leleko' mana 'ola' koao' ra. Huu ara 'ola' koao so'al sira ue-tatao hahambun fo atahori mete rita' a, tao-tao te rala na ra nda meu' sa. 13 Mete ma hei mae hai mulu', na, hai 'ola' ta'o naa, fo milalao Lamatualain ue-tatao na. Mae hei nda mihine sa o, te Lamatualain nahine. Mete ma hai 'ola' mendi' dud'u'a ndoos, na, hai 'ola' ta'o naa fo tulu-fali nggi.
14 Kristus sue nala nggita seli. Naa mana fee hai masi'et fo milalalao ue-tatao ma ra. Huu hai mimihere mae, Atahori esa, naeni Kristus, mate nggati basa atahori. Eni sosoan nae, naa 'ona' basa nggita mate lao hela masod'a mbaraa ta ra, ma nda ta'ena hak saa sa boe sia raefafo' ia. 15 Kristus mate soa' neu basa atahori, fo basa atahori mana rasod'a sia raefafo' ia, nda rasod'a tungga 'aka' hihii-nanau na ra sa. Te ia naa ara musi rasod'a tungga Kristus hihii-nanaun, huu Ana mana mate nggati se ena, ma nasod'a bali'.
16 Dad'i ia naa, ata 'afi' nile atahori tendi' atahori biasa uku-uli na. Mae dalahulun hita nile Kristus, tendi' atahori biasa dud'u'a na. Te ia naa, hita nda nile E ta'o naa sa ena. 17 Naeni de, atahori mana nenepa'a' roo Kristus dad'i atahori feu', mana na'ena masod'a feu'. Ana nda 'ona' dalahulun sa ena, huu masod'a mbaraan mopo hendi ena. Nese ena! Huu ia naa feu' a sia ena. 18 Basa ia, Lamatualain mana tao. Ana mana tao nad'ame' fo ata malolole bali' too E, huu Kristus 'ose hendi sala ta ra ena. Ma Ana o fee ue-tataos neu nggita boe, fo ata tatud'u dala' naa fo atahori laen o bisa bad'ame bali' roo Lamatualain.
19 Misined'a, te lele' Kristus fe'e sia raefafo' ia, Lamatualain tao fee atahori bad'ame bali' roo Eni nendi' Kristus. Dad'i Ana nda 'ito-reken sala na ra sa ena, de ara nda lemba-d'oi sala' ra huku-d'okin sa. Ma Ana o fee ue-tataos nema nggita fo teu dui-b'engga neu atahori tae, ara bisa malolole bali' roo E.
20 Hai Kristus ded'enun, de Lamatualain pake hai fo mendi atahori, naa fo ara bad'ame bali' roo E. Huu hai Kristus ded'enun, naa de hai mo'e nggi mae, “Lamatualain hii-nau fo hei malolole bali' moo Eni.” 21 Kristus nda tao nita sala' sa. Te Lamatualain tao E lemba-d'oi sala ta ra ena. Lamatualain tao ta'o naa neu nggita, huu Kristus mamaten soi dala' fo ata tasod'a noo rala ndoos, 'ona' Lamatualain rala ndoos boe.